କନକ ବ୍ୟୁରୋ: ଗୁଜରାଟରେ ବିଜେପି ପୁଣିଥରେ ପ୍ରଚଣ୍ଡ ବହୁମତରେ ବିଜୟ ହାସଲ କରିଛି । ଦଳ ସେଠାରେ ସରକାର ଗଠନ କରିବା ଏକ ପ୍ରକାର ନିଶ୍ଚିତ ହୋଇସାରିଛି । କଂଗ୍ରେସ ଏଠାରେ ସବୁଠାରୁ ଖରାପ ପ୍ରଦର୍ଶନ କରିଛି । ସେପଟେ ପ୍ରଥମ ଥର ପାଇଁ ରାଜ୍ୟରେ ନିର୍ବାଚନକୁ ଓହ୍ଲାଇଥିବା ଆପ ମାତ୍ର ୫ଟି ଆସନରେ ଆଗୁଆ ଚାଲିଛି । ସବୁ ଆସନରେ ଦଳ ପ୍ରାର୍ଥୀ ଦେବା ପରେ ବି ମାତ୍ର ୫ ଆସନରେ ଦଳ ଆଗରେ ରହିଛି । ଦିଲ୍ଲୀ ମୁଖ୍ୟମନ୍ତ୍ରୀ ତଥା ଦଳର ସଂଯୋଜକ ଅରବିନ୍ଦ କେଜ୍ରିୱାଲ କାଗଜରେ ଲେଖି ତିନି ନେତାଙ୍କ ବିଜୟ ନେଇ ସ୍ପଷ୍ଟ କରିଥିଲେ । ଏଥିରେ ଆପର ମୁଖ୍ୟମନ୍ତ୍ରୀ ଚେହେରା ଇସୁଦାନ ଗଢବୀ ଏବଂ ପ୍ରଦେଶ ଅଧ୍ୟକ୍ଷ ଗୋପାଲ ଇଟାଲିଆ ଏବଂ ଅଳ୍ପେଶ କଥିରିଆଙ୍କ ନାଁ ରହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆପ ସଂଯୋଜକ ଅରବିନ୍ଦ କିଛି ଦିନ ତଳେ ପ୍ରେସମିଟରେ ଏହି ତିନି ପ୍ରାର୍ଥୀଙ୍କ ବିଜୟ ନେଇ ଦାବି କରିଥିଲେ । ସେ ସମୟରେ ସେ ଏହାକୁ କାଗଜରେ ଲେଖି ଦେଇଥିଲେ ମଧ୍ୟ । ତେବେ ସମସ୍ତେ ନିର୍ବାଚନ ହାରିବା ଏକ ପ୍ରକାର ସ୍ପଷ୍ଟ ହୋଇସାରିଛି ।
ଦେବଭୂମି ଦ୍ୱାରିକାର ଖଂଭାଲିଆ ଆସନରେ ଆପ ମୁଖ୍ୟମନ୍ତ୍ରୀ ପ୍ରାର୍ଥୀ ଇସୁଦାନ ଗଢବୀ ପ୍ରାର୍ଥୀ ହୋଇଥିଲେ । ବିଜୟ ନେଇ ଅରବିନ୍ଦ ସ୍ପଷ୍ଟ ମଧ୍ୟ କରିଥିଲେ । ତେବେ ଏହି ଆସନରୁ ବିଜେପି ପ୍ରାର୍ଥୀ ମୂଲୁଭାଇ ବେରା ୭୭,୩୦୫ ଭୋଟ ପାଇଥିବା ବେଳେ ଆପ୍ ପ୍ରାର୍ଥୀ ୫୮,୪୬୭ ଭୋଟ ପାଇଛନ୍ତି । କଂଗ୍ରେସର ବିକ୍ରମ ମାଡମ ୪୪,୫୨୬ ପାଇଛନ୍ତି । ବିଜେପି ବର୍ତ୍ତମାନ ସୁଦ୍ଧା ୧୮୮୩୮ ଭୋଟରେ ଆପ୍ ଠାରୁ ଆଗରେ ରହିଛି ।
ସେହିଭଳି କତରଗାମ ବିଧାନସଭା ଆସନରୁ ଆପ ପ୍ରଦେଶ ଅଧ୍ୟକ୍ଷ ଗୋପାଲ ଇଟାଲିଆ ପରାସ୍ତ ହୋଇଛନ୍ତି । ବିଜେପି ପ୍ରାର୍ଥୀ ବିନୁ ମୋରାଡିଆ ୧,୧୦,୫୧୫ ଭୋଟ ପାଇଥିବା ବେଳେ ଇଟାଲିଆଙ୍କୁ ମୋଟ ୪୯,୮୫୬ ଭୋଟ ପାଇଛନ୍ତି । ବିଜେପି ୬୦ ହଜାରରୁ ଅଧିକ ଭୋଟରେ ଏଠାରେ ବିଜୟୀ ହୋଇଛି ।
ପଟିଦାରଙ୍କ ଗଡ ଥିବା ବରାଚ୍ଛା ଆସନରୁ ପଟେଲ ସଂରକ୍ଷଣ ଆନ୍ଦୋଳନର ପ୍ରମୁଖ ଚେହେରା ଅଳ୍ପେଶ କଥିରିୟା ଆପରୁ ପ୍ରାର୍ଥୀ ହୋଇଥିଲେ । ତେବେ ବିଜେପି ପ୍ରାର୍ଥୀ କନାଣି ୬୬, ୩୫୨ ଭୋଟ ପାଇ ଆଗୁଆ ରହିଥିବା ବେଳେ ଅଳ୍ପେଶଙ୍କୁ ମାତ୍ର ୪୫୩୫୮ ଖଣ୍ଡ ଭୋଟ ମିଳିଛି । ଆପ ଠାରୁ ମୋଟ ୨୦ ହଜାରରୁ ଅଧିକ ଭୋଟରେ ବିଜେପି ଆଗୁଆ ରହିଛି ।