କେଜ୍ରିୱାଲଙ୍କୁ ଚିଠି ଲେଖିଲେ ସାମାଜିକ କର୍ମୀ ଆନ୍ନା ହଜାରେ, କ୍ଷମତାକୁ ନେଇ କହିଲେ ଏଭଳି କଥା
କନକ ବ୍ୟୁରୋ : ଦିଲ୍ଲୀ ଅବକାରୀ ନୀତିରେ କଥିତ ଦୁର୍ନୀତି ଅଭିଯୋଗକୁ ଏବେ ସାମ୍ନା କରୁଛି ଆମ୍ ଆଦମୀ ପାର୍ଟି । ଏହି କ୍ରମରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଚିଠି ଲେଖିଛନ୍ତି ସାମାଜିକ କର୍ମୀ ଆନ୍ନା ହଜାରେ । ଆନ୍ନା ହଜାରେ ଚିଠି ମାଧ୍ୟମରେ ଅରବିନ୍ଦ କେଜ୍ରିୱାଲଙ୍କୁ କଟାକ୍ଷ କରିଛନ୍ତି । ସେ ଲେଖିଛନ୍ତି କି ‘ଶେଷରେ ତୁମେ ବି କ୍ଷମତା ନିଶାରେ ବୁଡିଗଲ’
Kanak News is now on WhatsApp
Join and get latest news updates delivered to you via WhatsApp
ଆନ୍ନା ହଜାରେ କେଜ୍ରିୱାଲଙ୍କୁ ଲେଖିଥିବା ଚିଠିର ସାରାଂସ ଏଭଳି ରହିଛି ‘ତୁମେ ମୁଖ୍ୟମନ୍ତ୍ରୀ ହେବା ପରେ ଏହା ତୁମ ନିକଟକୁ ମୋର ପ୍ରଥମ ଚିଠି । ପୂର୍ବ କିଛିଦିନ ହେବ ଦିଲ୍ଲୀ ସରକାରଙ୍କ ଅବକାରୀ ନୀତିକୁ ନେଇ ଖବର ଆସୁଛି । ଏହି ଖବର ଶୁଣିବା ଓ ପଢିବା ପରେ ମୁଁ ଦୁଖିତ ଅଛି ’ । ଆନ୍ନା ଆହୁରି ଲେଖିଛନ୍ତି ଯେ ମୁଁ ମହାତ୍ମା ଗାନ୍ଧୀଙ୍କ ଗାଁ କୁ ଚାଲ ବିଚାରରେ ପ୍ରେରିତ ହୋଇ ମୋର ଜୀବନ ଗାଁ ଓ ଦେଶ ପାଇଁ ସମର୍ପିତ କରିଦେଇଛି । ଗତ ୪୭ ବର୍ଷ ଧରି ଗ୍ରାମ ବିକାଶ ପାଇଁ ମୁଁ କାର୍ଯ୍ୟ କରୁଛି ଓ ଏହାସହ ଭ୍ରଷ୍ଟାଚାର ବିରୋଧରେ ଆନ୍ଦୋଳନ ଜାରି ରଖିଛି ।
ଆନ୍ନା ହଜାରେ ଅରବିନ୍ଦ କେଜ୍ରୱାଲଙ୍କୁ ପୁରୁଣା ଦିନର କଥା ମନେ ପକାଇ ଚିଠିରେ ଲେଖିଛନ୍ତି ଯେ, ତୁମେ(କେଜ୍ରିୱାଲ) ଓ ମନୀଷ ସିସୋଦିଆ ଅନେକ ଥର ମୋ ଗାଁ ରାଲେଗଣ ସିଦ୍ଧି ଆସିଛ । ଗାଁ ଲୋକଙ୍କ ଦ୍ୱାରା ହୋଇଥିବା କାମକୁ ବି ଅନୁଧ୍ୟାନ କରିଛ । ଗତ ୩୫ ବର୍ଷ ଧରି ମୋ ଗାଁରେ ବିଡି, ସିଗାରେଟ ଓ ମଦ ବିକ୍ରି କିଭଳି ବନ୍ଦ ହୋଇଛି ତାହା ତୁମେ ଜାଣିଛ । ତୁମେ ଏସବୁକୁ ଦେଖି ପ୍ରେରିତ ହେବା ସହ ପ୍ରଶଂସା ବି କରିଛ ।
ସୂଚନା ଥାଉକି କେଜ୍ରିୱାଲ ରାଜନୀତିକୁ ଆସିବା ପୂର୍ବରୁ ଆନ୍ନା ହଜାରେଙ୍କ ସହ ମିଳିତ ଭାବେ ଲୋକପାଳ ବିଲକୁ ନେଇ ଆନ୍ଦୋଳନ କରିଥିଲେ । ଏହି ଆନ୍ଦୋଳନରୁ କେଜ୍ରିୱାଲଙ୍କ ଲୋକପ୍ରିୟତା ବୃଦ୍ଧି ପାଇଥିଲା । ଏହାକୁ ଆଧାର କରି ସେ କ୍ରମାଗତ ଭାବେ ୩ ଥର ଦିଲ୍ଲୀର ମୁଖ୍ୟମନ୍ତ୍ରୀ ହୋଇପାରିଛନ୍ତି ।