ବିଜେପି ନେତା ବସି ନିଷ୍ପତ୍ତି ନିଅନ୍ତୁ, କେଉଁ ରାଜ୍ୟକୁ କରିବେ ନମ୍ବର-୧? କେନ୍ଦ୍ର ବିଜେପି ନେତାଙ୍କୁ ପାଣ୍ଡିଆନଙ୍କ ତେରଛା ବାଣ ।
କନକ ବ୍ୟୁରୋ : ଅନୁଗୁଳରେ ବିଜେପି ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛନ୍ତି ଭିକେ ପାଣ୍ଡିଆନ । ଓଡ଼ିଶାକୁ ବାରମ୍ବାର ଆସି ପ୍ରଚାର କରୁଥିବା କେନ୍ଦ୍ରୀୟ ନେତାଙ୍କୁ ପ୍ରଶ୍ନବାଣ ମାରିଛନ୍ତି ପାଣ୍ଡିଆନ । ଜନସଭାରେ ପାଣ୍ଡିଆନ କହିଛନ୍ତି, ବିଜେପିର ୩ ଜଣ ମୁଖ୍ୟମନ୍ତ୍ରୀ ଅନ୍ୟ ରାଜ୍ୟରୁ ଆସି ଓଡ଼ିଶାରେ ବୁଲୁଛନ୍ତି । କେନ୍ଦ୍ରମନ୍ତ୍ରୀ, ପ୍ରଧାନମନ୍ତ୍ରୀ ବାରମ୍ବାର ଓଡ଼ିଶା ଆସି ବୁଲୁଛନ୍ତି । ସମସ୍ତେ ଆସି କହୁଛନ୍ତି ଓଡ଼ିଶାକୁ ଏକ ନମ୍ବର କରିବୁ । ଓଡ଼ିଶାକୁ ଯଦି ଏମାନେ ଏକ ନମ୍ବର କରିବେ, ତେବେ ନିଜ ରାଜ୍ୟକୁ କଣ କରିବେ । ବିଜେପି ପ୍ରଥମେ ନିଜର ସଂସଦୀୟ ଦଳ ବୈଠକ କରି କେଉଁ ରାଜ୍ୟକୁ ଏକ ନମ୍ବର କରିବେ ସେନେଇ ନିଷ୍ପତ୍ତି ନିଅନ୍ତୁ । ସେନେଇ ନିଷ୍ପତ୍ତି ନେବା ପରେ ଦେଶର ଏକ ନମ୍ବର ମୁଖ୍ୟମନ୍ତ୍ରୀଙ୍କ ପାଖକୁ ଆସି କେମିତି ରାଜ୍ୟକୁ ଏକ ନମ୍ବର କରାଯିବ ସେନେଇ ପରାମର୍ଶ ନିଅନ୍ତୁ । ଗୁଜୁରାଟରେ ୨୫ ବର୍ଷ ଡବଲ ଇଞ୍ଜିନ ସରକାର ଚାଲିଛି, କିନ୍ତୁ ଗୁଜୁରାଟକୁ ଏକ ନମ୍ବର କରିପାରିଲେ କି? ଯେଉଁଠି ଡବଲ ଇଞ୍ଜିନ ଚାଲୁଥିଲା, ସବୁଠି ଓଲଟିପଡିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଓଡ଼ିଶାବାସୀଙ୍କ ଆଶୀର୍ବାଦ ଜରିଆରେ ହିଁ ଓଡ଼ିଶା ଏକ ନମ୍ବରରେ ପହଞ୍ଚିପାରିବ ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶା ବାହାରୁ ଆସି ଲୋକପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅସମ୍ମାନ କରିଥିବା ଲୋକଙ୍କୁ ଉଚିତ୍ ଜବାବ ଦେବେ ଓଡ଼ିଶାବାସୀ । ଆସନ୍ତା ୨୫ ତାରିଖରେ ବହୁ ସଂଖ୍ୟାରେ ମତଦାନ କରିବା ସହ ଏଭଳି ନେତାଙ୍କୁ ମୁହଁତୋଡ ଜବାବ ଦେବାକୁ ଆହ୍ୱାନ ଦେଇଛନ୍ତି ପାଣ୍ଡିଆନ ।
ଏହାପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରି ପାଣ୍ଡିଆନ କହିଥିଲେ, କେନ୍ଦ୍ରମନ୍ତ୍ରୀ ଏହି ମାଟିର ପୁଅ ହୋଇଥିଲେ ମଧ୍ୟ ନିଜକୁ ସମ୍ବଲପୁରକୁ କୋରିଅର କରି ନେଇଛନ୍ତି । ନିଜ ଜନ୍ମମାଟିରେ ଛିଡା ନହୋଇ ଡରିକି ଚାଲିଗଲେ କେନ୍ଦ୍ରମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ପ୍ରତି ଅନୁଗୁଳବାସୀଙ୍କ ଭଲପାଇବା ଦେଖି କେନ୍ଦ୍ରମନ୍ତ୍ରୀ ସମ୍ବଲପୁରକୁ ଡରିକି ପଳାଇଲେ ବୋଲି କହିଛନ୍ତି ପାଣ୍ଡିଆନ ।