କନକ ବ୍ୟୁରୋ: ଭରସାର ସହ ଯେଉଁଠି ଚିକିତ୍ସା ପାଇଁ ଭର୍ତ୍ତି ହୋଇଥିଲି ସେଠାରୁ ଚୋରୀ ହୋଇଗଲା କିଡନୀ । ଯେଉଁ ସ୍ୱାମୀ ସୁଖଦୁଃଖରେ ସାଥିରେ ରହିବାର ଭରସା ଦେଇଥିଲା ମଝି ରାସ୍ତାରେ ଛାଡି ସେ କେଉଁଆଡେ ଚାଲିଗଲା । ପାଖରେ ତିନି ତିନିଟି କଅଁଳ ଛୁଆ କେମିତି ତାଙ୍କୁ ନେଇ ଚଳିବି । ମନରେ ଥିବା କୋହକୁ ଏମିତି କିଛି ବୟାନ କରୁଛନ୍ତି ସୁନୀତା । ଆଗରୁ ମୂଲମଜୁରୀ କରି ଘର ଚଳାଉଥିଲି, ଏବେ ଡାକ୍ତରଖାନାରେ ଭର୍ତ୍ତି ହୋଇ ମୃତ୍ୟୁର ଦିନ ଗଣିଚାଲିଛି । ଜାଣିନି କେତେ ଦିନ ଆଉ ବଞ୍ଚିବି । ହେଲେ ମୋର ଭୁଲ କଣ? ମୋ ପରେ ମୋ ପିଲାଙ୍କ ଭବିଷ୍ୟତ ହେବ କଣ?
Kanak News is now on WhatsApp
Join and get latest news updates delivered to you via WhatsApp
ସତରେ ସୁନିତାଙ୍କ ଏହି ପ୍ରଶ୍ନର ଉତ୍ତର କାହା ପାଖରେ ନାହିଁ । ବିହାର ମୁଜଫରପୁରର ଏକ ଡାକ୍ତରଖାନାରେ ଭର୍ତ୍ତି ହୋଇଥିବା ସୁନିତାଙ୍କ ଏ ସବୁ ପ୍ରଶ୍ନ ପଚାରି କେବଳ କାନ୍ଦୁଛନ୍ତି । ୟୁଟେରସରେ ସଂକ୍ରମଣ ପରେ ସୁନୀତା ଏକ ନର୍ସିଂ ହୋମରେ ଭର୍ତ୍ତି ହୋଇଥିଲେ । ତେବେ ସେଠାରେ ଚିକିତ୍ସା କରୁଥିବା ଡାକ୍ତର ତାଙ୍କ ଦୁଇ କିଡନୀ ନେଇ ଫେରାର ହୋଇଯାଇଛି । ସୁନୀତାଙ୍କ ଚିକିତ୍ସା ଏସକେ ମେଡିକାଲ କଲେଜରେ ଜାରିରହିଛି । ଦିନକୁ ଦିନ ତାଙ୍କ ସ୍ଥିତି ବିଗିଡିବାରେ ଲାଗିଛି । ପ୍ରତ୍ୟେକ ଦୁଇ ଦିନରେ ଥରେ ତାଙ୍କର ଡାୟାଲିସିଲ ଜାରିରହିଛି । ଅନେକ ଲୋକ ତାଙ୍କୁ କିଡନୀ ଦେବା ପାଇଁ ପ୍ରସ୍ତୁତ ଥିଲେ ବି କିଡନୀ ମ୍ୟାଚ ହେଉନଥିବା କାରଣରୁ ପ୍ରତିରୋପଣରେ ସମସ୍ୟା ଦେଖାଦେଉଛି ।
ସୁନୀତା ମଜଫରପୁର ବରିଆରପୁର ଚୌକ ନିକଟରେ ଥିବା ଘରୋଇ କ୍ଲିନିକରେ ସେପ୍ଟେମ୍ବର ୩ତାରିଖରେ ଭର୍ତ୍ତି ହୋଇଥିଲେ । ସୁନୀତାଙ୍କୁ ୟୁଟେରସରେ ଅପରେସନ ବଦଳରେ ନକଲି ଡାକ୍ତର ତାଙ୍କର ଦୁଇଟି ଯାକ କିଡନୀ ବାହାର କରିନେଇଥିଲେ । ଯେତେବେଳେ ମହିଳାଙ୍କ ସ୍ଥିତି ସଙ୍କଟାପନ୍ନ ହୋଇଥିଲା ସେତେବେଳେ କ୍ଲିନିକର ସଞ୍ଚାଳକ ତଥା ଡାକ୍ତର ପବନ ତାଙ୍କୁ ପାଟନାରେ ଥିବା ଏକ ନର୍ସିଂହୋମରେ ଭର୍ତ୍ତି କରି ସେଠାରୁ ଫେରାର ହୋଇଯାଇଥିଲେ । ଡାକ୍ତର ମହିଳାଙ୍କ ଅଜାଣତରେ ଏଭଳି କରିଦେଇଥିଲେ । ତେବେ ପରେ ପୋଲିସ ପବନକୁ ଗିରଫ କରିଛି ।
ସୁନୀତାଙ୍କ ୩ଶିଶୁ ମାଁଙ୍କ ସ୍ଥିତି ଦେଖି ଚିନ୍ତାରେ ରହିଛନ୍ତି । ସୁନୀତାଙ୍କୁ ଯେ କେହିବି ଦେଖିବାକୁ ଆସୁଛନ୍ତି ସେ ତାଙ୍କୁ ପ୍ରଶ୍ନ କରୁଛନ୍ତି ଏମାନଙ୍କର ଭୁଲ କଣ । ମୋ ପରେ ଏମାନଙ୍କ ଅବସ୍ଥା କଣ ହେବ? କିଛି ଦିନ ଯାଏ ସୁନୀତାଙ୍କ ସ୍ୱାମୀ ଅକଲୁ ରାମ ତାଙ୍କ ସହ ରହୁଥିଲେ । ସେ କିଡନୀ ଦେବା ପାଇଁ ପ୍ରସ୍ତୁତ ଥିଲେ । ତେବେ ତାଙ୍କ କିଡନୀ ମ୍ୟାଚ ହୋଇନଥିଲା । ଏହା ପରେ କୌଣସି କଥାକୁ ନେଇ ଝଗଡା ହୋଇଯାଇଥିଲା । ପରେ ସେ ପିଲାମାନଙ୍କୁ ଆଉ ସ୍ତ୍ରୀକୁ ଛାଡି ସେଠାରୁ ଚାଲିଯାଇଥିଲେ । ଯାଉ ଯାଉ ସେ ଏହା ବି କହିଯାଇଥିଲେ ତୁ ମୋ ଜୀବନକୁ ଆଉ ଚଳାଇପାରିବୁ ନାହିଁ । ଏଥିପାଇଁ ମୁଁ ଚାଲିଯାଉଛି । ଏହି କଥା କହିବା ବେଳେ ସୁନୀତାଙ୍କ ଆଖିରୁ ଠପ୍ ଠପ୍ ଲୁହ ଝରିଆସିଥିଲା ।