କନକ ବ୍ୟୁରୋ : ସେକେଣ୍ଡାରୀ ସ୍କୁଲ ସାର୍ଟିଫିକେଟ ପ୍ରଶ୍ନପତ୍ର ପ୍ରଘଟ ମାମଲାରେ ତେଲେଙ୍ଗାନା ବିଜେପି ମୁଖ୍ୟ ବନ୍ଦୀ ସଂଜୟ କୁମାରଙ୍କୁ ଗିରଫ କରାଯାଇଛି । ତାଙ୍କ ଗିରଫ ପରେ ରାଜନୀତି ଜୋର ଧରିଛି । ବିଜେପି ସଂଜୟଙ୍କ ଗିରଫ ପରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ, ଚନ୍ଦ୍ରଶେଖର ରାଓଙ୍କୁ ଧମକ ଦେଇଛି । ବିଜେପି ଦାବି କରିଛି କି ବନ୍ଦୀ ସଂଜୟ କୁମାରଙ୍କୁ ମିଥ୍ୟା ମାମଲାରେ କେସିଆର ଗିରଫ କରାଇଛନ୍ତି । ଏହା ପୂର୍ବରୁ କାଲି ମଧ୍ୟରାତ୍ରରେ ତେଲେଙ୍ଗାନା ପୋଲିସ ବନ୍ଦୀ ସଂଜୟ କୁମାରଙ୍କ କରିମନଗର ସ୍ଥିତ ବାସଭବନରେ ପହଂଚିଥିଲା । ଏହାପରେ ତାଙ୍କୁ ପୋଲିସ ଷ୍ଟେସନ ଅଣାଯାଇଥିଲା । ଏଠାରେ ତାଙ୍କୁ କିଛି ସମୟ ଜେରା ପରେ ଗିରଫ କରାଯାଇଛି । ବନ୍ଦୀ ସଂଜୟ କୁମାରଙ୍କ ଗିରଫ ପରେ ବିଜେପି ଆଇଟି ସେଲ ପକ୍ଷରୁ କେସିଆରଙ୍କୁ ଧମକ ଦେଇ କୁହାଯାଇଛି କି, ଏହାର ଫଳାଫଳ ଭଲ ହେବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ବିଜେପି ରାଷ୍ଟ୍ରୀୟ ମୁଖପାତ୍ର ଅମିତ୍ ମାଲବୀୟ ଟ୍ୱିଟ କରି କହିଛନ୍ତି କି, ଅଧାରାତିରେ ପୋଲିସ ଏକ ମନଗଢା କାହାଣୀ ପ୍ରସ୍ତୁତ କରି ବନ୍ଦୀ ସଂଜୟ କୁମାରଙ୍କୁ ଗିରଫ କରିନେଇଛି । କେସିଆର ସରକାରଙ୍କୁ ଏହାର ମୂଲ୍ୟ ଦେବାକୁ ପଡିବ । ସେପଟେ ବିଜେପିର ମହାସଚିବ ତରୁଣ ଚୁଧ ତାଙ୍କ ଟ୍ୱିଟରରେ ମଧ୍ୟ ସମାନ କଥା ଲେଖଛନ୍ତି । ବନ୍ଦୀ ସଂଜୟ କୁମାରଙ୍କ ଗିରଫକୁ ନିନ୍ଦା କରିବା ସହ ସେ ଲେଖିଛନ୍ତି କି, ପୋଲିସ ବିଜେପି ବିରୋଧରେ ଏକ ଟୁଲ ପ୍ରସ୍ତୁତ କରିଛି । କେସିଆରଙ୍କୁ ତାଙ୍କ ପାପର ହିସାବ ଦେବାକୁ ପଡିବ ବୋଲି ସେ କହିଛନ୍ତି ।
ଅନ୍ୟପଟେ ବିଜେପିର ରାଜ୍ୟ ମୁଖ୍ୟ ଗିରଫ ହେବା ପରେ ଏହାକୁ ନେଇ ରାଜ୍ୟସାରା ବିଜେପି ତରଫରୁ ପ୍ରଦର୍ଶନ ଆରମ୍ଭ ହୋଇଯାଇଛି । ଗିରଫ ପରେ ବନ୍ଦୀ ସଂଜୟ କୁମାର କହିଛନ୍ତି କି, ବିଆରଏସ ମଧ୍ୟରେ ଭୟ ଜମାଟ ବାନ୍ଧି ସାରିଲାଣି । ପ୍ରଥମେ ମୋତେ ସାମ୍ବାଦିକ ସମ୍ମିଳନୀ କରିବାକୁ ଅନୁମତି ମିଳିଲା ନାହିଁ ଓ ଏବେ ମଧ୍ୟରାତ୍ରରେ ମୋତେ ଗିରଫ କରାଯାଇଛି ବୋଲି ବିଜେପି ତେଲେଙ୍ଗାନା ମୁଖ୍ୟ କହିଛନ୍ତି ।