ପ୍ରଣବ ପ୍ରକାଶଙ୍କ ମା’ଙ୍କୁ ପ୍ରାର୍ଥୀ କଲା ବିଜେଡି । କିନ୍ତୁ କୋରେଇରୁ କାହିଁକି ମୈଦାନକୁ ଓହ୍ଲାଇଲା ଦଳ?
କନକ ବ୍ୟୁରୋ : ଶେଷ ପର୍ଯ୍ୟାୟ ପ୍ରାର୍ଥୀ ଘୋଷଣା କରିଛି ବିଜେଡି । ବଳକା ୩ ଆସନ ପାଇଁ ବିଜେଡି ପ୍ରାର୍ଥୀ ଘୋଷଣା କରିଛି । ତେବେ କୋରେଇ ଆସନରେ ସରପ୍ରାଇଜ କାର୍ଡ ଖେଳିଛନ୍ତି ବିଜେଡି ସୁପ୍ରିମୋ । ସନ୍ଧ୍ୟାରାଣୀ ଦାସଙ୍କୁ ଏହି ଆସନରୁ ମୈଦାନକୁ ଓହ୍ଲାଇଛି ଦଳ । ତେବେ ଅନେକଙ୍କ ପାଇଁ ଅଜଣା ଓ ଅଚିହ୍ନା ଥିବା ସନ୍ଧ୍ୟାରାଣୀ କିଏ ବୋଲି ଅନେକଙ୍କ ମନରେ ପ୍ରଶ୍ନ ଉଠିଥିଲା । କିନ୍ତୁ ପ୍ରାର୍ଥୀ ଘୋଷଣାର କିଛି ସମୟ ମଧ୍ୟରେ ହିଁ ସନ୍ଧ୍ୟାରାଣୀଙ୍କ ପରିଚୟ ସାମ୍ନାକୁ ଆସିଥିଲା ।
Kanak News is now on WhatsApp
Join and get latest news updates delivered to you via WhatsApp
କୋରେଇ ଆସନରୁ ପ୍ରାର୍ଥୀ ହୋଇଥିବା ସନ୍ଧ୍ୟାରାଣୀ ଦାସ ହେଉଛନ୍ତି ବିଜେଡି ସାଙ୍ଗଠନିକ ସମ୍ପାଦକ ତଥା ସମ୍ବଲପୁର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସଙ୍କ ମା’ । ସନ୍ଧ୍ୟାରାଣୀଙ୍କ ଅନ୍ୟ ଏକ ପରିଚୟ ହେଲା, ଓଡ଼ିଶା ରାଜନୀତିର ଟାଣୁଆ ଦିବଙ୍ଗତ ଅଶୋକ ଦାସଙ୍କ ପତ୍ନୀ । ତେବେ ହଠାତ୍ କୋରେଇ ଆସନରୁ ସନ୍ଧ୍ୟାରାଣୀଙ୍କୁ ବିଜେଡି ପ୍ରାର୍ଥୀ କରିବା ପଛର କାରଣ କଣ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।
୨୦୨୪ ନିର୍ବାଚନ ପୂର୍ବରୁ କୋରେଇ ଆସନ ପାଇଁ ବିଜେଡିରୁ ଅନେକ ଦାବିଦାର ରହିଥିଲେ । କିନ୍ତୁ ଟିକେଟ ନ ମିଳିବା ଜାଣିବା ପରେ ବିଜେଡିରୁ ଇସ୍ତଫା ଦେଇ ବିଜେପିରେ ସାମିଲ ହୋଇ ଟିକେଟ ହାତେଇଥିଲେ ପୂର୍ବତନ ବିଧାୟକ ଆକାଶ ଦାସ ନାୟକ । ସେହିଭଳି କୋରେଇ ବିଧାୟକ ଅଶୋକ ବଳ ମଧ୍ୟ ଏହି ଆସନରୁ ଲଢିବାକୁ ଦାବିଦାର ଥିଲେ । ଅନ୍ୟପଟେ କୋରେଇ ଆସନରେ ପୂର୍ବରୁ ଘଡେଇ ପରିବାରର ଦବଦବା ଥିଲା । ତେଣୁ ଏହି ଆସନରୁ ପ୍ରାର୍ଥୀ ହେବାକୁ ଇଚ୍ଛା ପ୍ରକାଶ କରିଥିଲେ ପ୍ରୀତିରଞ୍ଜନ ଘଡାଇଙ୍କ ସ୍ତ୍ରୀ ତଥା ପ୍ରଫୁଲ୍ଲ ଘଡାଇଙ୍କ ବୋହୂ ଝିଲିକ୍ ଭଟ୍ଟାଚାର୍ଯ୍ୟ । ଏପରିକି ମୁଖ୍ୟମନ୍ତ୍ରୀ ସୁଯୋଗ ଦେଲେ ଲଢିବାକୁ ଆଗ୍ରହୀ ବୋଲି କହିଥିଲେ ଝିଲିକ୍ । ଏଭଳି ଏକ ରୋଚକ ସ୍ଥିତି ଭିତରେ କୋରେଇରୁ ପ୍ରାର୍ଥୀ ହୋଇଛନ୍ତି ସନ୍ଧ୍ୟାରାଣୀ । କୋରେଇରୁ ସନ୍ଧ୍ୟାରାଣୀଙ୍କୁ ବିଜେଡି ପ୍ରାର୍ଥୀ କରିବା ପଛର ବଡ କାରଣ ହେଉଛି, ଏହି ଆସନରୁ ପୂର୍ବରୁ ଦିବଙ୍ଗତ ସ୍ୱାମୀ ଅଶୋକ ଦାସ ନିର୍ବାଚନ ଲଢିବା ସହ ବିଜୟୀ ହୋଇଥିଲେ । ତେଣୁ ଏହି ଆସନରେ ଅଶୋକଙ୍କ ନାଁରେ ଏକ ଭୋଟବ୍ୟାଙ୍କ ମଧ୍ୟ ରହିଛି । ଯାହାକୁ ଆଧାର କରି ସନ୍ଧ୍ୟାରାଣୀଙ୍କୁ ଟିକେଟ ଦିଆଯାଇଥିବା ଚର୍ଚ୍ଚା ହେଉଛି । ଦଳରେ ଯେପରି ଅସନ୍ତୋଷ ସୃଷ୍ଟି ନହେବ ସେଥିପାଇଁ ସନ୍ଧ୍ୟାରାଣୀଙ୍କ କାର୍ଡ ଖେଳିଛନ୍ତି ବିଜେଡି ସୁପ୍ରିମୋ । ଅନ୍ୟପଟେ ଚଳିତଥର ପ୍ରଣବ ପ୍ରକାଶ ସମ୍ବଲପୁର ଲୋକସଭା ଆସନରେ ନିର୍ବାଚନ ଲଢୁଛନ୍ତି । ତେଣୁ ଯାଜପୁର ଜିଲ୍ଲା ସଙ୍ଗଠନ ଯେପରି ହାତରୁ ଖସିନଯାଏ ତେଣୁ ନିଜ ପରିବାରରୁ ଜଣକୁ ପ୍ରାର୍ଥୀ କରିଥିବା ଚର୍ଚ୍ଚା ହେଉଛି ।