କନକ ବ୍ୟୁରୋ: ସୋସିଆଲ ମିଡିଆରେ ଭାଇରାଲ ହେଉଛ ଦିଲ୍ଲୀ ମନ୍ତ୍ରୀଙ୍କ ଭିଡିଓ । କୁହାଯାଉଛି ଏହି ଦୃଶ୍ୟ ଦିଲ୍ଲୀ ତିହାର ଜେଲ ଭିତରର । ମସାଜ ନେଉଥିବା ବାବୁ ଜଣଙ୍କ ହେଉଛନ୍ତି ଦିଲ୍ଲୀର ପାୱାରଫୁଲ ମନ୍ତ୍ରୀ ସତ୍ୟେନ୍ଦ୍ର ଜୈନ । ବେଆଇନ ଭାବେ ତିନି କମ୍ପାନିକୁ ଅନୁକମ୍ପା ଦେଖାଇ ଲାଞ୍ଚ ନେବା ଅଭିଯୋଗରେ ଜେଲରେ ଥିବା ସତ୍ୟେନ୍ଦ୍ରଙ୍କ ଜେଲ ଭିତରେ ଏମିତି ସୁବିଧା ଯୋଗାଇ ଦିଆଯାଇଛି । ପ୍ରଥମ ଦୃଶ୍ୟରେ ଜଣେ ବ୍ୟକ୍ତି ତାଙ୍କ ଗୋଡକୁ ମସାଜ କରୁଛନ୍ତି, ସେ ଆରାମରେ ଖବରକାଗଜ ପଢୁଛନ୍ତି । ଦ୍ୱିତୀୟ ଦୃଶ୍ୟରେ ବାବୁଙ୍କ ଗୋଡ ମାଲିସ ପରେ ତାଙ୍କ ମୁଣ୍ଡକୁ ସମାଜ କରାଯାଉଛି । ଆଉ ବାବୁ ଚେୟାରରେ ଆରାମରେ ବସିଛନ୍ତି । ତୃତୀୟ ଦୃଶ୍ୟରେ ମସାଜ ପରେ ମନ୍ତ୍ରୀ ତାଙ୍କ ସହଯୋଗୀଙ୍କ ସହ ବସି ଖଟି କରୁଛନ୍ତି । ପାଖରେ ଟିଭି ଲାଗିଛି । ଚେୟାର ପଡିଛି । ଲୋକେ ଆସୁଛନ୍ତି, ଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜେଲରେ ଥିବା ଆପ ନେତାଙ୍କୁ ଭିଆଇପି ସୁବିଧା ମିଳୁଥିବା ନେଇ ବୁଧବାର ପ୍ରବର୍ତନ ନିର୍ଦ୍ଦେଶାଳୟ ବା ଇଡି କୋର୍ଟରେ ଅଭିଯୋଗ କରିଥିଲା । ଆଉ ଏବେ ଆପର ମନ୍ତ୍ରୀଙ୍କ ଜେଲ ଭିତରର ଭିଡିଓ ଭାଇରାଲ ହେବାକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି ।
ସତ୍ୟେନ୍ଦ୍ର ଜୈନଙ୍କ ଭିଡିଓ ସାମନାକୁ ଆସିବା ପରେ ଆଦମି ପାର୍ଟିକୁ ଘେରିଛନ୍ତି ବିରୋଧୀ ବିଜେପି ଓ କଂଗ୍ରେସ । ବିଜେପି ନେତା ଗୌରବ ଭାଟିଆ ସାମ୍ବାଦିକ ସମ୍ମିଳନୀ କରି କହିଛନ୍ତି, ଏସବୁ ଦିଲ୍ଳୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଇଙ୍ଗିତରେ ହେଉଛି । ଆମ ଆଦମି ପାର୍ଟି ଏବେ ସ୍ପା-ମସାଜ ପାର୍ଟିରେ ପରିଣତ ହୋଇଛି । ଭିଡିଓକୁ ନେଇ କଂଗ୍ରେସ ମଧ୍ୟ ସମାଲୋଚନା କରିଛି । ଜବାବ ରଖି ଦିଲ୍ଳୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ କହିଛନ୍ତି, ବିଜେପି ତଳ ସ୍ତରକୁ ଯାଇ ରାଜନୀତି କରୁଛି । ଜୈନଙ୍କ ଗୋଡ ଖରାପ ଥିବାରୁ ଡାକ୍ତରଙ୍କ ପରାମର୍ଶ ଅନୁସାରେ ତାଙ୍କର ସ୍ୱତନ୍ତ୍ର ଚିକିତ୍ସା ଚାଲିଛି ।
ବେଆଇନ ଭାବେ ତିନି କମ୍ପାନିକୁ ଅନୁକମ୍ପା ଦେଖାଇ ଲାଞ୍ଚ ନେବା ଅଭିଯୋଗରେ ଇଡି ସତ୍ୟେନ୍ଦ୍ର ଜୈନଙ୍କୁ ଗିରଫ କରିଥିଲା । ସେ ଏବେ ତିହାର ଜେଲରେ ଅଛନ୍ତି । କିନ୍ତୁ ସେଠାରେ ତାଙ୍କୁ ଭିଆଇପି ସେବା ଯୋଗାଇ ଦିଆଯାଉଥିବା ବାରମ୍ବାର ଅଭିଯୋଗ କରି ଆସୁଛି ବିଜେପି । ଅନ୍ୟପଟେ ବିଜେପିର ଅଭିଯୋଗକୁ ଖଣ୍ଡନ କରିବା ସହ, ସତ୍ୟେନ୍ଦ୍ରଙ୍କୁ ଗିରଫଦାରୀକୁ, କେନ୍ଦ୍ର ସରକାରଙ୍କ ଏକ ଷଡଯନ୍ତ୍ର ବୋଲି କହି ଆସୁଛି ଆମ ଆଦମି ପାର୍ଟି ।