ସଂସଦରେ ଲିଖିତ ଜବାବ ରଖିଲେ ବିଭାଗୀୟ ମନ୍ତ୍ରୀ, ଗୃହମନ୍ତ୍ରଣାଳୟ ଅଧିନରେ ଆସୁଥିବା ବିଭାଗରେ ୧ଲକ୍ଷରୁ ଅଧିକ ପଦ ଖାଲି
କନକ ବ୍ୟୁରୋ : ଦେଶରେ ବଢୁଥିବା ବେରୋଜଗାରୀଙ୍କୁ ନେଇ ବିରୋଧୀଦଳମାନେ ବାରମ୍ବାର ସରକାରଙ୍କୁ ଟାର୍ଗେଟ କରୁଛନ୍ତି । ପ୍ରତି ନିର୍ବାଚନ ପୂର୍ବରୁ ସମସ୍ତ ରାଜନୈତିକଦଳମାନେ ବେରୋଜଗାର ଓ ନିଯୁକ୍ତିକୁ ବଡ ପ୍ରସଙ୍ଗ କରିଥାନ୍ତି । ଏହି କ୍ରମରେ ସଂସଦର ମୌସୁମୀ ଅଧିବେଶନ ବେଳେ ଗୃହମନ୍ତ୍ରଣାଳୟ ଅଧିନରେ ଥିବା ବିଭାଗରେ କେତେ ଖାଲି ପଦ ରହିଛି ତାହାକୁ ନେଇ ପ୍ରଶ୍ନ ପଚରାଯାଇଥିଲା । ସମାଜବାଦୀ ପାର୍ଟିର ସାଂସଦ ଜାବେଦ ଅଲ୍ଲୀ ଖାନ ଗୃହମନ୍ତ୍ରୀ ଅମିତ୍ ଶାହାଙ୍କ ଠାରୁ ଲିଖିତ ଜବାବ ଦାବି କରି ପଚାରିଥିଲେ କି ଗୃହମନ୍ତ୍ରଣାଳୟ ଅଧିନରେ ଆସୁଥିବା ବିଭାଗରେ କେତେ ପଦ ଖାଲି ପଡିଛି । ଏହାର ଜବାବରେ କୁହାଯାଇଛି କି ଗୃହମନ୍ତ୍ରଣାଳୟ ଅଧିନରେ ଆସୁଥିବା ବିଭାଗ ଓ କେନ୍ଦ୍ରୀୟ ବଳରେ ପାଖାପାଖି ୧,୧୪,୨୪୫ ପଦବୀ ଖାଲି ପଡିଛି ।
Kanak News is now on WhatsApp
Join and get latest news updates delivered to you via WhatsApp
ସାଂସଦ ଜାବେଦ ଅଲ୍ଲୀ ଖଶନ ବିଭିନ୍ନ ବିଭାଗ ଏବଂ ଅର୍ଦ୍ଧସାମରିକ ବାହିନୀରେ ଖାଲି ପଡିଥିବା ପଦବୀର ବିବରଣୀ ମାଗିଥିଲେ । ତାଙ୍କର ପ୍ରଶ୍ନ ଥିଲା କି ସରକାର ୨୦୨୩ ମସିହାରେ ଅତିକମରେ ୧୦ଲକ୍ଷ ପଦବୀ ପୂରଣ କରିବାକୁ ଘୋଷଣା କରିବା ପରେ ୨୦୨୩ରେ ବିଜ୍ଞାପନ ଓ ପୂରଣ ହୋଇଥିବା ଖାଲି ପଦବୀର ସଂଗଠନଭିତ୍ତିକ ବିବରଣୀ କଣ ?
ସମାଜବାଦୀ ସାଂସଦଙ୍କ ପ୍ରଶ୍ନର ଜବାବ ଦେଇ ଗୃହମନ୍ତ୍ରୀ କହିଛନ୍ତି କି, ଗୃହମନ୍ତ୍ରଣାଳୟ ଏବଂ ଏହା ଅଧିନରେ ଥିବା ଅର୍ଦ୍ଧସାମରିକ ବାହିନୀ ଏବଂ କେନ୍ଦ୍ରୀୟ ପୋଲିସ ସଂଗଠନରେ ସମୁଦାୟ ପଦବୀ ସଂଖ୍ୟା ବର୍ତ୍ତମାନ ପ୍ରାୟ ୧,୧୪,୨୪୫ ଖାଲି ପଡିଛି । ଏଥିରେ ୩୦୭୫ (ଗ୍ରୁପ ଏ), ୧୫୮୬୧ (ଗ୍ରୁପ-ବି), ଏହାସହ ୯୫୩୦୯ ଗ୍ରୁପ ସି ପଦବୀ ଖାଲି ପଡିଛି ।
ଗୃହମନ୍ତ୍ରଣାଳୟ ଏହାର ଲିଖିତ ଜବାବରେ ଆହୁରି କହିଛି ଯେ ଖାଲି ଥିବା ପଦବୀରେ ନିଯୁକ୍ତି ଏକ ନିରନ୍ତର ପ୍ରକ୍ରିୟା । ଖାଲି ପଡିଥିବା ପଦବୀ ଆସିବା ପରେ ବିଭିନ୍ନ ପଦବୀ ପୂରଣ ପାଇଁ ବିଜ୍ଞାପନ ପ୍ରକାଶ କରାଯାଇ ନିୟମ ଅନୁଯାୟୀ ନିଯୁକ୍ତି ଦିଆଯାଇଥାଏ । ୨୦୨୩ ମସିହାରେ ପ୍ରାୟ ୩୧,୮୭୯ଟି ପଦବୀ ପାଇଁ ବିଜ୍ଞାପନ ପ୍ରକାଶ ପାଇଥିବା ବେଳେ ସେଥିରୁ ୧୧୨୬ଟି ପଦବୀ ପୂରଣ ହୋଇଛି । ଖାଲି ପଡିଥିବା ପଦବୀଗୁଡିକର ପୂରଣ ପାଇଁ ମନ୍ତ୍ରଣାଳୟ ନିୟମିତ ଭାବେ ନିଯୁକ୍ତି ଅଗ୍ରଗତିର ସମୀକ୍ଷା କରୁଛି ।