ବଣଭୋଜିରେ ମଉଜ ବେଳେ ଡ୍ୟାମରେ ପଡିଗଲା ମୋବାଇଲ : ଲକ୍ଷେ ଟଙ୍କିଆ ଫୋନ ପାଇଁ ମଟର ପମ୍ପ ଲଗାଇ ଜଳାଶୟକୁ ଶୁଖାଇ ଦେଲେ ସରକାରୀ ବାବୁ
କନକ ବ୍ୟୁରୋ : ପାଣିରେ ପଡିଲା ବାବୁଙ୍କ ଦାମୀ ମୋବାଇଲ ଫୋନ । ଫୋନକୁ ଖୋଜିବା ଲାଗି ଜଳାଶୟରେ ମୋଟର ପମ୍ପ ଲଗାଇ ପାଣି ଶୁଖାଇ ଦେଲେ ସରକାରୀ ବାବୁ । ସୌଖିନ ସରକାରୀ ବାବୁଙ୍କୁ ଏହି ଅମାନୀୟ କାଣ୍ଡର ଖବର ଆସିଛି ଛତିଶଗଡର କାଙ୍କେର ଜିଲ୍ଲାରୁ । ଆଉ ସେହି ବାବୁ ଜଣକ ହେଉଛନ୍ତି କାଙ୍କେର ଜିଲ୍ଲା କୋୟଲିବେଡା ବ୍ଲକର ଖାଦ୍ୟ ନୀରିକ୍ଷକ ରାଜେଶ ବିଶ୍ୱାସ । ଗତ ରବିବାର ରାଜେଶ ନିଜ ସାଙ୍ଗ ସାଥୀଙ୍କ ସହ ବଣଭୋଜି କରିବାକୁ ସ୍ଥାନୀୟ ଖରକେଟ୍ଟା ଜଳାଶୟକୁ ଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସେଠାରେ ମୌଜମସ୍ତି କରି ବୁଲାବୁଲି କରିବା ସମୟରେ ଅସାବଧତା ଯୋଗୁଁ ରାଜେଶଙ୍କ ମୋବାଇଲ ଫୋନ ଜଳାଶୟ ଭିତରେ ଖସି ପଡିଥିଲା । ଆଉ ମୋବାଇଲ ଉଦ୍ଧାର କରିବା ପାଇଁ ଖାଦ୍ୟ ନୀରିକ୍ଷକ ରାଜେଶ ବିଶ୍ୱାସ ଯାହା କଲେ ତାହା ସମସ୍ତଙ୍କୁ ତାଜୁବ କରି ଦେଇଛି । ମୋବାଇଲ ଉଦ୍ଧାର କରିବା ପାଇଁ ଜଳାଶୟର ପାଣି ଶୁଖାଇ ଦେବାକୁ ନିଷ୍ପତ୍ତି ନେଇଥିଲେ ଏହ ସରକାରୀ ବାବୁ । ଆଉ ତାଙ୍କ ନିଷ୍ପତ୍ତି ଅନୁସାରେ ୩୦ ଏଚପିର ମୋଟର ପମ୍ପ ୩ ଦିନ ଲଗାଇ ଜଳାଶୟରୁ ପାଣି ଖାଲି କରିଦେଲେ ।
୩ ଦିନରେ ପ୍ରାୟ ୨୧ ଲକ୍ଷ ଲିଟର ପାଣି ନଷ୍ଟ କରିବା ପରେ ବାବୁଙ୍କ ମୋବାଇଲ ମିଳିଥିଲା । କିନ୍ତୁ, ଏହି ଖବର ସାମ୍ନାକୁ ଆସିବା ପରେ ଖାଦ୍ୟ ନୀରିକ୍ଷକ ରାଜେଶ ବିଶ୍ୱାସଙ୍କୁ ନିଲମ୍ବିତ କରିଛନ୍ତି କାଂକେର ଜିଲ୍ଲାପାଳ ପ୍ରିୟଙ୍କା ଶୁକ୍ଲା । ଏଥିସହ ଜଳ ସମ୍ପଦ ବିଭାଗର ଯନ୍ତ୍ରୀଙ୍କୁ କାରଣ ଦର୍ଶାଅ ନୋଟିସ ମଧ୍ୟ କରାଯାଇଛି । ଡହ ଡହ ଖରାରେ ଲୋକେ ପିଇବାକୁ ପାଣି ପାଉ ନାହାନ୍ତି । ଏପରି ସମୟରେ ଜଣେ ସରକାରୀ ବାବୁ କ୍ଷମତାର ଅପବ୍ୟବହାର କରି ମୋବାଇଲ ଫୋନ ପାଇଁ ଜଳାଶୟର ଲକ୍ଷ ଲକ୍ଷ ଲିଟର ପାଣି ଖାଲି କରିଦେବା ଘଟଣା ପ୍ରଶ୍ନ ସୃଷ୍ଟି ହୋଇଛି । ବାବୁ ଜଣକ ତିନି ଦିନରେ ୨୧ ଲକ୍ଷ ଲିଟର ପାଣି ନଷ୍ଟ କରିଦେଲେ, ସେତିକି ପାଣିରେ ୧୫ଶହ ଏକର ଜମିକୁ ଚାଷ କାମ ପାଇଁ ଜଳ ସେଚନ ହୋଇପାରିଥାନ୍ତା ।