ଦିଲ୍ଲୀରୁ ଆସି ସ୍ୱାସ୍ଥ୍ୟବସ୍ଥା ବୁଝିଲେ ମୁଖ୍ୟମନ୍ତ୍ରୀ ଭୂପେଶ ବାଘେଲ। କୃତଜ୍ଞତା ଜଣାଇ ପାଦତଳେ ପଡିଗଲେ ରାହୁଲଙ୍କ ମାଆ।
କନକ ବ୍ୟୁରୋ: ହସ୍ପିଟାଲରେ ଚିକିତ୍ସିତ ହେଉଥିବା ରାହୁଲକୁ ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବାଘେଲ ଭେଟିଛନ୍ତି । ମୁଖ୍ୟମନ୍ତ୍ରୀ ନିଜେ ରାହୁଲ ସହ କଥା ମଧ୍ୟ ହେଉଛନ୍ତି । ତାର ସ୍ୱାସ୍ଥ୍ୟବସ୍ଥା ପଚାରି ବୁଝିବା ସହ କେଉଁଠି ଯନ୍ତ୍ରଣା ଅନୁଭବ କରୁଛି, କେଉଁଠି ଦରଜ ଅଛି ପଚାରି ବୁଝୁଛନ୍ତି । ହସ୍ପିଟାଲ ବେଡରେ ଶୋଇଥିବା ରାହୁଲ ବି ଉତ୍ତର ଦେଉଛି ।
Kanak News is now on WhatsApp
Join and get latest news updates delivered to you via WhatsApp
ରାହୁଲ ହୁଏତ ଜାଣି ନଥିବା ସେ କାହା ସହ କଥା ହେଉଛି, ତାକୁ କିଏ ଭେଟିବାକୁ ଆସିଛନ୍ତି, କିନ୍ତୁ ପାଖରେ ଛିଡା ହୋଇଥିବା ମା ବୁଝିଛି । ପୁଅ ରାହୁଲ ବୋରୱେଲ ଭି୍ତରୁ ସୁରକ୍ଷିତ ଉଦ୍ଧାର ହେବା ପଛରେ ଯେଉଁ ବ୍ୟକ୍ତିଙ୍କର ପ୍ରମୁଖ ଭୂମିକା ରହିଛି, ସେ ହେଉଛନ୍ତି ନିଜେ ମୁଖ୍ୟମନ୍ତ୍ରୀ ଭୂପେଶ ବାଘେଲ । ସେଥିପାଇଁ ମୁଖ୍ୟମନ୍ତ୍ରୀଙ୍କ ନିକଟରେ ହାତ ଯୋଡି ପୁଅକୁ ବଞ୍ଚାଇଥିବାରୁ କୃତଜ୍ଞତା ଜଣାଉଛନ୍ତି ।
ଭୁପେଶ ବାଘେଲ ଯେତେବେଳେ ରାହୁଲକୁ ଭେଟି ବାହାରିଥିଲେ ସେହି ସମୟରେ ଏମିତି ଦୃଶ୍ୟ ଦେଖିବାକୁ ମିଳିଥିଲା । ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇବାକୁ ଯାଇ ତାଙ୍କ ଗୋଡ ତଳେ ପଡିଯାଇଥିଲେ ରାହୁଲଙ୍କ ମା । ଆଉ ଜଣେ ମାର ଆବେଗକୁ ବୁଝି ତାଙ୍କୁ ତଳୁ ଉଠାଇ ମୁଣ୍ଡକୁ ଆଉଁସି ଦେଇଥିଲେ ବାଘେଲ ।
ଶୁକ୍ରବାର ସନ୍ଧ୍ୟାରେ ଯେତେବେଳେ ରାହୁଲ ବୋରୱେଲ ଭିତରେ ଖସି ପଡିଥିଲା ସେତେବେଳେ ତାର ସୁରକ୍ଷିତ ଉଦ୍ଧାର ପାଇଁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ । ଆଉ ଅପରେସନ ରାହୁଲ ଆରମ୍ଭ ହେବା ଦିନଠୁ ଉଦ୍ଧାରକାର୍ଯ୍ୟର ମନିଟରିଂ କରୁଥିଲେ ଖୋଦ ମୁଖ୍ୟମନ୍ତ୍ରୀ । ଦୂରରେ ଥିଲେ ବି ଉଦ୍ଧାର କାର୍ଯ୍ୟର ପ୍ରତିଟି ମୁହୂର୍ତକୁ ନିଜେ ଅନୁଧ୍ୟାନ କରୁଥିଲେ । ରାହୁଲଙ୍କୁ ଉଦ୍ଧାର ବେଳେ ମୋବାଇଲରେ ସେହି ଦୃଶ୍ୟକୁ ଦେଖିଥିଲେ । ଆଉ ତାପରେ କଥା ହୋଇଥିଲେ । ଭୁପେଶ ବାଘେଲଙ୍କ ଏହି କାର୍ଯ୍ୟକୁ ସାରାଦେଶରେ ପ୍ରଶଂସା କରାଯାଉଛି ।