ଗ୍ୟାଙ୍ଗଷ୍ଟରଙ୍କ ଆତଙ୍କୀ ଲିଙ୍କର ପର୍ଦ୍ଦାଫାଶ। ଏନଆଇଏର ଘନଘନ ଚଢ଼ାଉ।
କନକ ବ୍ୟୁରୋ: ଭାରତରେ ଅପରାଧିକ ଗତିବିଧିରେ ଲିପ୍ତ ଥିବା କିଛି ଗ୍ୟାଙ୍ଗଷ୍ଟର ଓ ଆତଙ୍କୀଙ୍କୁ ବିଭିନ୍ନ ରାଜ୍ୟରୁ ଗିରଫ କରିଛି ଜାତୀୟ ତଦନ୍ତକାରୀ ସଂସ୍ଥା ଏନଆଇଏ । ବଡ଼ କଥା ହେଉଛି ଗ୍ୟାଙ୍ଗଷ୍ଟରଙ୍କର ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ଓ ଖଲିସ୍ଥାନୀ ଆତଙ୍କୀଙ୍କ ସହ ଲିଙ୍କ ଥିବା ପର୍ଦ୍ଦାଫାଶ ହୋଇଛି । କିଛି ଅଭିଯୁକ୍ତ ଆତଙ୍କୀ ସହିତ ସମ୍ପୃକ୍ତି ମଧ୍ୟ ସ୍ୱୀକାର କରିଛନ୍ତି । ଏବେ ଏହି ଗ୍ୟାଙ୍ଗଷ୍ଟରଙ୍କ ‘ଆତଙ୍କୀ କନେକ୍ସନ୍’ ଲିଙ୍କ ପାଇଁ ଏନଆଇଏ ତନାଘନା ଜୋରଦାର କରିଦେଇଛି । ଟେରର୍ ଫଣ୍ଡିଂ ଓ ଦେଶରେ ଆତଙ୍କବାଦୀ ଗତିବିଧିର ତଦନ୍ତ କରୁଥିବା ଏନଆଇଏ ୧୦ ଗ୍ୟାଙ୍ଗଷ୍ଟରଙ୍କ ୬୦ଟି ଠିକଣା ଉପରେ ଚଢ଼ାଉ କରିଛି ।
Kanak News is now on WhatsApp
Join and get latest news updates delivered to you via WhatsApp
ତଦନ୍ତ ବେଳେ ପୋଲିସ ଜାଣିବାକୁ ପାଇଥିଲା ଯେ ଗୋଲ୍ଡି ବ୍ରାର ନାମକ ଗ୍ୟାଙ୍ଗଷ୍ଟର୍ କାନାଡାରେ ବସି ସିଦ୍ଧୁ ମୁସେୱାଲା ହତ୍ୟା ପାଇଁ ଷଡ଼ଯନ୍ତ୍ର କରିଥିଲା । ତିହାର ଜେଲରେ ବନ୍ଦୀ ଥିବା ଲରେନ୍ସ ବିଷ୍ଣୋଇ ମଧ୍ୟ ଏଥିରେ ନିର୍ଣ୍ଣାୟକ ଭୂମିକା ତୁଲାଇଥିଲା । ଏହି ଗ୍ୟାଙ୍ଗ ପୋଲିସ୍ ବ୍ୟତୀତ ତଦନ୍ତକାରୀ ସଂସ୍ଥା ପାଇଁ ମୁଣ୍ଡବ୍ୟଥାର କାରଣ ହୋଇଥିଲେ । ଏହି ଗ୍ୟାଙ୍ଗଷ୍ଟରଙ୍କ ନେଟୱର୍କ ଦିଲ୍ଲୀ, ପଞ୍ଜାବ, ରାଜସ୍ଥାନ, ହରିୟାଣା ସମେତ କିଛି ରାଜ୍ୟରେ ରହିଥିବା ଜଣାପଡ଼ିଛି । ଏହି ତାଲିକାରେ ଜିତେନ୍ଦ୍ର ଗୋଗୀ ମଧ୍ୟ ସାମିଲ୍ ଅଛନ୍ତି, ଯାହାର ହତ୍ୟା ରୋହିଣୀ କୋର୍ଟରେ କରାଇଯାଇଥିଲା । ଏହା ସତ୍ୱେ ଏହି ଗ୍ୟାଙ୍ଗ ପୂରା ସକ୍ରିୟ ରହିଛି ।
ଏନଆଇଏ ତଦନ୍ତରେ ଜଣାପଡ଼ିଛି ଯେ ବଲିଉଡ ସୁପରଷ୍ଟାର ସଲମାନ୍ ଖାନଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର ହୋଇଥିଲା । ପଞ୍ଜାବୀ ଗାୟକ ସିଦ୍ଧୁ ମୁସେୱାଲା ହତ୍ୟା ମାମଲାରେ ସୁଟର ଦୀପକ ମୁଣ୍ଡି ଗିରଫ ହେବା ପରେ ଏହି ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ରବିବାର ପଞ୍ଜାବ ପୋଲିସ ପଶ୍ଚିମବଙ୍ଗ-ନେପାଳ ସୀମାରୁ ଦୀପକକୁ ଗିରଫ କରିଥିଲା । ଏହାପରେ ସଲମାନ ଖାନଙ୍କୁ ହତ୍ୟା କରିବା ନେଇ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ଓ ଗୋଲ୍ଡି ବ୍ରାର ମିଳିତ ଭାବେ ହତ୍ୟା ଯୋଜନା କରିଥିବା ଜଣାପଡିଛି । ରାଜସ୍ଥାନ କୃଷ୍ଣସାର ମୃଗ ଶିକାର ଘଟଣାରେ ସଲମାନ ଖାନ, ଲରେନ୍ସ ବିଷ୍ଣୋଇଙ୍କ ଟାର୍ଗେଟରେ ଆସିଥିଲେ ।
ଚଳିତ ବର୍ଷ ମେ’ ୨୯ ତାରିଖରେ ପଞ୍ଜାବର ମାନସା ଗାଁରେ ମୁସେୱାଲାଙ୍କୁ ଗୁଳି କରି ହତ୍ୟା କରାଯାଇଥିଲା । ଏହି ହତ୍ୟାକାଣ୍ଡ ସେହି ସମୟରେ ଘଟିଥିଲା, ଯେଉଁ ସମୟରେ ଭଗୱନ୍ତ ସରକାରଙ୍କ ନିର୍ଦ୍ଦେଶକ୍ରମେ ପଞ୍ଜାବ ପୋଲିସ୍ ୪୨୪ ଜଣଙ୍କୁ ଦିଆଯାଇଥିବା ସୁରକ୍ଷାକୁ ହଟାଇ ଦିଆଯାଇଥିଲା । ଏଥିରେ ମୁସେୱାଲା ମଧ୍ୟ ସାମିଲ୍ ଥିଲେ ।