୨୦୨୪ରେ ପଦ୍ମପୁର ଷ୍ଟାଇଲରେ ଲଢ଼ିବ ବିଜେଡି । ଦଳୀୟ ନେତାଙ୍କୁ ଏକତାର ମନ୍ତ୍ର ଦେଲେ ନବୀନ ।
କନକ ବ୍ୟୁରୋ: ପଦ୍ମପୁର ବିଜୟ ପରେ ବିଜେଡି ୨୦୨୪ ନିର୍ବାଚନ ବିଜୟର ସ୍ୱପ୍ନ ଦେଖୁଛି । ଆଉ ସେହି ଅନୁସାରେ ଆଗାମୀ ନିର୍ବାଚନ ଲଢ଼ିବାକୁ ରଣନୀତି ପ୍ରସ୍ତୁତ କରୁଛି । ଯେଉଁ ଷ୍ଟାଇଲରେ ପଦ୍ମପୁରରେ ଲଢ଼େଇ କରି ବିଜେଡି ବିଜୟୀ ହୋଇଛି, ଠିକ୍ ସେହି ଶୈଳୀରେ ୨୦୨୪ ନିର୍ବାଚନ ଲଢ଼ିବାକୁ ଯୋଜନା କରୁଛି । ଆଜି ଏନେଇ ଆଜି ଦଳୀୟ କର୍ମୀ ଓ ନେତାଙ୍କୁ ଟିପ୍ସ ଦେଇଛନ୍ତି ବିଜେଡି ସୁପ୍ରିମୋ ।
Kanak News is now on WhatsApp
Join and get latest news updates delivered to you via WhatsApp
ପଦ୍ମପୁର ବିଜୟର ଉର୍ଜା ଏବଂ ଆଗାମୀ ଲଢ଼େଇ ପାଇଁ ଉତ୍ସାହ ନେଇ ଯେତେବେଳେ ଜଣେ ପରେ ଜଣେ ବିଜେଡି ନେତା ନବୀନ ନିବାସରେ ପ୍ରବେଶ କରୁଥିଲେ, ସ୍ପଷ୍ଟ ବାରି ହୋଇପଡ଼ୁଥିଲା ବିଜେଡିର ମନୋବଳ । ବିଜୟ ପାଇଁ ଦଳୀୟ ନେତାଙ୍କୁ ସାଧୁବାଦ ଦେବା ପରେ ଦଳୀୟ ନେତାଙ୍କୁ ୨୦୨୪ ପାଇଁ ମନ୍ତ୍ରଣା କରିଥିଲେ ବିଜେଡି ସୁପ୍ରିମୋ । ଦୀର୍ଘ ୨ ଘଣ୍ଟାର ମାନସମନ୍ଥନ ପରେ ଆଗାମୀ ଲଢ଼େଇ ପାଇଁ ଆହ୍ୱାନ ଦେଇଥିଲେ ନବୀନ ।
- ପଦ୍ମପୁର ଷ୍ଟାଇଲରେ ନିର୍ବାଚନ ଲଢ଼ିବ ବିଜେଡ଼ି
- ନେତାଙ୍କୁ ଏକାତାର ମନ୍ତ୍ର ଦେଲେ ବିଜେଡି ସୁପ୍ରିମୋ
ବିଜେଡିର ସମୀକ୍ଷା ବୈଠକରେ ପଦ୍ମପୁର ବିଜୟର ଉତ୍ସାହ ନେଇ ଯେମିତି ଚର୍ଚ୍ଚା ହୋଇଥିଲା, ଠିକ୍ ସେମିତି ଆଗାମୀ ନିର୍ବାଚନ ପାଇଁ ଖସଡ଼ା ପ୍ରସ୍ତୁତ ହୋଇଥିଲା । ପଦ୍ମପୁରରେ ଯେଉଁ ରଣନୀତି ଆପଣାଇଥିଲା ଦଳ, ସେଇ ସମାନ ରଣନୀତି ନେଇ ଆଗକୁ ବଢ଼ିବାକୁ ଆହ୍ୱାନ ଦେଇଥିଲେ ସୁପ୍ରିମୋ । ଧାମନଗରରେ ଯେଉଁ ଦୁର୍ବଳତା ଥିଲା ତାକୁ ଅତିକ୍ରମ କରି ଦଳୀୟ ନେତାଙ୍କୁ ଏକାଠି ହୋଇ ଲଢ଼ିବାକୁ କହିଥିଲେ ନବୀନ ।
- ବୁଥ୍ ବଦଳରେ ୱାର୍ଡ ସ୍ତରରେ ସଂଗଠନକୁ ମଜବୁତ କରିବା
- ନବୀନଙ୍କ ବାର୍ତ୍ତାକୁ ତୃଣମୂଳସ୍ତରରେ ପହଞ୍ଚାଇବା
- ଦଳୀୟ ନେତାଙ୍କ ଭିତରେ ଉତ୍ତମ ସମନ୍ୱୟ ରକ୍ଷା କରିବା
- ପଦ୍ମପୁରରେ ନେତୃତ୍ୱ ନେଇଥିବା ନେତାଙ୍କୁ ଗୁରୁଦାୟିତ୍ୱ ଦେବା
ଏହିଭଳି ପ୍ରମୁଖ ପ୍ରସଙ୍ଗରେ ଆଲୋଚନା ହୋଇଥିଲା । ସେହିପରି ଖୁବଶୀଘ୍ର ନବୀନ ପଦ୍ମପୁର ଯାଇ, ନିର୍ବାଚନ ସମୟରେ ଦିଆଯାଇଥିବା ପ୍ରତିଶ୍ରୁତି ସମ୍ପର୍କରେ ଲୋକଙ୍କୁ ଅବଗତ କରିବେ । ତେବେ ଆଗୁଆ ନିର୍ବାଚନ ଚର୍ଚ୍ଚା ଭିତରେ ଦଳ ପ୍ରସ୍ତୁତ ଥିବା କହିଛନ୍ତି ବିଜେଡିର ତୁଙ୍ଗ ନେତା ।
ଅନ୍ୟପଟେ ବିରୋଧୀ ବିଜେପି ଦଳ ମଧ୍ୟ ୨୦୨୪ ପାଇଁ ପ୍ରସ୍ତୁତି ଆରମ୍ଭ କରିଦେଇଛି । ଯଦି ଆଗୁଆ ନିର୍ବାଚନ ହୁଏ, ସେଥିପାଇଁ ଦଳ ପ୍ରସ୍ତୁତ ଥିବା କହିଛି ବିଜେପି । ମୁଖ୍ୟତଃ ଚାଷୀ, ମହିଳା ନିର୍ଯାତନା ଓ ବେରୋଜଗାରୀ ଭଳି ୩ଟି ପ୍ରସଙ୍ଗକୁ ନେଇ ଲୋକଙ୍କ ପାଖକୁ ଯିବ ବୋଲି କହିଛନ୍ତି ରାଜ୍ୟ ବିଜେପିର ସାଧାରଣ ସମ୍ପାଦକ । ତେବେ ନିଜର ଦୁର୍ବଳତା ଲୁଚାଇବା ପାଇଁ ବିଜେଡିର ଆଗୁଆ ପ୍ରସ୍ତୁତ ହେଉଛି ବୋଲି ବିଜେପି ଅଭିଯୋଗ କରିଛି । ତେବେ ରାଜନୀତିର ଏହି ପ୍ରତିଦ୍ୱନ୍ଦ୍ୱିତା ଭିତରେ ପ୍ରଶ୍ନ ହେଉଛି, ଆଗୁଆ ହେବ କି ସାଧାରଣ ନିର୍ବାଚନ ?ଆଗୁଆ ନିର୍ବାଚନ ପାଇଁ ଆରମ୍ଭ ହୋଇଯାଇଛି କି ପ୍ରସ୍ତୁତି ?