ଯାଜପୁର ବ୍ୟାସନଗରରେ ଗହଣା ଦୋକାନରୁ ଲୁଟ୍ ଘଟଣା । ୩ ଲୁଟେରାଙ୍କ ଫଟୋ ଜାରି କଲା ପୋଲିସ ।
କନକ ବ୍ୟୁରୋ: ବ୍ୟାସନଗର ଗହଣା ଦୋକାନ୍ ଲୁଟ୍ ଘଟଣାରେ ସମ୍ପୃକ୍ତ ୩ ଲୁଟେରାଙ୍କ ଫଟୋ ଜାରି କରିଛି ପୋଲିସ । ୭ ଜଣ ଲୁଟେରାଙ୍କ ମଧ୍ୟରୁ ୩ ଜଣଙ୍କୁ ଚିହ୍ନଟ କରିଛି ପୋଲିସ । ଯାଜପୁର ବ୍ୟାସନଗର ସହରରେ ସେନକୋ ଗୋଲ୍ଡ ସୋରୁମରୁ ଦିନ ଦ୍ୱିପ୍ରହରରେ ସଶସ୍ତ୍ର ଡକାୟତି ହୋଇଥିଲା । ଏହାପରେ ଡକାୟତଙ୍କୁ ଧରିବା ଏବଂ ସୁନା ବ୍ୟବସାୟୀଙ୍କୁ ସୁରକ୍ଷା ଦେବା ପୋଲିସ୍ ପାଇଁ ବଡ ଚ୍ୟାଲେଞ୍ଜ ଠିଆ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ଯାଜପୁରର ଏସପିଙ୍କ ନେତୃତ୍ୱରେ ବିଭିନ୍ନ ଟିମ୍ ଗଠନ କରାଯାଇ ବିଭିନ୍ନ ଅଞ୍ଚଳରେ ପୋଲିସର ଛାନଭିନ ଜାରି ରହିଛି । ଏହାରି ଭିତରେ ଲୁଟେରାଙ୍କ ଫଟୋ ଜାରି କରିଛି ଯାଜପୁର ପୁଲିସ । ସୁନା ଦୋକାନୀ ଲୁଟ୍ ଘଟଣାରେ ଏହି ୩ ଜଣଙ୍କ ସଂପୃକ୍ତି ରହିଛି । ଏମାନଙ୍କ ବାବଦରେ କୌଣସି ସୂଚନା ପାଇଲେ ପୁଲିସକୁ ଜଣାଇବା ପାଇଁ ଦୁଇଟି ଫୋନ ନମ୍ବର ଦିଆଯାଇଛି । ଡକାୟତମାନେ ପ୍ରମାଣ ନଷ୍ଟ କରିବାକୁ ଉଦ୍ୟମ କରି ସିସିଟିଭି କ୍ୟାମେରା ଓ କମ୍ପ୍ୟୁଟର ହାର୍ଡଡିସ ଗୁଡିକ ଖୋଲିନେଇଥିଲେ । ମାତ୍ର ଗୋଟିଏ ହାର୍ଡଡିସ୍ ସୁରକ୍ଷିତ ଥିବାରୁ ତାହାକୁ ଆଧାର କରି ଯାଞ୍ଚ କରୁଛି ପୋଲିସ । ଯେଉଁଥିରୁ ଏହି ଡକାୟତି ଘଟଣା ସମ୍ପର୍କରେ କିଛି ତଥ୍ୟ ପୋଲିସର ହସ୍ତଗତ ହୋଇଛି ।
ସେପଟେ ଖୁବଶୀଘ୍ର ପୋଲିସ ଡକାୟତମାନଙ୍କୁ ଠାବ କରି ଗିରଫ୍ କରିପାରିବ ବୋଲି ଯାଜପୁର ଏସପି ଭିନିତ୍ ଅଗ୍ରୱାଲ ଦୃଢୋକ୍ତି ପ୍ରକାଶ କରିଛନ୍ତି । ଏହି ଡକାୟତ ମାନେ ଡକାୟତି କରୁଥିବା ବେଳେ ହିନ୍ଦୀରେ କଥାବାର୍ତା କରୁଥିଲେ । ଏମାନେ ଆନ୍ତଃରାଜ୍ୟ ଡକାୟତ ବୋଲି ପୋଲିସ ସନ୍ଦେହ କରୁଥିବାରୁ ସେମାନଙ୍କୁ ଠାବ କରିବା ପୋଲିସ ପାଇଁ ବଡ ଚ୍ୟାଲେଞ୍ଜ ହୋଇଛି । ଡକାୟତ ମାନେ ଡକାୟତି ପରେ ଯେଉଁଯେଉଁ ରାସ୍ତା ଦେଇ ଯାଇଥିଲେ ତାହାର ଅନୁସନ୍ଧାନ ଜାରିରଖିଛି ପୋଲିସ୍ ।