ଆମେରିକା ଓ ଇରାନ ମଧ୍ୟରେ ଥମିନି ଝଡ ! ଏବେ ବି ଆକ୍ରମଣ କରିପାରେ ଆମେରିକା
କନକ ବ୍ୟୁରୋ : ଆମେରିକାର ମାନବ ବିହୀନ ଗୁଇନ୍ଦା ଡ୍ରୋନ୍କୁ ଇରାନ୍ କ୍ଷେପଣାସ୍ତ୍ର ମାଡ଼ କରି ଖସାଇବା ପରେ ଦୁଇ ଦେଶ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଆମେରିକା ଏବଂ ଏହାର ମିତ୍ର ରାଷ୍ଟ୍ରମାନେ ଇରାନ୍ ବିରୋଧରେ କୌଣସି ସାମରିକ ଶକ୍ତି ପ୍ରୟୋଗ କଲେ ଏହାର ଭୟଙ୍କର ଜବାବ ଦିଆଯିବ ବୋଲି ଇରାନ୍ ଚେତାବନୀ ଦେଇଛି। ଇରାନ୍ ସେନାର ପ୍ରବକ୍ତା ଅବୁଲଫଜନ ସେକାର୍ଚି କହିଛନ୍ତି ଇରାନ୍ ଉପରେ ଆମେରିକା କିମ୍ବା ଏହାର କୌଣସି ସହଯୋଗୀ ରାଷ୍ଟ୍ରର ସାମାନ୍ୟତମ କାର୍ଯ୍ୟାନୁଷ୍ଠାନ ବି ପ୍ରଳୟ ସୃଷ୍ଟି କରିବ।
Kanak News is now on WhatsApp
Join and get latest news updates delivered to you via WhatsApp
ଇରାନ୍ ନିଜର ବାୟୁସୀମା ମଧ୍ୟରେ ଆମେରିକାର ଗୁଇନ୍ଦା ଡ୍ରୋନ୍କୁ ଖସାଇଛି ଏବଂ ଏହା ଆମ ଅଧିକାର ପରିସରଭୁକ୍ତ ବୋଲି ସେ କହିଛନ୍ତି। ଅନ୍ୟପକ୍ଷରେ ଆମେରିକା ପୁଣି କହିଛି ଯେ ଇରାନ୍ ଅନ୍ତର୍ଜାତୀୟ ବାୟୁସୀମାରେ ଡ୍ରୋନ୍କୁ ଖସାଇଥିବାରୁ ଏହା ବିରୋଧରେ କାର୍ଯ୍ୟାନୁଷ୍ଠାନ ସୁନିଶ୍ଚିତ। ଆମେରିକାର ୧୩ କୋଟି ଡଲାର ମୂଲ୍ୟର ମାନବବିହୀନ ଗୁଇନ୍ଦା ଡ୍ରୋନ୍କୁ ଇରାନ୍ ଧ୍ବଂସ କରିବା ଏବଂ ଭଗ୍ନାବଶେଷ ଗଣମାଧ୍ୟମକୁ ଦେଖାଇଥିବାରୁ ଯେ କୌଣସି ମୁହୂର୍ତ୍ତରେ ଆମେରିକା ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିବା ଆଶଙ୍କା ରହିଛି।
ଇରାନ୍ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମଂଜୁରି ଦେଇଥିଲେ। କିନ୍ତୁ କିଛି ମିନିଟ୍ ମଧ୍ୟରେ ସେ ତାଙ୍କ ନିଷ୍ପତ୍ତି ବଦଳାଇ ଦେଇଥିଲେ। ନ୍ୟୁୟର୍କ ଟାଇମ୍ସରେ ପ୍ରକାଶିତ ରିପୋର୍ଟ ମୁତାବକ ଇରାନର ରାଡାର ବ୍ୟବସ୍ଥା ଏବଂ କ୍ଷେପଣାସ୍ତ୍ର ବ୍ୟବସ୍ଥା ଉପରେ ଆକ୍ରମଣ ପାଇଁ ଟ୍ରମ୍ଫ ମଂଜୁରି ଦେଇଥିଲେ। ତେବେ କୌଣସି ବଡ଼ ଯୁଦ୍ଧ ଆରମ୍ଭ ହୋଇଯିବା କିମ୍ବା ଇରାନର ସାଧାରଣ ନାଗରିକଙ୍କ ମୃତାହତ ଆଶଙ୍କାରେ ଅଚାନକ ଟ୍ରମ୍ପ୍ ତାଙ୍କ ନିଷ୍ପତ୍ତି ବଦଳାଇ ଆକ୍ରମଣକୁ ସ୍ଥଗିତ ରଖିବାକୁ ନିର୍ଦ୍ଦେଶ ଦେଇଥିଲେ।