କନକ ବ୍ୟୁରୋ: ଇଣ୍ଡିଆନ୍ ପ୍ରିମିୟର୍ ଲିଗ୍ ଟି-୨୦ କ୍ରିକେଟ୍ ଜଗତର ଗୋଟିଏ ବଡ ବ୍ରାଣ୍ଡ କହିଲେ କିଛି ଭୁଲ ହେବନି । କାହିଁକି ନା, ଏହି ଲିଗରେ ଦେଶ ବିଦେଶର ଚର୍ଚ୍ଚିତ ଖେଳାଳିମାନେ ସାମିଲ ହୋଇଥାନ୍ତି । ତେବେ ବର୍ତ୍ତମାନ ସମୟରେ ଅନ୍ୟ ଦେଶମାନଙ୍କରେ ଆରମ୍ଭ ହୋଇଥିବା ଟି-୨୦ କ୍ରିକେଟ୍ ଲିଗ୍ ବିସିସିଆଇ ପାଇଁ ବଡ ଟେନସନ୍ ଆଣିଛି । ବିଶେଷକରି ଆଇପିଏଲ୍ ଫ୍ରାଞ୍ଚାଇଜ୍ ମାନେ ବିଦେଶୀ ଲିଗରେ ଟିମ୍ କିଣିବା ଆଇପିଏଲର ବ୍ରାଣ୍ଡ ଭାଲ୍ୟୁକୁ କମାଇପାରେ ବୋଲି ଆଶଙ୍କା ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ଏକ ରିପୋର୍ଟ ମୁତାବକ, ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ ଏହାକୁ ନେଇ ଚିନ୍ତା ପ୍ରକାଶ କରିଛି । ବିସିିସିଆଇର କହିବା କଥା, ଆଇପିଏଲକୁ ଯେଭଳି ବ୍ରାଣ୍ଡ ଭାବେ ଗଢାଯାଇଛି, ସେହି ବ୍ରାଣ୍ଡକୁ ସୁରକ୍ଷିତ ରଖିବା ସବୁଠୁ ଗୁରୁତ୍ୱପୂର୍ଣ୍ଣ । ତେଣୁ ଆଇପିଏଲ ବ୍ରାଣ୍ଡ ଭାଲ୍ୟୁର ଫାଇଦା ଉଠାଇ ଯଦି ବିଦେଶୀ ଲିଗ୍ ଲୋକପ୍ରିୟତା ହାସଲ କରନ୍ତି, ତେବେ ଆଇପିଏଲ ପାଇଁ ଏହା ଚିନ୍ତାଜନକ ହୋଇପାରେ ।
ସୂଚନାଯୋଗ୍ୟ ଯେ, ଆଇପିଏଲ୍ ବ୍ୟତୀତ ଏବେ ଦକ୍ଷିଣ ଆଫ୍ରିକା ଲିଗ୍, ୟୁଏଇ ଟି-୨୦ ଲିଗ୍ ଓ କାରବିଆନ୍ ଟି-୨୦ ଲିଗରେ ମଧ୍ୟ ଆଇପିଏଲ୍ ଫ୍ରାଞ୍ଚାଇଜମାନେ ଟିମ୍ କିଣିଛନ୍ତି । ସେଠାକାର ଦଳମାନଙ୍କର ନାଁ ମଧ୍ୟ ଆଇପିଏଲ୍ ଦଳମାନଙ୍କର ନାଁ ସହିତ ସମାନ ରହିଛି । ତେଣୁ ଏହାଦ୍ୱାରା ଆଇପିଏଲର ବ୍ରାଣ୍ଡ ଭାଲ୍ୟୁ କମିପାରେ ବୋଲି କୁହାଯାଉଛି । ଜାଣି ରଖିବା ଉଚିତ୍ ଯେ, ଦକ୍ଷିଣ ଆଫ୍ରିକା ଟି-୨୦ ଲିଗର ୬ଟି ଟିମର ମାଲିକାନା ଆଇପିଏଲ୍ ଫ୍ରାଞ୍ଚାଇଜଙ୍କ ହାତରେ ରହିଛି । ସେହିପରି ୟୁଏଇ ଟି-୨୦ ଲିଗରେ ୩ଟି ଓ କାରବିଆନ୍ ପ୍ରିମିୟର ଲିଗରେ ୩ଟି ଟିମର ମାଲିକାନା ଆଇପିଏଲ୍ ଫ୍ରାଞ୍ଚାଇଜଙ୍କ ହାତରେ ରହିଛି ।