ଗୋଟିଏ ଟେବୁଲରେ ବସେଇ ଅକ୍ଷୟ-ଶ୍ରଦ୍ଧାଞ୍ଜଳିଙ୍କୁ ଜେରା । ପୁରୁଣା ପୃଷ୍ଟାରୁ ଅର୍ଥ କାରବାରର ଖିଅ ଖୋଜୁଛି ଇଡି
କନକ ବ୍ୟୁରୋ: ଅର୍ଚ୍ଚନା ନାଗ ମାମଲାରେ ଚାଲିଛି ଇଡିର ଖୋଳତାଡ । ଆଜି ଦ୍ୱିତୀୟ ଦିନ ପାଇଁ ଇଡିରେ ହାଜର ହୋଇଛନ୍ତି ଫିଲ୍ମ ପ୍ରଯୋଜକ ଅକ୍ଷୟ ପରିଜା । ଖାଲି ଅକ୍ଷୟ ନୁହେଁ, ଇଡି ଅଫିସରେ ବି ହାଜର ହେଇଛନ୍ତି ଶ୍ରଦ୍ଧାଞ୍ଜଳି ବେହେରା । ତାଙ୍କୁ ଗୁଡ଼େଇ ତୁଡ଼େଇ ପ୍ରଶ୍ନ କରିଛନ୍ତି ଇଡି ଅଧିକାରୀ । ତେବେ ଆଜି ଅକ୍ଷୟ-ଶ୍ରଦ୍ଧାଞ୍ଜଳିଙ୍କୁ ଗୋଟିଏ ଟେବୁଲରେ ଜେରା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମାଷ୍ଟର ମାଇଣ୍ଡ ଅର୍ଚ୍ଚନା ନାଗ, ଫିଲ୍ମ ପ୍ରଯୋଜକ ଅକ୍ଷୟ ପରିଜା ଏବଂ ଲୁଚକାଳି ଖେଳ ଖେଳୁଥିବା ଶ୍ରଦ୍ଧାଞ୍ଜଳି ବେହେରା – ସୋସିଆଲ ମିଡ଼ିଆରୁ ଆରମ୍ଭ ହୋଇଥିବା ଏକ ସମ୍ପର୍କ, ସମୟକ୍ରମେ ଏଭଳି ରୂପରେ ସାମ୍ନାରେ ଆସିଛି, ଯେଉଁଠି ରହିଛି ସେକ୍ସର୍ଟସନ୍, ଏକ୍ସର୍ଟସନ୍ ଓ ଲକ୍ଷ ଲକ୍ଷ ଟଙ୍କାର କାରବାର । ଅକ୍ଷୟ ପରିଜାଙ୍କ ଅନ୍ତରଙ୍ଗ ମୁହୁର୍ତ୍ତର ଭିଡିଓ ଏବଂ ଭିଡିଓକୁ ନେଇ ବ୍ଲାକ୍ମେଲିଂ ଅଭିଯୋଗ ଭିତରେ ସାମ୍ନାକୁ ଆସିଥିଲା ଶ୍ରଦ୍ଧାଞ୍ଜଳି ବେହେରାଙ୍କ ନାଁ । ଆଉ ଗୋଟିଏ ଗୋଟିଏ ବିନ୍ଦୁ ଯୋଡ଼ି ହୋଇଥିବା ପରେ ପ୍ରଚ୍ଛଦପଟ୍ଟରେ ଥିଲେ ପୂରା ଘଟଣାକ୍ରମର ମାଷ୍ଟର ମାଇଣ୍ଡ ଅର୍ଚ୍ଚନା ନାଗ ।
- ଘାଣ୍ଟୁଛି ପ୍ରବର୍ତ୍ତର୍ନ ନିର୍ଦ୍ଦେଶାଳୟ
- ପୁରୁଣା ପୃଷ୍ଟାରୁ ଖୋଜୁଛି ଅର୍ଥ କାରବାରର ଖିଅ
ଆଜି ଇଡିରେ ଶ୍ରଦ୍ଧାଞ୍ଜଳି ହାଜର ହୋଇଥିବା ବେଳେ ସାମ୍ନାକୁ ଆସିଛି ତାଙ୍କର କିଛି ଭିଡିଓ । ଯାହା ପ୍ରମାଣ କରିଦେଉଛି, ଫିଲ୍ମ ଓ ମନୋରଞ୍ଜନ ଦୁନିଆ ପ୍ରତି ତାଙ୍କର କେତେ ବଡ଼ ଆକର୍ଷଣ ଥିଲା । ଆଉ ଏହି ଆକର୍ଷଣ, ଫିଲ୍ମ ପ୍ରଯୋଜକଙ୍କ ସହ ସମ୍ପର୍କ ସ୍ଥାପନ ପାଇଁ ହୁଏତ ଖୋରାକ ଯୋଗାଇ ଥିଲା । ପ୍ରାୟ ଗୋଟିଏ ସପ୍ତାହ ଯାଏଁ ଧରାଛୁଆଁ ଦେଉଥିବା ଶ୍ରଦ୍ଧାଞ୍ଜଳିଙ୍କୁ ଏବେ ଗୁଡ଼େଇ ତୁଡ଼େଇ ପ୍ରଶ୍ନ କରିଛନ୍ତି ଇଡି ଅଧିକାରୀ । ଚକମା ଦେଇ ଲୁଚିଛପି ବୁଲୁଥିବା ଶ୍ରଦ୍ଧାଞ୍ଜଳି, ଇଡିରେ ହାଜର ହେବା ପୂର୍ବରୁ ୨୫ଟି ଲୋକେସନ୍ ବି ବଦଳାଇଥିଲେ । ହେଲେ ଏବେ ଇଡି ପଞ୍ଝାରେ ଶ୍ରଦ୍ଧାଞ୍ଜଳି ବେହେରା ।
ସେପଟେ କ୍ରମାଗତ ଦ୍ୱିତୀୟଦିନ ପାଇଁ ଇଡି ଜେରାର ସମ୍ମୁଖୀନ ହୋଇଛନ୍ତି ଫିଲ୍ମ ପ୍ରଯୋଜକ ଅକ୍ଷୟ ପରିଜା । ଗତକାଲି ପ୍ରାୟ ୫ ଘଣ୍ଟାର ଜେରା ପରେ ଆଜି ବି ମାରାଥନ ଜେରାର ସମ୍ମୁଖୀନ ହୋଇଛନ୍ତି ଅକ୍ଷୟ । କୁହଯାଉଛି ଉଭୟ ଅକ୍ଷୟ ପରିଜା ଓ ଶ୍ରଦ୍ଧାଞ୍ଜଳି ବେହେରାଙ୍କୁ ମୁହାଁମୁହିଁ ଜେରା କରିପାରେ ପ୍ରବର୍ତ୍ତନ ନିର୍ଦ୍ଦେଶାଳୟ । ଅତି ନାଟକୀୟ ଢ଼ଙ୍ଗରେ ଆରମ୍ଭ ହୋଇଥିଲା ଅକ୍ଷୟ ଏବଂ ଶ୍ରଦ୍ଧାଞ୍ଜଳିଙ୍କ ସମ୍ପର୍କ । ପ୍ରଥମେ ବନ୍ଧୁତା ସ୍ଥାପନ, ପରେ ଫିଲ୍ମରେ ଅଭିନୟ ପାଇଁ ସୁଯୋଗ ଦେବାକୁ ନିବେଦନ । ଏମିତି କି ଶ୍ରଦ୍ଧାଞ୍ଜଳି ପାର୍ଲର କରିବା ପାଇଁ ଅକ୍ଷୟ ପରିଜାଙ୍କୁ ୫ଲକ୍ଷ ଟଙ୍କା ମାଗିଥିଲେ । ହେଲେ ଟଙ୍କା ନଦେବାରୁ ଅନ୍ତରଙ୍ଗ ମୁହୁର୍ତ୍ତର ଭିଡିଓ ଭାଇରାଲ କରିବାର ଅଭିଯୋଗ ହୋଇଥିଲା ।
ପୁରା ବ୍ଲାକମେଲର ମାଷ୍ଟର ମାଇଣ୍ଡ ଥିବା ଅର୍ଚ୍ଚନା ନାଗ, ସେତେବେଳେ ସାମ୍ନାକୁ ଆସିଥିଲେ, ଯେତେବେଳେ ଶ୍ରଦ୍ଧାଞ୍ଜଳି ବେହେରା ଖଣ୍ଡଗିରି ଥାନାରେ ଏତଲା ଦେଇଥିଲେ । ଶ୍ରଦ୍ଧାଞ୍ଜଳିକୁ ମାଧ୍ୟମ କରି ପ୍ରଯୋଜକଙ୍କୁ ଫସାଇବା ନେଇ ଅଭିଯୋଗ ହୋଇଥିଲା । ଅର୍ଚ୍ଚନା ବ୍ଲାକମେଲ କରୁଥିବା, ଥାନାରେ ଫିଲ୍ମ ପ୍ରଯୋଜକ ଅଭିଯୋଗ କରିବା ସହ ଅର୍ଚ୍ଚନା, ଶ୍ରଦ୍ଧାଞ୍ଜଳି କ୍ରାଇମ୍ ପାର୍ଟନର ବୋଲି ଅଭିଯୋଗ ହୋଇଥିଲା । ଶ୍ରଦ୍ଧାଞ୍ଜଳିଙ୍କ ଅଭିଯୋଗ ଆଧାରରେ ଅର୍ଚ୍ଚନା ଗିରଫ ହୋଇଥିବା ବେଳେ ଆର୍ଥିକ କାରବାର ଘଟଣାରେ ଜଣକ ପରେ ଜଣକଙ୍କୁ ଡାକି ଜେରା ଜାରି ରଖିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଚର୍ଚ୍ଚା ହେଉଛି ଏହି ସିଣ୍ଡିକେଟରେ ବଡ଼ ବଡ଼ଙ୍କ ଚେହେରାଙ୍କ ନାଁ ରହିଛି । ଆଗକୁ ଅର୍ଚ୍ଚନାଙ୍କୁ ରିମାଣ୍ଡରେ ଆଣିବ ଇଡି । ଆଶଙ୍କା କରାଯାଉଛି ନିର୍ବାଚନ ପୂର୍ବରୁ ନାଗଫାସରେ ପଡିଥିବା କିଛି ନେତାଙ୍କ ଚେହେରା ସାମ୍ନାକୁ ଆସିପାରେ ।