ଦେବଗଡରେ କାହିଁକି କଟିଲା ଅରୁନ୍ଧତୀ ଦେବୀଙ୍କ ଟିକେଟ୍? କାହିଁକି ପ୍ରାର୍ଥୀ ପରିବର୍ତ୍ତନ କଲା ବିଜେଡି?
କନକ ବ୍ୟୁରୋ: ଦେବଗଡରେ କାହିଁକି ପ୍ରାର୍ଥୀ ବଦଳାଇଲା ବିଜେଡି? କାହିଁକି କଟିଗଲା ଅରୁନ୍ଧତୀ ଦେବୀଙ୍କ ଟିକେଟ୍? ଗୁରୁବାର ବିଜେଡିର ଶେଷ ପର୍ଯ୍ୟାୟ ପ୍ରାର୍ଥୀ ଘୋଷଣା ହେବା ପରେ ଏହି ଚର୍ଚ୍ଚା ଏବେ ଜୋର ଧରିଛି । କାହିଁକି ନା, ସମ୍ବଲପୁର ବିଜେପି ସାଂସଦ ନୀତେଶ ଗଙ୍ଗଦେବଙ୍କ ପତ୍ନୀ ଅରୁନ୍ଧତୀ ଦେବୀ; ଯିଏକି ନିକଟରେ ବିଜେଡିରେ ସାମିଲ ହେଇଥିଲେ, ତାଙ୍କୁ ଟିକେଟ୍ ଦେଇ ପୁଣି ଟିକେଟ୍ କାଟିଦେଇଛି ବିଜୁ ଜନତା ଦଳ । ଏହାବଦଳରେ ଦଳ ସ୍ଥାନୀୟ ନେତା ରୋମାଞ୍ଚ ରଞ୍ଜନ ବିଶ୍ୱାଳଙ୍କୁ ପୁଣିଥରେ ଭରସା କରିଛି ।
Kanak News is now on WhatsApp
Join and get latest news updates delivered to you via WhatsApp
ଦେବଗଡରେ ବିଜୁ ଜନତା ଦଳ ପ୍ରଥମେ ଦେବଗଡର ରାଣୀ ତଥା ବିଜେପି ସାଂସଦ ନୀତେଶ ଗଙ୍ଗଦେବଙ୍କ ପତ୍ନୀ ଅରୁନ୍ଧତୀ ଦେବୀଙ୍କୁ ଟିକେଟ୍ ଦେଇଥିଲା । ଅରୁନ୍ଧତୀଙ୍କୁ ଟିକେଟ୍ ଦେଇ ବଡ ଚାଲ୍ ଖେଳିଥିଲା ବିଜୁ ଜନତା ଦଳ । ହେଲେ ସେହି ଚାଲ୍ କିନ୍ତୁ ବିଜେଡିର ସଫଳ ହେଇନଥିଲା । ଅରୁନ୍ଧତୀ ଦେବୀଙ୍କୁ ଟିକେଟ୍ ମିଳିବା ପରେ ରୋମାଞ୍ଚ ରଞ୍ଜନ ବିଶ୍ୱାଳଙ୍କ ସମର୍ଥକମାନେ ତାଙ୍କୁ ସମର୍ଥନ ଦେଇନଥିଲେ । ଏପରିକି ଅନେକ ସମୟରେ ତାଙ୍କୁ ଗ୍ରାଉଣ୍ଡ ଜିରୋରେ ବିରୋଧରେ ସାମ୍ନା କରିବାକୁ ପଡିଥିଲା ।
ଅନ୍ୟପଟେ ଅରୁନ୍ଧତୀ ଦେବୀ ବିଜେଡିରେ ସାମିଲ ହେବା ପରେ ବିଜେପି ସାଂସଦ ନୀତେଶ ଗଙ୍ଗଦେବ ମଧ୍ୟ ଚଳିତ ନିର୍ବାଚନରେ ବିଜେଡିକୁ ସମର୍ଥନ ଦେବେ ବୋଲି କୁହାଯାଉଥିଲା । ହେଲେ ନୀତେଶଙ୍କ ସମର୍ଥନ ମଧ୍ୟ ଅରୁନ୍ଧତୀ ଦେବୀଙ୍କୁ ମିଳିନଥିଲା । ଏପରିକି ସୋସିଆଲ୍ ମିଡିଆରେ ନୀତେଶ ବିଜେପି ଛାଡିଥିବା ନେଇ ପୋଷ୍ଟ ସେୟାର କରିବା ସହ, ପରେ ତାଙ୍କର ସୋସିଆଲ୍ ମିଡିଆ ଆଇଡି ହ୍ୟାକ୍ ହେଇଥିଲା ବୋଲି ସ୍ପଷ୍ଟୋକ୍ତି ରଖିଥିଲେ । ଯାହା ପରେ ରାଜପରିବାର ଭିତରେ ସବୁକିଛି ଠିକ୍ ନଥିବା ସ୍ପଷ୍ଟ ହେଇଥିଲା । ତେଣୁ ଉପରୋକ୍ତ କଥା ସବୁକୁ ଦୃଷ୍ଟିରେ ରଖି ଦେବଗଡରେ ପ୍ରାର୍ଥୀ ବଦଳାଇଛି ବିଜେଡି ।
ଦେବଗଡରେ ଏବେ ବିଜେଡି ରୋମାଞ୍ଚ ରଞ୍ଜନ ବିଶ୍ୱାଳଙ୍କୁ ପ୍ରାର୍ଥୀ କରିଛି । ଏହି ଆସନରେ ସେ ଗତଥର ମଧ୍ୟ ନିର୍ବାଚନ ଲଢିଥିଲେ । ୨୦୧୯ରେ ଏହି ଆସନରୁ ସେ ବିଜେପି ପ୍ରାର୍ଥୀ ସୁବାସ ପାଣିଗ୍ରାହୀଙ୍କ ଠାରୁ ଅଳ୍ପ ବ୍ୟବଧାନରେ ହାରିଯାଇଥିଲେ । ହେଲେ ଏହାପରେ ମଧ୍ୟ ପୌର ଓ ପଞ୍ଚାୟତ ନିର୍ବାଚନରେ ବିଜେଡିକୁ ସଫଳତା ଦେବାରେ ସେ ପ୍ରମୁଖ ଭୂମିକା ଗ୍ରହଣ କରିଥିଲେ । ତେଣୁ ସାଧାରଣ ନିର୍ବାଚନରେ ପୁଣିଥରେ ରୋମାଞ୍ଚ ବିଶ୍ୱାଳଙ୍କ ଉପରେ ଦଳ ଆସ୍ଥା ପ୍ରକଟ କରିବା ସହିତ, ଦେବଗଡ ଦାୟିତ୍ୱ ଦେଇଛି ।