କନକ ବ୍ୟୁରୋ: ବର୍ଷ ୨୦୨୨ ଶେଷ ହେଉ ହେଉ ଦୁଇଟି ରାଜ୍ୟରେ ବିଧାନସଭା ନିର୍ବାଚନରେ କଂଗ୍ରେସକୁ ସାମାନ୍ୟ ଆଶ୍ୱସ୍ତି ମିଳିଛି । କାରଣ ଦଳ ହିମାଚଳ ପ୍ରଦେଶରେ ୫ ବର୍ଷ ପରେ ପୁଣିଥରେ ସରକାରକୁ ଫେରିଛି । ସେପଟେ କିନ୍ତୁ ଗୁଜରାଟରେ ସବୁଠାରୁ ବଡ ପରାଜୟ ମିଳିଛି । ୧୮୨ରୁ ମାତ୍ର ୨୦ ସିଟ୍ ହାତେଇଛି ଦଳ । ମାତ୍ର କିଛି ମାସର ଅପେକ୍ଷା ପରେ ଦଳ ୩ ରାଜ୍ୟରେ ଶାସନରେ କରିଛି । କିନ୍ତୁ, କେନ୍ଦ୍ରସ୍ତରରେ ଦଳର ସ୍ଥିତି ଦୁର୍ବଳ ହୋଇଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ମାର୍ଚ୍ଚ ମାସରେ ପଞ୍ଜାବ ବିଧାନସଭା ନିର୍ବାଚନରେ ଦଳକୁ ଜୋରଦାର ଝଟକା ମିଳିଥିଲା ଏହି ପରାଜୟ ପରେ ଦଳ କେବଳ ରାଜସ୍ଥାନ ଏବଂ ଛତିଶଗଡରେ ସରକାରରେ ରହିଛି । ତେବେ ବର୍ଷ ଶେଷ ହେଉ ହେଉ ଦଳ ୩ ରାଜ୍ୟରେ ସରକାରରେ ରହିଛି । କଂଗ୍ରେସ ଲଗାତର ନିଜ ପାଇଁ ଗାତ ଖୋଳିଚାଲିଛି । ଗତ ୮ ବର୍ଷରେ ୪୭ ବିଧାନସଭା ନିର୍ବାଚନରେ ମାତ୍ର ୬ଟି କଂଗ୍ରେସ ସପକ୍ଷରେ ଯାଇଛି ।
୨୦୦୬ରେ କଂଗ୍ରେସ ଶାସିତ ରାଜ୍ୟ ସଂଖ୍ୟା ୧୬ ଥିଲା । ଆଜି କିନ୍ତୁ ଏହି ସଂଖ୍ୟା ୩ରାଜ୍ୟରେ ପହଞ୍ଚିଛି । ୧୯୯୮ରେ ସୋନିଆ ଗାନ୍ଧୀ କଂଗ୍ରେସ ଅଧ୍ୟକ୍ଷ ହେବା ପରେ ସେତେବେଳେ ଦଳର ୧୦ ମୁଖ୍ୟମନ୍ତ୍ରୀ ରହିଥିଲେ । ୨୦୦୬ରେ ଏହା ବଢି ୧୬ରେ ପହଞ୍ଚିଥିଲା । ଗତ ୨ ଲୋକସଭା ନିର୍ବାଚନରେ କଂଗ୍ରେସର ଦୁର୍ଗତୀ ହୋଇଛି । ୨୦୧୪ରେ କଂଗ୍ରେସ ମାତ୍ର ୪୪ ଏବଂ ୨୦୧୯ରେ ଦଳ ମାତ୍ର ୫୨ଟି ଲୋକସଭା ଆସନ ଜିତିପାରିଥିଲା । ୨୦୧୪ ନିର୍ବାଚନରେ କଂଗ୍ରେସ ୨୦୦୯ ତୁଳନାରେ ୨୦୬ଟି ଆସନ ହରାଇଥିଲା । ହିମାଚଳ ପ୍ରଦେଶରେ କଂଗ୍ରେସ ସିନା ସରକାରକୁ ଆସିଛି କିନ୍ତୁ, ଫଳାଫଳ କହୁଛି ଯେ ସେଠାରେ କଂଗ୍ରେସର ସ୍ଥିତି ଅନୁକୂଳ ନାହିଁ । କଂଗ୍ରେସ ହିମାଚଳରେ ୪୩.୯୦ ପ୍ରତିଶତ ଭୋଟ ପାଇଥିବା ବେଳେ ଭାଜପା ୪୩ ପ୍ରତିଶତ ଭୋଟ ପାଇଛି । ଏହି ଅନୁପାତକୁ ଯଦି ଦେଖିବା କଂଗ୍ରେସ ମାତ୍ର ଦଶମିକ ୯୦ ପ୍ରତିଶତ ଭୋଟ ଅଧିକ ପାଇଛି । କଂଗ୍ରେସ ୬୮ ଆସନରୁ ୪୦ ଆସନରେ ବିଜୟ ହାସଲ କରିଛି ।
ତେବେ ନିର୍ବାଚନରେ ୪୩ ପ୍ରତିଶତ ଭୋଟ ପାଇଥିଲେ ବି ବିଜେପି ମାତ୍ର ୨୫ ସିଟରେ ବିଜୟୀ ହୋଇଛି । ଅନେକ ଆସନରେ ମାତ୍ର କିଛି ଭୋଟରେ ହାର-ଜିତ ସ୍ପଷ୍ଟ ହୋଇଛି । ଗତ ବିଧାନସଭା ନିର୍ବାଚନ ତୁଳନାରେ କଂଗ୍ରେସର ଭୋଟ ପ୍ରତିଶତ ବଢିଛି । ବିଜେପି ଏବଂ କଂଗ୍ରେସ ସମସ୍ତ ୬୮ ଆସନରେ ନିର୍ବାଚନ ଲଢିଥିଲେ ।