ଭାରତରେ ମଙ୍କିପକ୍ସ : କେରଳରୁ ଚିହ୍ନଟ ହେଲା ପ୍ରଥମ ମଙ୍କିପକ୍ସ ମାମଲା
କନକ ବ୍ୟୁରୋ : ଭାରତରେ ମଙ୍କିପକ୍ସ । କେରଳରୁ ଚିହ୍ନଟ ହୋଇଛି ପ୍ରଥମ ମଙ୍କିପକ୍ସ ମାମଲା । କିଛି ଦିନ ତଳେ ସାଉଦି ଆରବ ଏମିରେଟ୍ସରୁ ଫେରିଥିବା ଜଣେ ୩୫ ବର୍ଷୀୟ ଯୁବକ ମଙ୍କିପକ୍ସ ରୋଗରେ ପୀଡ଼ିତ ହୋଇଥିବା ସ୍ପଷ୍ଟ ହୋଇଛି । ଥିରୁବନନ୍ତପୁରମ୍ ମେଡିକାଲ୍ କଲେଜରେ ତାଙ୍କୁ ଭର୍ତ୍ତି କରାଯାଇଛି । ତାଙ୍କର କ୍ଲୋଜ୍ କଂଟାକ୍ଟ ବା ତାଙ୍କ ସହ ସଂପର୍କରେ ଆସିଥିବା ଲୋକଙ୍କୁ ଚିହ୍ନଟ କରାଯାଇଛି । ବାପା-ମାଆ, ଟ୍ୟାକ୍ସି ଡ୍ରାଇଭର, ଅଟୋ ରିକ୍ସା ଡ୍ରାଇଭରଙ୍କୁ ସଙ୍ଗରୋଧରେ ରହିବାକୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାଛଡ଼ା ବିମାନରେ ତାଙ୍କ ସହ ଆସୁଥିବା ୧୧ ଜଣ ଯାତ୍ରୀ, କ୍ରିଉ ମେମ୍ବରଙ୍କୁ ମଧ୍ୟ ସତର୍କ ରହିବାକୁ କୁହାଯାଇଛି । ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରଙ୍କୁ ଦେଖାଇବା ଲାଗି ପରାମର୍ଶ ଦିଆଯାଇଛି । କେରଳର ଏହି ଯୁବକ ୟୁଏଇରେ ଜଣେ ମଙ୍କିପକ୍ସ ରୋଗୀଙ୍କ ସଂସ୍ପର୍ଶରେ ଆସିଥିଲେ । ସମ୍ପୃକ୍ତ ବ୍ୟକ୍ତି ଜଣକ ତିନି ଦିନ ତଳେ ୟୁନାଇଟେଡ୍ ଆରବ ଏମିରେଟସରୁ ଫେରିଥିଲେ । ତାଙ୍କ ଠାରେ ଲକ୍ଷଣ ଦେଖାଦେବାରୁ ଚିକିତ୍ସା ପାଇଁ ସେ ଡାକ୍ତରଖାନାକୁ ଯାଇଥିଲେ । ତାଙ୍କଠାରୁ ନମୁନା ସଂଗ୍ରହ କରାଯାଇ ପୁନେ ସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ ଅଫ ଭାଇରୋଲୋଜିକୁ ପଠାଯାଇଥିଲା । ସେଠାରୁ ମିଳିଥିବା ରିପୋର୍ଟରେ ବ୍ୟକ୍ତି ଜଣକ ମଙ୍କିିପକ୍ସରେ ସଂକ୍ରମିତ ଥିବା ସ୍ପଷ୍ଟ ହୋଇଛି ।
ଆଂଜାଇଟି ଛଡ଼ା ତାଙ୍କ ଠାରେ ଅନ୍ୟ କୌଣସି ବଡ଼ ଧରଣର ସ୍ୱାସ୍ଥ୍ୟ ସମସ୍ୟା ନାହିଁ ବୋଲି କହିଛନ୍ତି ଡାକ୍ତର । କେରଳର ସ୍ୱାସ୍ଥ୍ୟମନ୍ତ୍ରୀ କହିଛନ୍ତି, ଭୟଭୀତ ହେବାର କାରଣ ନାହିଁ । ସେପଟେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଏକ ଉଚ୍ଚସ୍ତରୀୟ ବିଶେଷଜ୍ଞ ଡାକ୍ତରୀ ଟିମକୁ କେରଳ ପଠାଇଛନ୍ତି । କିପରି ମଙ୍କିପକ୍ସ ବ୍ୟାପିବ ନାହିଁ, ଏ ନେଇ ରାଜ୍ୟ ସ୍ୱାସ୍ଥ୍ୟ ବିଭାଗର ଅଧିକାରୀ ସହ ମିଶି ଏହି ଡାକ୍ତରୀ ଟିମ୍ କାମ କରିବ । ବିଶ୍ୱରେ ୨୬ ଦେଶରେ ଏଯାଏଁ ମଙ୍କି ପକ୍ସ ଚିହ୍ନଟ ହୋଇସାରିଲାଣି । ବିଶେଷକରି ବ୍ରିଟେନରେ ଏହି ମାମଲା ଅଧିକ ରହିଛି । ଏଠାରେ ହଜାରେରୁ ଅଧିକ ମଙ୍କି ପକ୍ସ ଆକ୍ରାନ୍ତ ଚିହ୍ନଟ ହୋଇସାରିଛନ୍ତି ।