୧୦ ବର୍ଷ କାରାଦଣ୍ଡରେ ଦଣ୍ଡିତ ହୋଇଥିବା ଏନସିପି ନେତା ଫେରିପାଇଲେ ସାଂସଦ ପଦ, ରାହୁଲ ଆପଣାଇବେ କି ମହମ୍ମଦଙ୍କ ପଥ
କନକ ବ୍ୟୁରୋ : ଦେଶ ରାଜନୀତିରେ ଏବେ ରାହୁଲଙ୍କ ସାଂସଦ ପଦ ଅଯୋଗ୍ୟ ଘୋଷଣା ହେବା ଏବେ ପ୍ରମୁଖ ଚର୍ଚ୍ଚାର ବିଷୟ ପାଲଟିଛି । ରାହୁଲଙ୍କୁ ସୁରଟ କୋର୍ଟ ଏକ ମାନହାନୀ ମାମଲାରେ ୨ବର୍ଷ ଜେଲ ଦଣ୍ଡରେ ଦଣ୍ଡିତ କରିବା ପରେ ଲୋକସଭା ସଚିବାଳୟ ତରଫରୁ ତାଙ୍କର ସାଂସଦ ପଦକୁ ଅଯୋଗ୍ୟ ଘୋଷଣା କରାଯାଇଛି । ହେଲେ ରାହୁଲ ଗାନ୍ଧୀ ଏହାକୁ ଗମ୍ଭୀରତାର ସହ ନନେଇ ଦେଶର ସମସ୍ୟା ଓ ମୋଦୀ ଏବଂ ଆଦାନୀଙ୍କ ମଧ୍ୟରେ ଥିବା ସଂପର୍କକୁ ଲୋକଲୋଚନକୁ ଆଣିବାକୁ ଚେଷ୍ଟା କରୁଛନ୍ତି । ହେଲେ ଆଜି ଲୋକସଭା ସଚିବାଳୟ ପକ୍ଷରୁ ଏନସିପିର ଅନ୍ୟଜଣେ ଅଯୋଗ୍ୟ ଘୋଷିତ ସାଂସଦ ମହମ୍ମଦ ଫୈଜଲଙ୍କ ସଭ୍ୟପଦ ଫେରାଇଦେବା ପରେ ରାହୁଲ ଗାନ୍ଧୀଙ୍କ ପାଇଁ ଆଶା ସଂଚାର ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଲାକ୍ଷାଦୀପରେ ଏନସିପିର ସାଂସଦ ଥିବା ମହମ୍ମଦ ଫୈଜଲ ମାତ୍ର କିଛିଦିନ ତଳେ ତାଙ୍କର ଲୋକସଭା ସାଂସଦ ପଦ ହରାଇଥିଲେ । ଏହାପରେ ସେ ସୁପ୍ରିମକୋର୍ଟରେ ଏନେଇ ଅଭିଯୋଗ କରିଥିଲେ । ହେଲେ ତାଙ୍କ ମାମଲା ସୁପ୍ରିମକୋର୍ଟରେ ଶୁଣାଣି ହେବା ପୂର୍ବରୁ ଲୋକସଭା ସଚିବାଳୟ ତରଫରୁ ମହମ୍ମଦଙ୍କ ସାଂସଦ ପଦ ଉପରେ ନିଆଯାଇଥିବରା ନିଷ୍ପତ୍ତିକୁ ପ୍ରତ୍ୟାହାର କରାଯାଇଛି ।
ମହମ୍ମଦ ଫୈଜଲ ଏକ ହତ୍ୟା ପାଇଁ ଯୋଜନା କରିଥିବା ଅଭିଯୋଗରେ ଜାନୁଆରୀ ୧୧ ତାରିଖରେ କୋର୍ଟ ତାଙ୍କୁ ୧୦ବର୍ଷ ଜେଲ ଦଣ୍ଡରେ ଦଣ୍ଡିତ କରିଥିଲେ । ଏହାର ଦୁଇଦିନ ପରେ ଲୋକସଭା ସଚିବାଳୟ ତରଫରୁ ତାଙ୍କର ସାଂସଦ ପଦ ରଦ୍ଦ କରାଯାଇଥିଲା । ମହମ୍ମଦଙ୍କୁ କୋର୍ଟ ୧୦ ବର୍ଷ ଜେଲ ଦଣ୍ଡରେ ଦଣ୍ଡିତ କରିଥିଲେ । ହେଲେ ରାହୁଲ ଗାନ୍ଧୀଙ୍କୁ ସୁରଟ କୋର୍ଟ ମାତ୍ର ୨ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି । ଏଣୁ ଆଶା କରାଯାଉଛି କି, ରାହୁଲ ଗାନ୍ଧୀ ମହମ୍ମଦ ଫୈଜଲଙ୍କ ରାସ୍ତା ଆପଣାଇ ପୁଣି ଲୋକସଭା ସଦସ୍ୟ ପଦ ଫେରିପାଇପାରନ୍ତି ।