ଗୁଜରାଟରେ ପରାଜୟ ପରେ ବି ଖୁସି ଅଛନ୍ତି କେଜ୍ରିୱାଲ, ଜାଣନ୍ତୁ କାରଣ
କନକ ବ୍ୟୁରୋ : ଗୁଜରାଟ ଓ ହିମାଚଳ ପ୍ରଦେଶରେ ହୋଇଥିବା ନିର୍ବାଚନ ଫଳାଫଳ ଆସି ସାରିଛି । ଗୁଜରାଟରେ ସପ୍ତମଥର ପାଇଁ ବିଜେପି ସରକାର ଗଠନ କରିବାକୁ ଯାଉଛି । ସେପଟେ ହିମାଚଳରେ ଚିରାଚରିତ ଢଙ୍ଗରେ ଏଥର ପାରି ବଦଳି କ୍ଷମତା କଂଗ୍ରେସ ହାତକୁ ଯାଇଛି । ହେଲେ ଗୁଜରାଟ ନିର୍ବାଚନରେ ଆମ୍ ଆଦମୀ ପାର୍ଟିର ସୂଚନୀୟ ପରାଜୟ ହୋଇଛି । ଆପ୍,ର ରାଷ୍ଟ୍ରୀୟ ଅଧ୍ୟକ୍ଷଙ୍କ ସମେତ ଦଳର ଅନେକ ବରିଷ୍ଠ ନେତା ଗୁଜରାଟରେ ସରକାର ଗଠନ କରିବାକୁ ଦାବି କରୁଥିବା ବେଳେ ଦଳ ଦୁଇଅଙ୍କରେ ପହଂଚିପାରିନାହିଁ । ତଥାପି ଦଳର ରାଷ୍ଟ୍ରୀୟ ଅଧ୍ୟକ୍ଷ ଅରବିନ୍ଦ କେଜ୍ରିୱାଲ ଖୁସିବ୍ୟକ୍ତ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଜିର ଫଳାଫଳ ପରେ କେଜ୍ରିୱାଲ କହିଛନ୍ତି କି, ଆମ୍ ଆଦମୀ ପାର୍ଟି ଏକ ରାଷ୍ଟ୍ରୀୟ ପାର୍ଟିର ମାନ୍ୟତା ପାଇଛି । ଏଥିପାଇଁ ଗୁଜରାଟ ଭୋଟରଙ୍କୁ କେଜ୍ରିୱାଲ ଧନ୍ୟବାଦ ଦେଇଛନ୍ତି । ସେ କହିଛନ୍ତି ଗୁଜରାଟରେ ଦଳକୁ ଯେତେ ଭୋଟ ମିଳିଛି ସେହି ହିସାବରେ ଦଳ ଏବେ ରାଷ୍ଟ୍ରୀୟ ପାର୍ଟିର ମାନ୍ୟତା ପାଇବାକୁ ଯୋଗ୍ୟ ବିବେଚିତ ହୋଇଛି ।
ସେପଟେ କେଜ୍ରିୱାଲ ଦାବି କରିଛନ୍ତି କି କଂଗ୍ରେସ ନୁହେଁ ବରଂ ଆମ୍ ଆଦମୀ ପାର୍ଟି ଗୁଜରାଟରେ ବିଜେପିର ଦୁର୍ଗ ଭାଙ୍ଗିବାରେ ସଫଳ ହେବ । ଏନେଇ ଦଳ ଏକ ସକରାତ୍ମକ କ୍ୟାମ୍ପେନ ଆରମ୍ଭ କରିଥିବା କଥା କେଜ୍ରିୱାଲ ସୂଚନା ଦେଇଛନ୍ତି ।
ତେବେ ଜାଣନ୍ତୁ ରାଷ୍ଟ୍ରୀୟ ପାର୍ଟି ହେବା ପାଇଁ କଣ ରହିଛି ନିୟମ ? ସମ୍ବିଧାନ ବିଶେଷଜ୍ଞ ସୁଭାଷ କଶ୍ୟପଙ୍କ ମୁତାବକ ଏକ ଦଳ ରାଷ୍ଟ୍ରୀୟ ଦଳର ମାନ୍ୟତା ପାଇବାକୁ ହେଲେ ଅତି କମରେ ୪ ଟି ଲୋକସଭା ସିଟ୍ ଜିତିବା ସହ ଲୋକସଭା ନିର୍ବାଚନରେ ୬ ପ୍ରତିଶତ ଭୋଟ ହାସଲ କରିବା ଦରକାର । ନଚେତ ବିଧାନସଭା ନିର୍ବାଚନରେ ୪ କିମ୍ବା ଏହାଠାରୁ ଅଧିକ ରାଜ୍ୟରେ ମୋଟ ୬ ପ୍ରତିଶତରୁ ଅଧିକ ଭୋଟ ହାସଲ କରିବା ଦରକାର । ଏହି କ୍ରମରେ ଆମ୍ ଆଦମୀ ପାର୍ଟି ଗୋଆରେ ୨ ଟି ବିଧାନସଭା ଆସନ ହାତେଇବା ସହ ୬.୭୭ ପ୍ରତିଶତ ଭୋଟ ହାସଲ କରିଛି ।