କନକ ବ୍ୟୁରୋ: ଲୋକସଭା ନିର୍ବାଚନ ପୂର୍ବରୁ ଭାରତକୁ ନେଇ ବ୍ରିଟିଶ ଗଣମାଧ୍ୟମ ସଂସ୍ଥା ‘ଦ ଗାର୍ଡିଆନ’ର ରିପୋର୍ଟକୁ ନେଇ ଏବେ ସବୁଠି ଚର୍ଚ୍ଚା । ପାକିସ୍ତାନରେ ପଶି ଆତଙ୍କବାଦୀଙ୍କୁ ଭାରତ ନିପାତ କରୁଥିବା ‘ଦ ଗାର୍ଡିଆନ’ ଖବରକାଗଜରେ ଦାବି କରାଯାଇଛି । ଯଦିଓ କୁଟନୈତିକ ଦୃଷ୍ଟିକୋଣରୁ ଭାରତ ଏହାକୁ ଖଣ୍ଡନ କରିଛି କିନ୍ତୁ ବିଜେପି ଏହାର ଫାଇଦା ଉଠାଇବାର ସୁଯୋଗ ହାତଛଡା କରିନାହିଁ । ଏହା ଉପରେ ପ୍ରତିକ୍ରିୟା ରଖି ଶୁକ୍ରବାର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଥିଲେ, ଭାରତରେ ଅସ୍ଥିରତା ସୃଷ୍ଟି କରି ଯଦି ଆତଙ୍କୀ ପାକିସ୍ତାନରେ ଯାଇ ଲୁଚିବେ, ତେବେ ଭାରତ ସେଠାରେ ପହଁଚି ସେମାନଙ୍କୁ ନିପାତ କରିବ ।
Kanak News is now on WhatsApp
Join and get latest news updates delivered to you via WhatsApp
ଶନିବାର ଉତ୍ତରପ୍ରଦେଶର ସାହାରଙ୍ଗପୁରରେ ଜନସଭାକୁ ସମ୍ବୋଧିତ କରି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ‘ଦ ଗାର୍ଡିଆନ’ର ରିପୋର୍ଟ କଥା ଉଠାଇଛନ୍ତି । ଯୋଗୀ କହିଛନ୍ତି, ବ୍ରିଟେନର ପ୍ରତିଷ୍ଠିତ ଖବରକାଗଜର ରିପୋର୍ଟ ସାରା ବିଶ୍ୱର ଧ୍ୟାନ ଆକର୍ଷିତ କରିଛି । ସେଥିରେ କିପରି ପାକିସ୍ତାନ ଭିତରେ ଆତଙ୍କବାଦୀଙ୍କୁ ହତ୍ୟା କରାଯାଉଛି ତାହା ଦର୍ଶାଯାଇଛି । ଆଜି ଆତଙ୍କବାଦ ସାରା ବିଶ୍ୱ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି ଏବଂ ଏହାର ସମାଧାନ ଦିଗରେ ଭାରତ ନେତୃତ୍ୱ ନେଉଛି ।
- ୨୦ ଆତଙ୍କବାଦୀଙ୍କୁ ନିପାତ କଲାଣି ଭାରତ
- ଗୁପ୍ତ ଶୈଳୀରେ କାର୍ଯ୍ୟ କରୁଛି ଭାରତୀୟ ସେନା
ଦ ଗାର୍ଡିଆନ ପ୍ରକାଶ କରିଥିବା ରିପୋର୍ଟରେ କୁହାଯାଇଛି ଯେ ପାକିସ୍ତାନରେ ଥିବା ଆତଙ୍କୀଙ୍କୁ ମାରିବା ପାଇଁ ଭାରତ ବ୍ୟାପକ ରଣନୀତି ପ୍ରସ୍ତୁତ କରିଛି । ଏନେଇ ପାକିସ୍ତାନରେ ଭାରତୀୟ ସେନାର ଏକ ଟିମ ଗୁପ୍ତ ତରିକାରେ କାମ କରୁଛି ଓ ଆତଙ୍କବାଦୀଙ୍କୁ ମାରୁଛି । ୨୦୨୦ରୁ ଏବେ ସୁଦ୍ଧା ୨୦ଜଣ ଆତଙ୍କୀଙ୍କୁ ମାରିସାରିଥିବା ରିପୋର୍ଟରେ ଦାବି କରାଯାଇଛି । ତେବେ ଭାରତ ଖବରକୁ ଖଣ୍ଡନ କରିବା ସହ ଏଭଳି ରିପୋର୍ଟ ଦୁଭାଗ୍ୟପୂର୍ଣ୍ଣ ବୋଲି କହିଛି । ଦ ଗାର୍ଡିଆନର ଏହି ରିପୋର୍ଟ କହୁଛି ଭାରତୀୟ ଗୁଇନ୍ଦା ଏଜେନ୍ସି ରିସର୍ଚ୍ଚ ଆଣ୍ଡ ଆନାଲିସିସ ୱିଙ୍ଗ ଆତଙ୍କବାଦୀ ନିରୋଧୀ ଅଭିଯାନର ମୁଖ୍ୟ ଅଂଶ ଅଟେ । ଏହାରି ନିର୍ଦ୍ଦେଶରେ ଆତଙ୍କୀଙ୍କ ମୂଳପୋଛ କରିବାକୁ ଲକ୍ଷ୍ୟ ରଖିଛି ଭାରତ ।
ସୂଚନା ଅନୁସାରେ ୨୦୧୯ ପୁଲୱାମା ଆତଙ୍କବାଦୀ ଆକ୍ରମଣ ପରେ ଏହି ଗୁଇନ୍ଦା ଏଜେନ୍ସି ବିଦେଶୀ ଆତଙ୍କୀଙ୍କ ଉପରେ କଡ଼ା ନଜର ରଖିଛି ଓ ଆବଶ୍ୟକ ପଡିଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ତେବେ ବ୍ରିଟିଶ ଖବରକାଗଜର ଦାବି ପୂର୍ବରୁ ଆମେରିକା ଓ କାନାଡ଼ା ମଧ୍ୟ ଭାରତ ଉପରେ ସମାନ ଅଭିଯୋଗ ଆଣିସାରିଛନ୍ତି ।