କଚାତିବୁ ଦ୍ୱୀପ ବିବାଦକୁ ନେଇ ମୁହଁ ଖୋଲିଲା ଶ୍ରୀଲଙ୍କା । କହିଲା, ଭାରତରେ ଆଭ୍ୟନ୍ତରୀଣ ବିତର୍କ ଚାଲିଛି, ଏନେଇ କଲମ୍ବୋ ସହ ହୋଇନି କୌଣସି ଆଲୋଚନା
କନକ ବ୍ୟୁରୋ : କଚାତିବୁ ଦ୍ୱୀପକୁ ନେଇ ବିବାଦ ବଢ଼ୁଥିବା ବେଳେ ଶ୍ରୀଲଙ୍କା ମୁହଁ ଖୋଲିଛି । ଶ୍ରୀଲଙ୍କା ବୈଦେଶିକ ମନ୍ତ୍ରୀ ଅଲି ସାବ୍ରି ପ୍ରତିକ୍ରିୟା ରଖି କହିଛନ୍ତି ଯେ, “କୌଣସି ବିବାଦ ନାହିଁ, ବରଂ ଭାରତରେ ଏନେଇ ଏକ ଆଭ୍ୟନ୍ତରୀଣ ବିତର୍କ ଚାଲିଛି । ଏହାକୁ ଛାଡ଼ିଲେ, କାଚାତିବୁ ଉପରେ କେହି ଅଧିକାର ଜାହିର କରୁନାହାନ୍ତି’ । ଶ୍ରୀଲଙ୍କାର ଜଳଯୋଗାଣ ମନ୍ତ୍ରୀ ଜୀବନ ଥୋଣ୍ଡାମାନ ମଧ୍ୟ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, “କଚାତିବୁ ଦ୍ୱୀପ ଶ୍ରୀଲଙ୍କାର ସୀମା ଭିତରେ ପଡ଼ୁଛି । ଶ୍ରୀଲଙ୍କର ସହ ମୋଦୀ ସରକାରଙ୍କ ସମ୍ପର୍କ ଭଲ । କଚାତିବୁ ଦ୍ୱୀପର ଅଧିକାର ଫେରାଇବା ନେଇ ଭାରତ ପକ୍ଷରୁ କୌଣସି ଆନୁଷ୍ଠାନିକ ପ୍ରସ୍ତାବ ଆସି ନାହିଁ । ଯଦି ଭାରତ ପକ୍ଷରୁ କୌଣସି ପ୍ରସ୍ତାବ ଆସେ, ଏହାପରେ ଏହାର ଉତର ରଖାଯିବ’
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ମୋଦୀ ଏହି ପ୍ରସଙ୍ଗ ଉଠାଇବା ପରଠୁ ବିବାଦ ବଢ଼ିଛି । ବିଜେପି ସେତେବେଳର ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଓ ତାମିଲନାଡୁ ମୁଖ୍ୟମନ୍ତ୍ରୀ କରୁଣାନିଧିଙ୍କ ନିଷ୍ପତିକୁ ନେଇ ପ୍ରଶ୍ନ ଉଠାଇଛି । ସେପଟେ କଂଗ୍ରେସ ଓ ଡିଏମକେ ମୋଦୀ ସରକାରକୁ ସମାଲୋଚନା କରିଛି । ରାଜନୈତିକ ଫାଇଦା ଉଠାଇବାକୁ ବିଜେପି ଏବେ ଏହି ପ୍ରସଙ୍ଗ ଉଠାଉଥିବା କଂଗ୍ରେସ ଅଭିଯୋଗ କରିଛି । ସେପଟେ ଡିଏମକେ ମୁଖ୍ୟ ତଥା ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନ କହିଛନ୍ତି, “ମୋଦୀ ସରକାରକୁ ଏବେ କାହିଁ ଏହି ପ୍ରସଙ୍ଗ ମନେପଡ଼ିଲା । ୧୦ ବର୍ଷ ହେଲା ମୋଦୀ ସରକାର କରୁଥିଲେ କ’ଣ? ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ୍ ବୈଦେଶିକମନ୍ତ୍ରୀ ଜୟଶଙ୍କରଙ୍କୁ ସମାଲୋଚନା କରିଥିବା ବେଳେ ସେ ଏହାର ଜବାବ ରଖିଛନ୍ତି ।
ଭାରତ ଓ ଶ୍ରୀଲଙ୍କା ମଧ୍ୟରେ ଏହି ଦୀପ ରହିଥିବା ବେଳେ ଏଠାରେ କୌଣସି ଜନବସତି ନାହିଁ । ବ୍ରିଟିଶ ଶାସନ ଅମଳରେ ବ୍ରିଟିଶ ନୌସେନା ଏହି ଦ୍ୱୀପକୁ ବ୍ୟବହାର କରିଥିଲା । ତେବେ ସ୍ୱାଧୀନତା ପରେ ବି କାଚାତିବୁ ଦୀପକୁ ନେଇ ବିବାଦ ଲାଗିରହିଥିଲା । ତେବେ ୧୯୭୪ରେ କଚାତିବୁ ଦ୍ୱୀପ ଉପରେ ଶ୍ରୀଲଙ୍କାର ଅଧିକାରକୁ ଭାରତ ମାନିନେଇଥିଲା, ଆଉ କଲମ୍ବୋକୁ ଏହାକୁ ହସନ୍ତାନ୍ତର କରାଯାଇଥିଲା । ହେଲେ ସେତେବେଳେ ତାମିଲନାଡୁର ମତ୍ସ୍ୟଜୀବୀମାନେ ଏହାକୁ ନେଇ ବିକ୍ଷୋଭ କରିଥିଲେ । ୨୦୧୧ରେ ସେତେବେଳର ତାମିଲନାଡୁ ମୁଖ୍ୟମନ୍ତ୍ରୀ ଜୟଲଳିତା ସୁପ୍ରିମକୋର୍ଟରେ ଏକ ଆବେଦନ କରିଥିଲେ । ଏଥିରେ ଶ୍ରୀଲଙ୍କାକୁ ଏହି ଦୀପ ହସନ୍ତାନ୍ତର ଅଣସାମ୍ବିଧାନିକ ବୋଲି ଦର୍ଶାଯାଇଥିଲା । ଯଦିଓ କଚାତିବୁ ଦ୍ୱୀପକୁ ନେଇ ଜାତୀୟ ସ୍ତରରେ ଆଲୋଚନା ହୁଏନି, ହେଲେ ତାମିଲନାଡୁରେ ଏହା ଏକ ସମ୍ବେଦନଶୀଳ ପ୍ରସଙ୍ଗ । ବିଶେଷକରି ତାମିଲନାଡୁ ମତ୍ସ୍ୟଜୀବୀମାନେ ଏହି ଦ୍ୱୀପର ଆଖପାଖରେ ମାଛଧରିବାକୁ ଯାଆନ୍ତି । ଆଉ ଶ୍ରୀଲଙ୍କା ନୌସେନା ବାରମ୍ବାର ଭାରତୀୟ ମତ୍ସ୍ୟଜୀବୀଙ୍କୁ ଗିରଫ କରିଥାଏ, ଗତ ୨୦ ବର୍ଷରେ ଶ୍ରୀଲଙ୍କା ୬ ହଜାରରୁ ଅଧ୍ଚକ ଭାରତୀୟ ମତ୍ସ୍ୟଜୀବୀଙ୍କୁ ଅଟକ ରଖିବା ସହ ଏକ ହଜାରରୁ ଅଧିକ ମାଛଧରା ବୋଟକୁ ଜବତ କରିଛି ।