ଚେନ୍ନାଇ-ପଂଜାବ ମ୍ୟାଚର ଶେଷ ଓଭରରେ ରୋଚକ ଦୃଶ୍ୟ । କ୍ରିଜ୍ ଛାଡିଲେନି ମାହି, ଫେରିଆସିଲେ ମିଚେଲ
କନକ ବ୍ୟୁରୋ : ଆଇପିଏଲ ୨୦୨୪ର ୪୯ତମ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷ ମ୍ୟାଚରେ ସହଜ ବିଜୟ ହାସଲ କରିଛି ପଂଜାବ କିଙ୍ଗ୍ସ । ଏମ. ଚିଦାମ୍ବରମ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ ୧୬୩ ରନର ଲକ୍ଷ୍ୟକୁ ୧୭.୫ ଓଭରରେ ମାତ୍ର ୩ଟି ୱିକେଟ ବିନିମୟରେ ହାସଲ କରିନେଇଛି ପଂଜାବ । ତେବେ ଏହି ମ୍ୟାଚର ପ୍ରଥମ ଇଂନିସର ଶେଷ ଓଭରରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଛି, ଯାହାର ଭିଡ଼ିଓ ମଧ୍ୟ ସୋସିଆଲ ମିଡିଆରେ ବେଶ ଭାଇରାଲ ହେଉଛି । ଅନ୍ତିମ ଓଭରରେ ସିଏସକେ ପକ୍ଷରୁ ମହେନ୍ଦ୍ର ସିଂ ଧୋନୀ ବ୍ୟାଟିଂ କରୁଥିବା ବେଳେ ନନ୍ ଷ୍ଟ୍ରାଇକରେ ଥିଲେ ଡାରିଲ୍ ମିଚେଲ । ପଂଜାବ ବୋଲର ଅର୍ଶଦୀପ ସିଂଙ୍କ ତୃତୀୟ ବଲରେ ସାମ୍ନା କରିଥିଲେ ମାହି । ଏହି ଲୋ ଫୁଲଟସ୍ ବଲରେ ଧୋନି ଲଙ୍ଗ୍ ଅଫରେ ସଟ୍ ଖେଳିବା ମାତ୍ରେ ରନ୍ ନେବାକୁ ବ୍ୟାଟିଂ କ୍ରିଜ୍ ଆଗେଇ ଆସିିଥିଲେ ଡାରେଲ ମିଚେଲ୍ । ତେବେ ଧୋନି କ୍ରିଜ୍ରେ ସେମିତି ଛିଡା ହେବା ସହିତ ରନ ନେବାକୁ ମିଚେଲ ମନା କରିଥିଲେ । ଶେଷରେ ବାଧ୍ୟ ହୋଇ ମିଚେଲ ନିଜ ସ୍ଥାନକୁ ଫେରି ଆସିଥିଲେ । ତେବେ ଧୋନୀ କାହିଁକି ଏପରି କଲେ, ମିଚେଲ ମଧ୍ୟ ଶେଷ ବଲରେ ବଡ଼ ସଟ୍ ଖେଳିବାକୁ ସକ୍ଷମ ବୋଲି ସୋସିଆଲ ମିଡିଆରେ ମତ ରଖିଛନ୍ତି ୟୁଜର୍ସ ।
Kanak News is now on WhatsApp
Join and get latest news updates delivered to you via WhatsApp
ପଂଜାବ ବିପକ୍ଷ ମ୍ୟାଚରେ ଧୋନୀଙ୍କ ଏଭଳି କାର୍ଯ୍ୟକୁ କମେଂଟ୍ରି ସମୟରେ ନାପସନ୍ଦ କରିଛନ୍ତି ପୂର୍ବତନ ଭାରତୀୟ କ୍ରିକେଟର ଇର୍ଫାନ ପଠାନ । ସିଙ୍ଗଲ୍ ରନ୍ ନେବାକୁ ଧୋନୀ ମନା କରିବା ଅନୁଚିତ୍, ଡାରିଲ୍ ମିଚେଲ ମଧ୍ୟ ଜଣେ ଦକ୍ଷ ଖେଳାଳି ହୋଇଥିବା ବେଳେ ପୂର୍ବ ମ୍ୟାଚରେ ୩୨ ବଲରେ ୫୨ ରନର ଦମଦାର ପାରି ଖେଳିଥିଲେ । ସିଏସକେ ମଧ୍ୟ ଆଇପିଏଲ ନିଲାମରେ ମିଚେଲଙ୍କୁ ୧୪ କୋଟି ଟଙ୍କାରେ କ୍ରୟ କରିଛି, ତେଣୁ ଧୋନୀ ଏପରି କରିବା ଠିକ୍ ନୁହେଁ । କେବଳ ଏହି ଘଟଣା ନୁହେଁ, ପୂର୍ବରୁ ୨୦୧୭ ମସିହାରେ ପୁଣେ ରାଇଜିଙ୍ଗ୍ ସୁପର ଜିଆଂଟ୍ସ ପକ୍ଷରୁ ଖେଳୁଥିବା ସମୟରେ ଜାଡେଜାଙ୍କୁ ଧୋନୀ ଏପରି ରନ୍ ଆଉଟ୍ କରିଥିଲେ ବୋଲି କହିଛନ୍ତି ଇର୍ଫାନ ପଠାନ ।