୨୨ ବର୍ଷର ଅପେକ୍ଷା ପରେ ‘କେବିସି’ ହଟସିଟରେ ପହଞ୍ଚିଲେ ସତ୍ୟନାରାୟଣ । କହିଲେ, ଅମିତାଭଙ୍କୁ ଭେଟିବା ଥିଲା ସ୍ୱପ୍ନ, ଯାହା ଏବେ ସତ ହେଇଛି ।
କନକ ବ୍ୟୁରୋ: ‘‘କୌନ ବନେଗା କରୋଡପତିରେ ପହଞ୍ଚିବାକୁ ମୁଁ ୨୨ ବର୍ଷ ୧ ମାସ ୯ ଦିନ ଅପେକ୍ଷା କରିଛି । ମୋର ଆଜି ବି ମନେ ଅଛି, ମୁଁ ଯେତେବେଳେ ମୁମ୍ବାଇରେ ମୋ କଲେଜ ପାଠପଢା ଜାରି ରଖିଥିଲି । ସେତେବେଳେ ପ୍ରତି ରବିବାର ଅମିତାଭ ବଚ୍ଚନ ତାଙ୍କ ବାଲକୋନିକୁ ଆସି ତାଙ୍କ ଫ୍ୟାନ୍ସଙ୍କୁ ଦେଖା ଦେଉଥିଲେ । ହେଲେ ଅନେକ ଚେଷ୍ଟା ପରେ ବି ମୁଁ ଅମିତାଭଙ୍କୁ ଦେଖିପାରିନଥିଲି । ଆଉ ଏବେ କେବିସି ସାହାଯ୍ୟରେ ସେହି ସ୍ୱପ୍ନ ସତ ହୋଇଛି’’, ଲୋକପ୍ରିୟ ଟେଲିଭିଜନ ରିଆଲିଟି ଶୋ’ କୌନ ବନେଗା କରୋଡପତିରେ ଭାଗ ନେଇ ଜଣେ ପ୍ରତିଯୋଗୀ ତାଙ୍କ ଜୀବନର ଏହି କୌତୁହଳ କଥାକୁ ସମସ୍ତଙ୍କ ସାମ୍ନାକୁ ଆଣିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅସଲ କଥା ହେଉଛି, ସୋନୀ ଟିଭିରେ ଏବେ ଅମିତାଭ ବଚ୍ଚନଙ୍କ ଦ୍ୱାରା ଉପସ୍ଥାପିତ ହେଉଥିବା ମେଗା ରିଆଲିଟି ଶୋ’ କୌନ ବନେଗା କରୋଡପତି ପ୍ରସାରିତ ହେଉଛି । ଯେଉଁଥିରେ ବେଙ୍ଗାଲୁରୁ ସହରର ଜଣେ ବ୍ୟାଙ୍କ୍ ଅଫିସର ସତ୍ୟନାରାୟଣ ସୁବାରାୟା ଯୋଗ ଦେଇଥିଲେ । ତେବେ ହଟସିଟକୁ ଆସିବା ପରେ ସେ ଅମିତାଭ ବଚ୍ଚନ, କେବିସି ଓ ତାଙ୍କ ଜୀବନକୁ ନେଇ ଯେଉଁ କଥା କହିଥିଲେ ତାହା ଅନେକଙ୍କୁ ଆଶ୍ଚଯ୍ୟ କରିଥିଲା ।
କେବିସି ହଟସିଟରେ ପହଞ୍ଚିବାକୁ ସେ ଦୀର୍ଘ ୨୨ ବର୍ଷରୁ ଅଧିକ ସମୟ ଧରି ଅପେକ୍ଷା କରିଥିବା କହିଥିଲେ । ଖାସ୍ କରି ନିଜ ପ୍ରିୟ ଅଭିନେତା ଅମିତାଭ ବଚ୍ଚନଙ୍କୁ ପାଖରେ ପାଇଁ ତାଙ୍କ କଲେଜ ଦିନର ଅଧୁରା ସ୍ୱପ୍ନ ପୂରଣ ହୋଇଥିବା ସେ କହିଛନ୍ତି । ଖାଲି ସେତିକି ନୁହେଁ ସେ ଆହୁରି ମଧ୍ୟ କହିଛନ୍ତି ଯେ, କୌନ ବନେଗା କୋରଡପତି ଆରମ୍ଭ ହେବା ଦିନରୁ ସେ ଏହି ଶୋ ଦେଖୁଛନ୍ତି । ଆଉ କେବିସି ଆରମ୍ଭ ହେବା ଦିନରୁ ସେ ଏହି ଶୋ’ରେ ଅଂଶଗ୍ରହଣ କରିବାକୁ ଆଶା ବାନ୍ଧି ବସିଥିଲେ । ଯାହା ଏବେ ସତ ହେଇଛି ।
ସୂଚନାଯୋଗ୍ୟ ଯେ, କୌନ୍ ବନେଗା କରୋଡପତି ଶୋ’ ସୋନୀ ଟିଭି ସହ ଓଟିଟି ପ୍ଲାଟଫର୍ମ ସୋନିଲିଭରେ ପ୍ରସାରିତ ହେଉଛି । ଯେଉଁଥିରେ ଉପସ୍ଥାପକ ଅମିତାଭ ବଚ୍ଚନ ପ୍ରତିଯୋଗୀଙ୍କୁ ପ୍ରଶ୍ନ ପଚାରିବା ସହିତ କୋଟିପତି ହେବାର ସୁଯୋଗ ଦେଇଥାନ୍ତି ।