ଅର୍ପିତାଙ୍କ ଓଡିଶା ଲିଙ୍କ ପରେ ଓଲିଉଡରେ ହଇଚଇ। ନିର୍ଦ୍ଦେଶକ କହିଲେ, ବହୁତ କମ ଟଙ୍କା ନେଉଥିଲେ ଅଭିନେତ୍ରୀ।
କନକ ବ୍ୟୁରୋ: ପଶ୍ଚିମବଙ୍ଗର ଶିକ୍ଷକ ନିଯୁକ୍ତି ଦୁର୍ନୀତି ମାମଲାରେ ଅଭିନେତ୍ରୀ ଅର୍ପିତା ମୁଖାର୍ଜୀଙ୍କ ଘରୁ ୨୦ କୋଟି ଜବତ ହେବା ଘଟଣା ସାରାଦେଶରେ ହଇଚଇ ସୃଷ୍ଟି କରିଛି । ଟିଏମସିର ପାୱାର କରିଡରରରେ ସେ ବେଶ ପ୍ରଭାବଶାଳୀ ଥିଲେ । ଅର୍ପିତାଙ୍କ ଓଡିଶା ଲିଙ୍କ୍ ନେଇ ମଧ୍ୟ ଚର୍ଚ୍ଚା ହେଉଛି । ସେ ଅନେକ ଓଡିଆ ଫିଲ୍ମରେ ଅଭିନୟ କରିଥିଲେ । ଯେଉଁ ନିର୍ଦ୍ଦେଶକ ଅର୍ପିତାଙ୍କ ସହ କାମ କରିଛନ୍ତି ସେମାନେ ଏହି ଅଭିନେତ୍ରୀଙ୍କ ସମ୍ପର୍କରେ ମତ ରଖିଛନ୍ତି । ବନ୍ଦେ ଉକ୍ରଳ ଜନନୀ, ରାଜା ଆୱାର ଭଳି ଫିଲ୍ମରେ ସେ ଅଭିନୟ କରିଛନ୍ତି । ନିର୍ଦ୍ଦେଶକ ବସନ୍ତ ସାହୁଙ୍କ ମତରେ, ଅର୍ପିତା ବହୁ କମ ପାରିଶ୍ରମିକରେ କାମ କରିବାକୁ ରାଜି ହେଉଥିଲେ । ତେଣୁ ଜବତ ଟଙ୍କା ତାଙ୍କ ଫିଲ୍ମ ଟଙ୍କା ବୋଲି କୁହାଯାଇପାରିବ ନାହିଁ । ଏହି ଟଙ୍କାକୁ ତାଙ୍କ ପାଖରେ ଲୁଚାଇ ରଖାଯାଇଥାଇପାରେ । ଟଙ୍କା ଆଉ କାହାର ଓ ଅର୍ପିତା କେବଳ ଏକ ମାଧ୍ୟମ ମାତ୍ର ।
Kanak News is now on WhatsApp
Join and get latest news updates delivered to you via WhatsApp
ଅର୍ପିତା ମୁଖାର୍ଜୀ ଅଭିନୟ କରିଥିବା ଓଡିଶା ଫିଲ୍ମ ମଧ୍ୟରେ ଥିଲା ୨୦୧୦ର ଓଲିଉଡ ଫିଲ୍ମ ତୋର ମୋର ଯୋଡି ସୁନ୍ଦର । ଏହାର ନିର୍ଦ୍ଦେଶକ ଦେବୁ ପଟ୍ଟନାୟକଙ୍କ ମତରେ , ଅର୍ପିତା ଜଣେ ଭଲ କଳାକାର ଥିଲେ । ଏହି ଫିଲ୍ମ ପାଇଁ ସେ ୫୦ ହଜାର ଟଙ୍କା ନେଇଥିଲେ । ଏହି ଘଟଣା ସମ୍ପର୍କରେ ଜାଣିବା ପରେ ସେ ଆଶ୍ଚର୍ଯ୍ୟବୋଲି କହିଛନ୍ତି ଦେବୁ ପଟ୍ଟନାୟକ । ସେହିଭଳି ଅଶୋକ ପତିଙ୍କ ମତରେ, ସେ ଅଭିନିୟରେ ରୁଚି ରଖୁଥିଲେ ।
ଅର୍ପିତା ୭ରୁ ଅଧିକ ଓଡିଆ ଫିଲ୍ମରେ ଅଭିନୟ କରିସାରିଛନ୍ତି । ଏଗୁଡିକ ମଧ୍ୟରୁ ୩ଟି ଫିଲ୍ମରେ ଲିଡ ରୋଲରେ ଅଛନ୍ତି । ୨୦୧୨ରେ ସେ ଶେଷ ଓଡିଆ ଫିଲ୍ମରେ ଅଭିନୟ କରିଥିଲେ । ଏହା ପରେ ସେ ବଙ୍ଗଳା ଫିଲ୍ମରେ ଅଧିକ ସକ୍ରିୟ ଥିଲେ ଓ ଓଲିଉଡରୁ ଦୂରେଇ ଯାଇଥିଲେ ।