ଶେଷରେ ଦାମ ବାବୁ ଭୁଲ ମାଗିଲେ ! ବ୍ରାହ୍ମଣ ସମାଜକୁ ଅପମାନ କରି ଆସିଥିଲେ ବିବାଦକୁ । ତୁଣ୍ଡକୁ ନେଇ ପୁଣି ଅଡ଼ୁଆରେ କୃଷିମନ୍ତ୍ରୀ
କନକ ବ୍ୟୁରୋ : ଶେଷରେ ଭୁଲ ମାଗିଲେ ଦାମ । ବ୍ରାହ୍ମଣଙ୍କ ସମ୍ପର୍କରେ ବିବାଦୀୟ ମନ୍ତବ୍ୟ ଦେଇ କ୍ଷମା ମାଗିଲେ ଦାମ । ବ୍ରାହ୍ମଣ ସମାଜ ପ୍ରତି ଅପମାନଜନକ ମନ୍ତବ୍ୟ ପ୍ରସଙ୍ଗରେ ଦୁଃଖ ପ୍ରକାଶ କରିଛନ୍ତି କୃଷି ମନ୍ତ୍ରୀ ଦାମୋଦର ରାଉତ । ବ୍ରାହ୍ମଣ ସମାଜ ପକ୍ଷରୁ ପ୍ରବଳ ବିରୋଧ ପରେ ନିଜ ମନ୍ତବ୍ୟକୁ ନେଇ ଦୁଃଖ ପ୍ରକାଶ କରିଛନ୍ତି ଦାମ । ତେବେ ତାଙ୍କ କଥାର ଅର୍ଥକୁ ଅନର୍ଥ କରାଯାଇଥିବା ସେ କହିଛନ୍ତି । ମନ୍ତ୍ରୀ ଦାମୋଦର ରାଉତଙ୍କ ମନ୍ତବ୍ୟକୁ ନେଇ ପୁରୀ ଶ୍ରୀମନ୍ଦିର ସାମନା ଓ ଭୁବନେଶ୍ୱର ଲିଙ୍ଗରାଜ ମନ୍ଦିର ସମ୍ମୁଖରେ ଗତକାଲି ବିକ୍ଷୋଭ ପ୍ରଦର୍ଶନ କରିଥିଲେ । କୃଷି ମନ୍ତ୍ରୀ କ୍ଷମା ମାଗନ୍ତୁ ବୋଲି ଦାବି କରିଥିଲେ ବ୍ରାହ୍ମଣ ସମାଜ । ମାଲକାନଗିରି ମାଲ୍ୟବନ୍ତ ମହୋତ୍ସବରେ ଦାମ କହିଥିଲେ ଯେ ବ୍ରାହ୍ମଣ ମାନେ ବରଂ ଭିକ ମାଗନ୍ତି କିନ୍ତୁ ଆଦିବାସୀମାନେ କେବେ ବି ଭିକ ମାଗନ୍ତି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ସବୁବେଳେ ବିବାଦୀୟ ମନ୍ତବ୍ୟ ଦେଇ ଆଲୋଚନାର ଶୀର୍ଷକ ସାଜୁଥିବା ଦାମ ରାଉତ ଦୁଇ ଦିନ ପୂର୍ବରୁ ବ୍ରାହ୍ମଣଙ୍କୁ ନେଇ ଦେଇଥିଲେ ବିବାଦୀୟ ମନ୍ତବ୍ୟ । ମାଲକାନଗିରିର ସାଂସ୍କୃତିକ ଗଣପର୍ବ ମାଲ୍ୟବନ୍ତ ମହୋତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସେଠାରେ କୃଷିମନ୍ତ୍ରୀ ଡାକ୍ତର ଦାମୋଦାର ରାଉତ କହିଥିଲେ ବ୍ରାହ୍ମଣ ହାତ ପତେଇ ସମସ୍ତଙ୍କୁ ଭିକ ମାଗନ୍ତି । ଆଦିବାସୀଙ୍କୁ ପ୍ରଶଂସା କରିବାକୁ ଯାଇ ବ୍ରାହ୍ମଣ ସମାଜ ବିରୋଧରେ ଏଭଳି କଟୁ ସମାଲୋଚନା କରିଥିଲେ କୃଷିମନ୍ତ୍ରୀ । ଆଉ କହିଥିଲେ ଆଦିବାସୀ କେବେବି ଭିକ ମାଗନ୍ତି ନାହିଁ । ଝରଣା ପାଣି ପିଇ ବଂଚିଯିବେ ସିନା ଆଦିବାସୀ ଭିକ ମାଗିବେ ନାହିଁ । ହେଲେ ବ୍ରାହ୍ମଣ ହାତ ପତେଇ ସମସ୍ତଙ୍କୁ ଭିକ ମାଗନ୍ତି । ବସଷ୍ଟାଣ୍ଡରେ ବ୍ରାହ୍ମଣଙ୍କୁ ଏମିତି ହାତ ପତେଇ ଭିକ ମାଗୁଥିବାର ଦୃଶ୍ୟ ଦେଖିବାକୁ ମିଳେ ବୋଲି କହିଥିଲେ କୃଷିମନ୍ତ୍ରୀ ଡାକ୍ତର ଦାମୋଦର ରାଉତ ।
ଦାମଙ୍କ ଏଭଳି ବୟାନକୁ ପ୍ରତିବାଦ କରି ରାଜ୍ୟର ବିଭିନ୍ନ ସ୍ଥାନରେ ଗତକାଲି ବିରୋଧ ପ୍ରଦର୍ଶନ ହୋଇଥିଲା । କୃଷିମନ୍ତ୍ରୀ ଦାମୋଦର ରାଉତଙ୍କ କ୍ଷମା ପ୍ରାର୍ଥନା ଦାବି କରିଥିଲେ ବ୍ରାହ୍ମଣ ସମାଜ । ମାଲକାନଗିରିରେ ମନ୍ତ୍ରୀଙ୍କ ଏପରି ମନ୍ତବ୍ୟ ବ୍ରାହ୍ମଣଙ୍କ ମନରେ ନିଆଁ ଲଗାଇ ଦେଇଥିଲା । ଆଉ ପ୍ରତିବାଦର ନିଆଁ ତୀବ୍ର ହୋଇଥିଲା । ତେବେ ଏହି ଘଟଣା ରାଜ୍ୟ ରାଜନୀତିକୁ ଗରମ କରୁଥିବା ବେଳେ ବିରୋଧୀ ଦଳ ଏହାକୁ ନେଇ ତୁମ୍ବି ତୋଫାନ ଆରମ୍ଭ କରିଥିଲେ । ଜାତିବାଦର ଜହର ଓଡ଼ିଶାରେ ଅନ୍ୟରାଜ୍ୟ ତୁଳନାରେ ଅତି ନଗନ୍ୟ ଥିଲେ ସୁଦ୍ଧା ମୌକାରେ ଚୌକା ମାରିକାକୁ ପଛାଇ ନଥିଲେ ପ୍ରତିପକ୍ଷ ଦଳରେ ଥିବା ନେତା । ବିଜେପି କହିଥିଲା, ବ୍ରାହ୍ମଣଙ୍କ ପ୍ରତି ଏଭଳି ମନ୍ତବ୍ୟ ଆଦୌ ଗ୍ରହଣୀୟ ନୁହେଁ । ଏଥିପାଇଁ ଓଡ଼ିଶାବାସୀଙ୍କ ଆଗରେ ମନ୍ତ୍ରୀ ଦାମ ରାଉତ କ୍ଷମା ମାଗିବା ଉଚିତ ଏବଂ ମୁଖ୍ୟମନ୍ତ୍ରୀ ଏ ବାବଦରେ ସ୍ପଷ୍ଟୀକରଣ ରଖନ୍ତୁ ବୋଲି ଦଳ ଦାବି କରିଥିଲା । ସେହିଭଳି କଂଗ୍ରେସ ମଧ୍ୟ କହିଥିଲା ବ୍ରାହ୍ମଣଙ୍କ ପ୍ରତି ଏଭଳି ମନ୍ତବ୍ୟ ଅଶୋଭନୀୟ ।