ନାମାଙ୍କନରେ ନାରା ଲଢେଇ: ଜୟ ଜଗନ୍ନାଥ ବନାମ ଜୟ ଶ୍ରୀରାମ
କନକ ବ୍ୟୁରୋ: ନିର୍ବାଚନ ନୁହେଁ ନାମାଙ୍କନରୁ ଦେଖିବାକୁ ମିଳିଲାଣି ଉତେଜନା । ବିଜେପି ଓ ବିଜେଡି କର୍ମୀ ନାରାବାଜି ପ୍ରତିଯୋଗିତାରୁ ଉତେଜନା ବଢି ଧସ୍ତାଧସ୍ତି ଯାଏଁ କଥା ପହଂଚିଥିଲା । ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟରେ ବିଜେପି-ବିଜେଡି ସାଂସଦ ପ୍ରାର୍ଥୀଙ୍କ ନାମାଙ୍କନ ବେଳେ ଦେଖିବାକୁ ମିଳିଥିଲା ଏଭଳି ଦୃଶ୍ୟ । ଅବଶ୍ୟ ପୁଲିସ ହସ୍ତକ୍ଷେପ କରି ଦୁଇ ଦଳର କର୍ମୀଙ୍କୁ ବୁଝାସୁଝା ପରେ ପରିସ୍ଥିତି ଶାନ୍ତ ପଡିଥିଲା । ନାମାଙ୍କନରେ ବିଜେପି- ବିଜେଡି ମଧ୍ୟରେ ଉତେଜନା ପୁଲିସ ପ୍ରଶାସନ ପାଇଁ ସତର୍କ ଘଂଟି ।
Kanak News is now on WhatsApp
Join and get latest news updates delivered to you via WhatsApp
ବନ୍ଧୁ, ସାଙ୍ଗଙ୍କୁ ଦେଖିଲେ ସମ୍ଭାଷଣରୁ ଦେଉଥିବା ଜୟ ଜଗନ୍ନାଥ ହେଉ କି ଜୟ ଶ୍ରୀରାମ ଜୟ ଧ୍ୱନି ଏବେ ରାଜନୈତିକ ନାରା ପାଲଟିଛି । ଆଉ ଚଳିତ ନିର୍ବାଚନରେ ଏହାର ବହୁଳ ବ୍ୟବହାର ଉତେଜନା ମୂଳକ ପରିସ୍ଥିତି ସୃଷ୍ଟି କରୁଛି ।
ନାମାଙ୍କନ ସମୟରେ ନାରାବାଜିକୁ ନେଇ ବିଜେଡି ବିଜେପି ମଧ୍ୟରେ ଉତେଜନା । ବିଜେପି ଓ ବିଜେଡିର ସାଂସଦ ପ୍ରାର୍ଥୀ ନାମାଙ୍କନ ଦାଖଲ ବେଳେ ବାହାରେ ଦୁଇ ଦଳର ସମର୍ଥକଙ୍କ ଗୋଷ୍ଠୀ ମଧ୍ୟରେ ନାରାବାଜିର ଲଢେଇ । ବିଜେଡି ସମର୍ଥକ ଜୟଜଗନ୍ନାଥ ନାରା ଦେଉଥିବା ବେଳେ ବିଜେପି ସମର୍ଥକ ଜୟଶ୍ରୀରାମ ନାରା ଦେଇ କାଉଁଟର କରୁଥିଲେ । ଖାଲି ଏତିକି ନୁହେଁ ବିଜେଡି କର୍ମୀ ଯୋଡି ଶଙ୍ଖ ନାରା ଦେଉଥିବା ବେଳେ ବିଜେପି ସମର୍ଥକ ଯୋଡି ପଦ୍ମ ନାରା ଦେଉଥିଲେ । ଯାହାକୁ ନେଇ ଉତେଜନାମୂଳକ ବଢିଥିଲା ଆଉ ଦୁଇ ଦଳର ସମର୍ଥକ ଗୋଷ୍ଠୀଙ୍କ ମଧ୍ୟରେ ହାତାହାତି ଯାଏଁ କଥା ପହଂଚିଥିଲା ।
ବିରାଟ ପଟୁଆର ଓ ହଜାର ହଜାର ସମର୍ଥକ କର୍ମୀଙ୍କୁ ସାଙ୍ଗରେ ନେଇ ବିଜେଡି ସାଂସଦ ପ୍ରାର୍ଥୀ ମନ୍ମଥ ରାଉତରାୟ ନାମାଙ୍କନ ଦାଖଲ କରିବାକୁ ପହଂଚିଥିଲେ । ପରେ ବିଶାଳ ରାଲି କରି ହଜାର ହଜାର ସମର୍ଥକ, କର୍ମୀଙ୍କ ସହ ପହଂଚିଥିଲେ ଅପରାଜିତା ଷଡଙ୍ଗୀ । ଦୁଇ ଦଳର ପ୍ରାର୍ଥୀ ନାମାଙ୍କନ ଦାଖଲ ପାଇଁ କାର୍ଯ୍ୟାଳୟକୁ ଯିବା ପରେ ଆରମ୍ଭ ହୋଇଥିଲା ନାରାବାଜିର ଲଢେଇ । ଯାହା ପ୍ରାୟ ଏକଘଂଟା ଧରି ଚାଲିଥିଲା ।ଉତେଜନା ବଢୁଥିଲେ ମଧ୍ୟ ସମର୍ଥକଙ୍କୁ ନିୟନ୍ତ୍ରଣ କରିବାକୁ ଆବଶ୍ୟକ ସଂଖ୍ୟା ବଳ ନଥିବାରୁ ଚୁପ ରହିଥିଲା ଉପସ୍ଥିତି ପୁଲିସ । ପରେ ଖୋର୍ଦ୍ଧା ଏସପି ଅଧିକ ଫୋର୍ସ ମଗାଇ ପରିସ୍ଥିତିକୁ ନିୟନ୍ତ୍ରଣ କରିଥିଲେ । ସେପଟେ ଏଭଳି ପରିସ୍ଥିତି ପାଇଁ ଉପସ୍ଥିତ ଥିବା ପୁଲିସ ଅଧିକାରୀଙ୍କୁ ଦାୟୀ କରିଛନ୍ତି ପୂର୍ବତନ ପୁଲିସ ଡିଜି ।
ଦୁଇ ଦିନ ତଳେ ପୁରୀରେ ମଧ୍ୟ ଦେଖିବାକୁ ମିଳିଥିଲା ସମାନ ଦୃଶ୍ୟ । ବିଜେପି ସାଂସଦ ପ୍ରାର୍ଥୀ ସମ୍ବିତ ପାତ୍ର ନାମାଙ୍କନ କରିବାକୁ ଆସିଥିବା ବେଳେ ପ୍ରାର୍ଥୀପତ୍ର ଦାଖଲ କରିବାକୁ ପହଂଚିଥିଲେ ବିଜେଡି ବିଧାୟକ ପ୍ରାର୍ଥୀ ସଂଜୟ ଦାସ ବର୍ମା । ସେଠାରେ ଦୁଇ ଦଳର କର୍ମୀଙ୍କ ମଧ୍ୟରେ ଜୟ ଜଗନ୍ନାଥ ଓ ଜୟଶ୍ରୀରାମ ନାରା ଜୋରସୋରରେ ଦେବାରୁ ଉତେଜନା ପରିସ୍ଥିତି ସୃଷ୍ଟି ହୋଇଥିଲା ।