ମାନହାନୀ ମାମଲାରେ ସୁରଟ କୋର୍ଟର ରାୟକୁ ଚ୍ୟାଲେଞ୍ଜ କରିବେ ରାହୁଲ ଗାନ୍ଧୀ । ଆସନ୍ତାକାଲି ସୁରଟ ସେସନ କୋର୍ଟରେ ଆବେଦନ କରିବା ନେଇ ସୂତ୍ର ସୂଚନା
କନକ ବ୍ୟୁରୋ : କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଗୁଜରାଟ ସୁରଟର ଏକ କୋର୍ଟ ମାନହାନୀ ମାମଲାରେ ଦୋଷୀ ସାବ୍ୟସ୍ତ କରି ଦୁଇବର୍ଷ ଜେଲ ଦଣ୍ଡରେ ଦଣ୍ଡିତ କରିଥିଲେ । ରାହୁଲ ଗାନ୍ଧୀଙ୍କ ଉପରେ କୋର୍ଟ ଦେଇଥିବା ରାୟକୁ ଚ୍ୟାଲେଞ୍ଚ କରିବାକୁ ଆବେଦନ ପ୍ରସ୍ତୁତ ହୋଇସାରିଛି ଓ ସେ ଅସନ୍ତାକାଲି ସୁରଟର ସେସନ୍ କୋର୍ଟରେ ଆବେଦନ କରିବେ ବୋଲି ଜଣାପଡିଛି । ଆବେଦନ କରିବାକୁ ନିଜେ ରାହୁଲ ଗାନ୍ଧୀ ଆସନ୍ତା କାଲି ସୁରଟ ଯିବେ । ରାହୁଲ ଗାନ୍ଧୀ ନିଜ ଆବେଦନରେ ଅଦାଲତ ମାନହାନୀ ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରିଥିବା ବିଚାରପତିଙ୍କ ଆଦେଶକୁ ରଦ୍ଦ କରିବାକୁ ସେସନ୍ କୋର୍ଟରେ ଆବେଦନ କରିବେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉକି ସୁରଟର ଏକ କୋର୍ଟ ରାହୁଲ ଗାନ୍ଧୀଙ୍କୁ ଦୋଷୀ ସାବ୍ୟସ୍ତ କରି ଜେଲ ଦଣ୍ଡରେ ଦଣ୍ଡିତ କରିବାର କିଛି ସମୟ ମଧ୍ୟରେ ତାଙ୍କୁ ଜାମିନ ପ୍ରଦାନ କରିଥିଲେ ଓ ଏକମାସ ମଧ୍ୟରେ ରାହୁଲ ଗାନ୍ଧୀ ଉପର କୋର୍ଟରେ ଆବେଦନ କରିପାରିବେ ବୋଲି କୋର୍ଟ କହିଥିଲେ । ହେଲେ ଲୋକସଭା ସଚିବାଳୟ ତରଫରୁ କୋର୍ଟଙ୍କ ରାୟ ମୁତାବକ ତୁରନ୍ତ ରାହୁଲ ଗାନ୍ଧୀଙ୍କ ସାଂସଦ ପଦ ରଦ୍ଦ କରିଦେଇଥିଲେ । ଏହାକୁ ନେଇ ବିରୋଧୀଦଳମାନେ ସରକାରଙ୍କୁ ସମାଲୋଚନା କରିଥିଲେ । ବିରୋଧୀଦଳର ନେତାମାନେ କହିଥିଲେ କି ବୁଲେଟ୍ ଟ୍ରେନ୍ ଗତିରେ ଲୋକସଭା ସଚିବାଳୟ ତରଫରୁ ରାହୁଲ ଗାନ୍ଧୀଙ୍କ ସାଂସଦ ପଦ ରଦ୍ଦ କରାଯାଇଛି । ହେଲେ ଯଦି ଏକମାସ ମଧ୍ୟରେ ରାହୁଲ ଗାନ୍ଧୀ ତଳ କୋର୍ଟର ରାୟ ବିରୋଧରେ ଉପର କୋର୍ଟର ରଦ୍ଦ ନିର୍ଦ୍ଦେଶ ନଆଣିପାରନ୍ତି ତେବେ ନିର୍ବାଚନ ଆୟୋଗ କୌଣସି ସମୟରେ ୱାଇନାଡ ଲୋକସଭା ଉପ ନିର୍ବାଚନ ପାଇଁ ତାରିଖ ଘୋଷଣା କରିପାରନ୍ତି ।