କ୍ରିକେଟ୍ ଫ୍ୟାନ୍ସଙ୍କ ପାଇଁ ଖୁସି ଖବର । ଦୁଇ ମାସ ନୁହେଁ, ଏବେ ଅଢେଇ ମାସ ପାଇଁ ଖେଳାଯିବ ଆଇପିଏଲ୍ ଟୁର୍ଣ୍ଣାମେଣ୍ଟ ।
କନକ ବ୍ୟୁରୋ: ବଢିବାକୁ ଯାଉଛି କ୍ରିକେଟ୍ ଫ୍ୟାନ୍ସମାନଙ୍କର ମଜା । କାହିଁକି ନା, ଏଣିକି କେବଳ ୨ ମାସ ନୁହେଁ ବରଂ ଅଢେଇ ମାସ ଧରି ଖେଳାଯିବ ବିଶ୍ୱର ସବୁଠୁ ଧନୀ କ୍ରିକେଟ୍ ଲିଗ୍ ଆଇପିଏଲ୍ । ଏଥିିପାଇଁ ଇଣ୍ଟରନ୍ୟାସନାଲ କ୍ରିକେଟ୍ କାଉନସିଲ୍ ମଧ୍ୟ ନିଜ ଭବିଷ୍ୟତର ଟୁର ପୋଗ୍ରାମରେ ଅଢେଇ ମାସ ଖାଲି ସମୟ ରଖିଥିବା ଜଣାପଡିଛି । ଯାହାପରେ କ୍ରିକେଟ୍ ଫ୍ୟାନ୍ସଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ମୁତାବକ, ଆଗାମୀ ସିଜିନରୁ ଆଇପିଏଲ୍ ଦୁଇ ମାସ ନୁହେଁ ବରଂ ଅଢେଇ ମାସ ପାଇଁ ଖେଳାଯିବ । ପ୍ରତିବର୍ଷ ମାର୍ଚ୍ଚ ଶେଷ ସପ୍ତାହରୁ ଜୁନ୍ ମାସ ପ୍ରଥମ ସପ୍ତାହ ଭିତରେ ଏହି ଟୁର୍ଣ୍ଣାମେଣ୍ଟ ଖେଳାଯିବ । ଆଗାମୀ ଜୁଲାଇ ୨୫ ତାରିଖ ଓ ୨୬ ତାରିଖରେ ବର୍ମିହୋମରେ ଆଇସିସି ବାର୍ଷିକ ବୈଠକ ହେବାର ଅଛି । ଯେଉଁଠି ଏହି ନିଷ୍ପତ୍ତି ଉପରେ ବିଧିବଦ୍ଧ ଭାବେ ମୋହର ବାଜିବ ବୋଲି ଜଣାପଡିଛି ।
୨୦୨୩-୨୭ ମଧ୍ୟରେ ଆଇସିସି ଦୁଇଟି ଟେଷ୍ଟ ଚାମ୍ପିୟନସିପ୍, ଆଇସିସି ଟି-୨୦ ବିଶ୍ୱକପ୍, ଦିନିକିଆ ବିଶ୍ୱକପ୍ ଆୟୋଜନ କରିବ । ଏହା ସହିତ ବିଭିନ୍ନ ଦେଶ ଭିତରେ ଅନେକ ସିରିଜ୍ ମଧ୍ୟ ଖେଳାଯିବ । ତେଣୁ ଆଇପିଏଲ୍ ପାଇଁ ଅଢେଇ ମାସ ଛାଡିଦେଲେ, ଅନ୍ୟ ମାସରେ ସିଡ୍ୟୁଲ୍ ଟାଇଟ୍ ରହିପାରେ । ଯେଉଁ କାରଣରୁ ଖେଳାଳିମାନଙ୍କୁ ବିଶ୍ରାମ କମ୍ ମିଳିପାରେ ।
ସୂଚନାଯୋଗ୍ୟ ଯେ, ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡର ସଚିବ ଜୟ ଶାହ ପୂର୍ବରୁ ମଧ୍ୟ ଏନେଇ ସୂଚନା ଦେଇଥିଲେ । ସେ କହିଥିଲେ ଯେ, ଆଗାମୀ ତିନି ବର୍ଷ ଭିତରେ ଆଇପିଏଲର ପ୍ରତି ସିଜିନରେ ୧୦-୧୦ ମ୍ୟାଚ୍ ବଢିବ । ଏହି କାରଣରୁ ଆଇପିଏଲର ସମୟ ସୀମା ମଧ୍ୟ ବଢିବାକୁ ଯାଉଛି । ତେଣୁ ଦୁଇ ମାସ ବଦଳରେ ଏହି ଟୁର୍ଣ୍ଣାମେଣ୍ଟ ଏବେ ଅଢେଇ ମାସ ଧରିି ଖେଳାଯିବ ।