ଖବର ପ୍ରସାରଣ ପରେ ପୋଲିସର କାର୍ଯ୍ୟାନୁଷ୍ଠାନ: ପ୍ରତିଜ୍ଞା ନିଶା ନିବାରଣ କେନ୍ଦ୍ର ମାଲିକ ଅବନି ପତିକୁ ଗିରଫ କଲା ବାରିପଦା ପୋଲିସ
କନକ ବ୍ୟୁରୋ: ଖବର ପ୍ରସାରଣ ପରେ ପ୍ରତିଜ୍ଞା ନିଶାନିବାରଣ କେନ୍ଦ୍ର ମାଲିକ ଅବନୀ ପତିଙ୍କୁ ଗିରଫ କଲା ବାରିପଦା ପୋଲିସ । ଆଇନଜୀବୀ କହିଲେ ଦୁଇରୁ ଚାରି ବର୍ଷ ଧରି ଏପରି କାର୍ଯ୍ୟ ଏହି ନିଶା ନିବାରଣ କେନ୍ଦ୍ରରେ ଚାଲି ଆସୁଛି । ଅବନୀ ପତିଙ୍କ ନାଁରେ ଦୁଇଟି ମାମଲା ରହିଛି । ପୂର୍ବରୁ ହତ୍ୟା ଅଭିଯୋଗରେ ତାଙ୍କ ନାଁରେ ୩୦୨ ଦଫା ଲାଗିଛି । ଅବନୀ ପତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ ଦାବି କଲେ ଆଇନଜୀବୀ । ନିଶାନିବାରଣ କେନ୍ଦ୍ରରେ ଜଣେ ଦିବ୍ୟାଙ୍ଗଙ୍କୁ ମାଡ ମାରିବାର ଅଭିଯୋଗ ହୋଇଥିଲା । ପ୍ରତିଜ୍ଞା ନିଶାନିବାରଣ କେନ୍ଦ୍ର ମାଲିକ ଅବନୀ ପତି ନିଶାରେ ଚୁର ହୋଇ ଦିବ୍ୟାଙ୍ଗଙ୍କୁ ମାଡ଼ ମାରିଥିବା ଭିଡିଓ ସାମ୍ନାକୁ ଆସିଥିଲା ।
Kanak News is now on WhatsApp
Join and get latest news updates delivered to you via WhatsApp
ହାତରେ ପ୍ଲାଷ୍ଟିକ ପାଇପ୍ ଧରି ମାଡ ମାରୁଥିବା ବେଳେ ସହଯୋଗୀଙ୍କ ପାଦ ଚଟାଉଥିବାର ଭିଡ଼ିଓ ଏବେ ଭାଇରାଲ ହୋଇଥିଲା । ଆଜି କାଲି ଯୁବ ପୀଢିଙ୍କ ମଧ୍ୟରେ ନିଶା ସେବନ ବୃଦ୍ଧି ପାଉଥିବା ବେଳେ ନିଶା ନିବାରଣ କେନ୍ଦ୍ରରେ ଅଛି ନିଦାନ । ନିଶାରୁ ମୁକ୍ତି ପାଇଁ ନିଶାନିବାରଣ କେନ୍ଦ୍ରକୁ ବିଭିନ୍ନ ସ୍ଥାନରୁ ଆସନ୍ତି ଲୋକେ । ନିଶାଖୋର ମାନଙ୍କ ନିଶା ଛଡାଇବା ସହିତ ନିଶାମୁକ୍ତ କରି ସମାଜର ମୁଖ୍ୟ ସ୍ରୋତକୁ ସେମାନଙ୍କୁ ଫେରାଇ ଆଣିବାକୁ ନିଆଯାଏ ସମସ୍ତ ପ୍ରକାରର ଯତ୍ନ । ନିଶା ମୁକ୍ତି ପାଇଁ ପ୍ରଚୁର ଅର୍ଥ ମଧ୍ୟ ବ୍ୟୟ କରାଯାଉଛି । କିଛି ପରିବାର ବର୍ଷ ବର୍ଷ ଧରି ଅର୍ଥ ବ୍ୟୟ କରିଥାନ୍ତି ନିଶାରୁ ମୁକ୍ତି ପାଇଁ । ହେଲେ ଏଠାରେ ସବୁକିଛି ଓଲଟା ଦେଖିବାକୁ ମିଳିଥିଲା । ନିଜେ ମାଲିକ ଅବନୀ ପତି ନିଶାଗ୍ରସ୍ତ ହୋଇ ଜଣେ ଦିବ୍ୟାଙ୍ଗ ଅନ୍ତେବାସୀକୁ ଏଭଳି ଅମାନୁ୍ଷିକ ନିର୍ଯାତନା ଦେବା ଘଟଣା ବିଭିନ୍ନ ମହଲରେ ସମାଲୋଚିତ ହୋଇଥିଲା ।