ନାଗାବଳୀ ଉପରେ ସରୁନି ବିଜୁ ସେତୁ ନିର୍ମାଣ: ୨୦୧୯ରୁ ଆରମ୍ଭ ହୋଇଥିବା କାମ ଏବେ ବି ଅଧାରେ
କନକ ବ୍ୟୁରୋ: ସଂଯୋଗ ହୋଇପାରୁନି ବିଜୁ ସେତୁ । ସମୟ ସୀମା ଶେଷ ପରେ ବି ଅଧାପନ୍ତରିଆ ହୋଇ ପଡିରହଛି ପୋଲ କାମ । ଫଳରେ ନାଗାବଳୀ ନଦୀର ଆରପଟେ ଥିବା ଦୁଇଟି ପଚାଂୟତର ପ୍ରାୟ ୩୦ ଖଣ୍ଡ ଗ୍ରାମବାସୀ ଲୋକ ବହୁ ଦୁର୍ଦ୍ଧଶାର ସମ୍ମୁଖିନ ହଉଛନ୍ତି । ଜୀବନକୁ ବାଜି ଲଗାଇ ବେକେ ପାଣିରେ ପଶି ଯା’ଆସ କରୁଛନ୍ତି । ରାୟଗଡାରୁ ଦେଖନ୍ତୁ ଏହି ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଆପଣ ହୁଏତ କେବେ ଦେଖିନଥିବେ କୌଣସି ନେତା କି ସରକାରୀ ବାବୁଙ୍କୁ ଏମିତି ପାଣି ପାରିହୋଇ ଯାତ୍ରା କରୁଥିବେ । କାରଣ ବାବୁଙ୍କ ଗମନାଗମନ ପାଇଁ ଚକାଚକ୍ ରାସ୍ତା ଥାଏ, ନେତା ବଡବଡ ଗାଡିରେ ଲୋକଙ୍କ ପାଖରେ ପହଂଚନ୍ତି । ରାସ୍ତା ନଥିବା କିମ୍ବା ପୋଲ ନଥିବା ନଦୀରେ କେବଳ ଅପହଂଚ ଇଲାକାର ଅସହାୟ ମଣିଷ ଯାତାୟତ କରନ୍ତି ।
ନାଗାବଳୀ ନଦୀ ଆରପଟେ କେରେଡା ଓ ହାଟ ଶେଷଖାଲ ପଂଚାୟତର ୩୦ଟି ଗାଁକୁ ଯୋଗାଯୋଗ ମାଧ୍ୟମ ହେଉଛି ଏହି ଜଳପଥ । ନଦୀ ସେପଟେ ଗାଁ ରହିଥିବା ବେଳେ ଏପଟେ ରହିଛି, ଶିକ୍ଷା, ସ୍ୱାସ୍ଥ୍ୟ ଓ ବଜାର ବ୍ୟବସ୍ଥା । ତେଣୁ ବର୍ଷା ୪ ମାସ ନଗାବଳୀରେ ଏଭଳି ଭୟଙ୍କର ଦୃଶ୍ୟ ଦେଖିବାକୁ ମିଳୁଛି । ବେକେ ପାଣିରେ ପଶି ଯାଆସ କରୁଛନ୍ତି ଛୋଟ ପିଲାଙ୍କ ଠାରୁ ବୃଦ୍ଧବୃଦ୍ଧା ସମସ୍ତେ ।
ନାଗାବଳୀ ସେପଟେ ଥିବା ଗାଁକୁ ସଂଯୋଗ ପାଇଁ ବିଜୁ ସେତୁ ନିର୍ମାଣ ହେଉଛି । ବିଜୁ ସେତୁ ପାଇଁ ୨୦୧୮ ମସିହାରେ ୧୧ କୋଟି ୫୩ ଲକ୍ଷ ୫୦ ହଜାର ଟଙ୍କା ମଂଜୁରି ହୋଇଛି । ୨୦୧୯, ମାର୍ଚ ମାସରୁ ଆରମ୍ଭ ହୋଇଥିବା ପୋଲ ନିର୍ମାଣ କାମ ୨୦୨୧ ମାର୍ଚ୍ଚ ମାସରେ ସାରିବା ପାଇଁ ନିର୍ଦେଶ ରହିଛି । ହେଲେ ଏଯାଏଁ ପୋଲର ୧୦ଟି ପିଲାରରୁ ୪ଟି ପିଲାର ତିଆରି ହୋଇଛି । ୩ଟି ପିଲାରକୁ ସଂଯୋଗ କରି ବିଜୁ ସେତୁ ନିର୍ମାଣ କାମ ଅଟକି ଯାଇଛି ।
ନାଗାବଳୀ ସେପଟେ ଥିବା ୩୦ଟି ଗାଁ ୮ ହଜାରରୁ ଅଧିକ ଲୋକଙ୍କ ପାଇଁ ୧୯୯୩ ମସିହାରୁ ଖିଲିମିସଗୁଡା ସ୍ୱାସ୍ଥ୍ୟ କେନ୍ଦ୍ର ନିର୍ମାଣ ହୋଇଛି । ହେଲେ ଡାକ୍ତରଖାନା ହେବା ଦିନରୁ ଅଚଳ ହୋଇପଡିଛି । ତେଣୁ ରୋଗୀ ଓ ଗର୍ଭବତୀ ମହିଳାଙ୍କୁ ଷ୍ଟ୍ରେଚରରେ ବୋହି ନଦୀ ପାର କରାଉଛନ୍ତି ସଂପର୍କୀୟ ।