ସିନ୍ଦେ ସରକାର ଉପରେ ବିରୋଧୀଙ୍କ ଗୁରୁତର ଅଭିଯୋଗ, ନିର୍ଭୟା ଫଣ୍ଡ ଟଙ୍କାରେ କିଣାଯାଇଥିବା ଗାଡି ବ୍ୟବହାର କରୁଛନ୍ତି ସାଂସଦ ଓ ବିଧାୟକ
କନକ ବ୍ୟୁରୋ : ମହାରାଷ୍ଟ୍ରର ସିନ୍ଦେ ସରକାରଙ୍କ ଉପରେ ଉଦ୍ଧବ ଠାକରେ ଗୋଷ୍ଠୀ ଏକ ଗୁରୁତର ଅଭିଯୋଗ ଆଣିଛନ୍ତି । ବିରୋଧୀ ଉଦ୍ଧବ ଗୋଷ୍ଠୀ କହିଛନ୍ତି କି, ସିନ୍ଦେ ସରକାର ମହାରାଷ୍ଟ୍ରରେ ମହିଳାଙ୍କ ସୁରକ୍ଷା ପାଇଁ ଗଠିତ ହୋଇଥିବା ନିର୍ଭୟା ଫଣ୍ଡରୁ ଟଙ୍କା ନେଇ ବିଧାୟକ ଓ ସାଂସଦମାନଙ୍କ ପାଇଁ ସୁରକ୍ଷିତ ଗାଡି କିଣିଛନ୍ତି । ଏନେଇ ଉଦ୍ଧବ ଠାକରେ କହିଛନ୍ତି କି, ରାଜ୍ୟ ସରକାରଙ୍କ ପାଇଁ ଏହାଏକ ଲଜ୍ଜଜନକ ଘଟଣା । ଆମେ ସବୁ ଜାଣିଛୁ କି ନିର୍ଭୟା ଫଣ୍ଡ କାହିଁକି ଗଠନ କରାଯାଇଥିଲା । ଏହି ଫଣ୍ଡକୁ ଆସୁଥିବା ସହାୟତା ଅର୍ଥ ଜରିଆରେ ରାଜ୍ୟରେ ମା ଓ ଭଉଣୀଙ୍କୁ ସୁରକ୍ଷା ଦେବା ସହ ଅଭିଯୁକ୍ତଙ୍କୁ ଧରିବା କାମରେ ବ୍ୟବହାର କରାଯିବ । ହେଲେ ସିନ୍ଦେ ସରକାର ଏହି ଟଙ୍କାରେ ନିଜ ଦଳର ବିଧାୟକ ଓ ସାଂସଦମାନଙ୍କ ପାଇଁ ଗାଡି କିଣିବା ଓ ମଉଜ କରିବାରେ ଖର୍ଚ୍ଚ କରୁଥିବା କଥା ଅଭିଯୋଗ ଆଣିଛନ୍ତି ଉଦ୍ଧବ ଠାକରେ ।
Kanak News is now on WhatsApp
Join and get latest news updates delivered to you via WhatsApp
ଏକ ଜାତୀୟ ଗଣମାଧ୍ୟମର ସୂଚନା ମୁତାବକ ଚଳିତ ବର୍ଷ ୩୦ କୋଟି ଟଙ୍କାର ୭୬୮ ଟେି ଗାଡି କିଣାଯାଇଛି । ଏନେଇ ପ୍ରଥମେ ଜଣେ ପୋଲିସ ଅଧିକାରୀ ଦାବି କରିଥିଲେ କି ଏହି ଗାଡିଗୁଡିକ ନିର୍ଭୟା ଫଣ୍ଡରେ ଥିବା ଅର୍ଥରେ କିଣାଯାଇଛି । ପୋଲିସ ଜଣଙ୍କ ଅଭିଯୋଗ କରିଥିଲେ କି ପ୍ରଥମେ ଏହି ଗାଡିଗୁଡିକୁ ମହିଳାଙ୍କ ସୁରକ୍ଷା ଦିଗରେ କାମ କରିବାକୁ କିଣାଯାଇଥିଲା । ହେଲେ ଏବେ ଏହାକୁ ବିଧାୟକ ଓ ସାଂସଦମାନଙ୍କ ସୁରକ୍ଷା ପାଇଁ ନିଆଯାଇଛି । ହେଲେ ଏଭଳି ଅଭିଯୋଗ ପରେ ମଧ୍ୟ ସିନ୍ଦେ ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ ।
ପୋଲିସ ଅଧିକାରୀ ଜଣଙ୍କ ଆହୁରି କହିଛନ୍ତି କି ନିର୍ଭୟା ଫଣ୍ଡ ଟଙ୍କାରେ କିଣାଯାଇଥିବା ଗାଡିଗୁଡିକ ମଧ୍ୟରୁ ୯୭ ଟି ଗାଡି ପୋଲିସ ଷ୍ଟେସନରେ ବ୍ୟବହାର କରାଯାଉଥିବା ବେଳେ ୪୭ ଟି ବୋଲେରୋ ବିଧାୟକ ଓ ସାଂସଦଙ୍କୁ ସୁରକ୍ଷା ପାଇଁ ବ୍ୟବହାର କରାଯାଉଛି ।