୫-ଜି ଯୁଗରେ ଟୁ-ଜିର ସ୍ୱପ୍ନ ଦେଖୁଛି ଓଡ଼ିଶାର ଗ୍ରାମାଞ୍ଚଳ । ରାଜ୍ୟର ଅଲୋଡ଼ା ରେକର୍ଡ, ୬ ହଜାରରୁ ଅଧିକ ଗାଁକୁ ପହଁଚିନାହିଁ ମୋବାଇଲ ସେବା
କନକ ବ୍ୟୁରୋ: ପଞ୍ଚାୟତ ନିର୍ବାଚନରେ ମୋବାଇଲ ନେଟୱର୍କ ନଥିବା ପଞ୍ଚାୟତବାସୀଙ୍କ ପାଇଁ ଏକ ମୁଖ୍ୟ ପ୍ରସଙ୍ଗ ପାଲଟିଛି । ଅନେକ ସ୍ଥାନ ଯେଉଁଠି ନେଟୱର୍କ ନାହିଁ ସେଠାରେ ଭୋଟ୍ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ଭୋଟର । ଗାଁ ଲୋକଙ୍କ ଏପରି ସମସ୍ୟା ଭିତରେ ଆଉ ଏକ ମୁଖ୍ୟ ସମସ୍ୟା ସାମ୍ନାକୁ ଆସିଛି । ଯୋଗାଯୋଗ ମନ୍ତ୍ରାଳୟ ପକ୍ଷରୁ ଲୋକସଭାରେ ପ୍ରକାଶ ପାଇଥିବା ତଥ୍ୟ ଅନୁସାରେ ଓଡିଶାରେ ସର୍ବାଧିକ ୬ ହଜାର ୯୯ଟି ଗାଁକୁ ନାହିଁ ମୋବାଇଲ ସେବା ।
Kanak News is now on WhatsApp
Join and get latest news updates delivered to you via WhatsApp
ପଞ୍ଚାୟତ ନିର୍ବାଚନ ପାଇଁ ଗାଁ ରାଜନୀତି ଜୋରଦାର ହୋଇଥିବାବେଳେ ରାଜ୍ୟର ଦୁଇଟି ସ୍ଥାନରୁ ଆସିଥିଲା ଦୁଇଟି ରୋଚକ ଖବର । ମୋବାଇଲ ଟାୱାର ନଥିବାରୁ ନେଟୱର୍କ ଆସୁନଥିବା ପ୍ରତିବାଦ କରିଥିଲେ ଗାଁ ଲୋକ । ତେବେ ଗାଁ ଲୋକଙ୍କ ସମସ୍ୟା ଭିତରେ ମୋବାଇଲ ସେବାକୁ ନେଇ ଆସିଛି ଆଉ ଏକ ସାଂଘାତିକ ତଥ୍ୟ ।
- ୬ ହଜାର ଗାଁରେ ନାହିଁ ଫୋନ୍, ଇଣ୍ଟରନେଟ୍
- ମୋବାଇଲ ସେବା ପହଞ୍ଚିନଥିବା ସର୍ବାଧିକ ଗାଁ ଓଡିଶାରେ ରହିଛି
- ଯୋଗାଯୋଗ ମନ୍ତ୍ରାଳୟ ପକ୍ଷରୁ ଲୋକସଭାରେ ତଥ୍ୟ ପ୍ରକାଶ
- ଓଡିଶାରେ ସର୍ବାଧିକ ୬୦୯୯ଟି ଗାଁକୁ ନାହିଁ ମୋବାଇଲ ସେବା
- ଦେଶର ୨୫ ହଜାର ୬୭ଟି ଗାଁରେ ନାହିଁ ମୋବାଇଲ ଓ ଇଣ୍ଟରନେଟ୍
ଦେଶରେ ୫-ଜି ସେବା ଆରମ୍ଭ ହେବାକୁ ଯାଉଛି । ଏନେଇ ୨୦୨୨-୨୩ ବଜେଟରେ ସୂଚନା ଦେଇଥିଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ଆଗାମୀ ଆର୍ଥିକ ବର୍ଷରେ ୫-ଜି ସେବା ପାଇଁ ସ୍ପେକଟ୍ରମ ନିଲାମ ହେବ ବୋଲି କହିଥିଲେ । ହେଲେ ଓଡିଶାର ୬ ହଜାରରୁ ଅଧିକ ଗାଁକୁ ଆଦୌ ମୋବାଇଲ ସଂଯୋଗ ନାହିଁ । ପଞ୍ଚାୟତ ନିର୍ବାଚନ ବେଳେ ସଂସଦରେ ଆସିଥିବା ଏଭଳି ସାଂଘାତିକ ତଥ୍ୟକୁ ନେଇ ଆହୁରି ଜୋରଦାର ହୋଇଛି ରାଜନୀତି । ମୋବାଇଲ ସଂଯୋଗ କେନ୍ଦ୍ରର ବିଷୟ ହୋଇଥିବାରୁ ଓଡିଶାକୁ ବାରମ୍ବାର ଅବହେଳା କରାଯାଉଥିବା ଅଭିଯୋଗ ଆଣିଛି ବିଜେଡି । ସେପଟେ ବିଜେପି ଶାସକ ଦଳ ଉପରକୁ ଦୋଷ ଲଜିଥିବାବେଳେ କଂଗ୍ରେସ ଉଭୟଙ୍କୁ ଦାୟୀ କରିଛି ।
କିଛିଦିନ ତଳେ ବାଉଁଶର ମୋବାଇଲ୍ ଟାୱାର ତିଆରି କରି ଏଥିରେ ବିଏସଏନଏଲ ଫୋର ଜି’ ଲେଖାଇ ଏହାର ଉଦଘାଟନ ପାଇଁ ସ୍ଥାନୀୟ ବିଧାୟକଙ୍କୁ ନିମନ୍ତ୍ରଣ କରାଯାଇଥିଲା । ଆଉ ନିମନ୍ତ୍ରଣ ପାଇଁ ବିଧାୟକ ଟାୱାର ପାଖରେ ପହଁଚିବା ପରେ ତାଙ୍କୁ ଗ୍ରାମବାସୀ ଘେରି ଯାଇଥିଲେ । ଲୋକଙ୍କ ଅଭିଯୋଗର ଭିଡ ଭିତରେ ବେଶ କିଛି ସମୟ ପାଇଁ ହଟହଟା ହୋଇଥିଲେ କଳାହାଣ୍ଡି ଲାଞ୍ଜିଗଡର ବିଧାୟକ ପ୍ରଦୀପ ଦିଶାରୀ । ଦେବଗଡ ଜିଲ୍ଲା ତିଲେଇବଣିରେ ୫ଟି ପଞ୍ଚାୟତ ଏଥର ନିର୍ବାଚନ ବର୍ଜନ କରିବାକୁ ଦେଇଥିଲେ ଚେତାବନୀ । କେହି ପ୍ରାର୍ଥିପତ୍ର ଦାଖଲ ନକରିବାରୁ ନିର୍ବାଚନରେ ଭାଗ ନେବା ପାଇଁ ପୁଣିଏକ ତାରିଖ ଘୋଷଣା କରିଥିଲେ ରାଜ୍ୟ ନିର୍ବାଚନ କମିଶନ୍ । ଚର୍ଚ୍ଚା ହେଉଛି ପ୍ରଶାସନ ଏକ ଘରୋଇ ସଂସ୍ଥା ସହ ଆଲୋଚନା କରି ଏଠାରେ ମୋବାଇଲ ନେଟୱର୍କ ସମସ୍ୟା ଦୂର କରିବାକୁ ଯୋଜନା ଚଳାଇଛି । ହେଲେ ୫-ଜିର ସ୍ୱପ୍ନ ଦେଖୁଥିବା ଭାରତରେ ଓଡିଶାର ୬ ହଜାର ଗାଁକୁ ଆଦୌ ମୋବାଇଲ ସେବା ନପହଞ୍ଚିବା ସବୁଠାରୁ ଚର୍ଚ୍ଚାର ବିଷୟ ହୋଇଛି ।