ଜୟପୁର ସହରରୁ ଆସିଲା ବିଦ୍ୟାଳୟର ବିକଳ ଚିତ୍ର। ଗୋଟିଏ ଶ୍ରେଣୀଗୃହରେ ଚାଲିଛି ଦୁଇଟି କ୍ଲାସ, ପାଠ ପଢାଉଛନ୍ତି ୨ ଜଣ ଶିକ୍ଷୟିତ୍ରୀ।
କନକ ବ୍ୟୁରୋ : ଗୋଟିଏ ଶ୍ରେଣୀ ଗୃହରେ ଦୁଇଟି କ୍ଲାସର ପାଠପଢା । ପ୍ରଥମ ଶ୍ରେଣୀ ଛାତ୍ରଛାତ୍ରୀ ଗୋଟିଏ ଦିଗକୁ ମୁହଁ କରି ପାଠ ପଢୁଥିବା ବେଳେ, ଦ୍ୱିତୀୟ ଶ୍ରେଣୀ ପିଲା ଅନ୍ୟ ଦିଗକୁ ମୁହଁ କରି ପାଠପଢୁଛନ୍ତି । ଏହି ଦୁଇ ଶ୍ରେଣୀ ଛାତ୍ରଛାତ୍ରୀଙ୍କୁ ଦୁଇ ଜଣ ଶିକ୍ଷୟତ୍ରୀ ମଧ୍ୟ ଏକ ସଙ୍ଗରେ ପାଠପଢାଉଛନ୍ତି । ଶିକ୍ଷା ବ୍ୟବସ୍ଥାର ଏମିତି ବିକଳ ଚିତ୍ର ଦେଖିବାକୁ ମିଳିଛି କୋରାପୁଟ ଜିଲ୍ଲା ଜୟପୁର ସହରରେ ଥିବା ପାରାବେଡା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ । ସ୍କୁଲରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ପାଠପଢାଯାଉଥିଲେ ମଧ୍ୟ ଶ୍ରେଣୀ ଗୃହ ଅଭାବରୁ ଗୋଟିଏ ପ୍ରକୋଷ୍ଠରେ ଦୁଇଟି ଶ୍ରେଣୀର ୭୦ରୁ ଅଧିକ ପିଲାଙ୍କୁ ପାଠ ପଢାଇବାକୁ ପଡୁଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ କୋମଳମତି ପିଲା ପାଠପଢୁଥିବା ଏହି ସ୍କୁଲରେ ଥିବା ଶୈାଚାଳୟ ଜରାଜୀର୍ଣ୍ଣ ଅବସ୍ଥାରେ ବନ୍ଦ ହୋଇ ପଡିଛି । ପାଇପ ସଂଯୋଗ ହୋଇଥିଲେ ମଧ୍ୟ ପାଣି ନାହିଁ । ଜୟପୁର ପରି ସହର ମଧ୍ୟରେ ଥିବା ସ୍କୁଲର ଏମିତି ଅବସ୍ଥା ଦେଖିଲେ ଉପାନ୍ତ ଅଞ୍ଚଳର ଶିକ୍ଷା ବ୍ୟବସ୍ଥା କେମିତି ଚାଲିଛି ତାହା ସହଜରେ ଅନୁମେୟ ।
ଗୋଟିଏ ପଟେ ସରକାର, ଶିକ୍ଷା କ୍ଷେତ୍ରରେ ସଂସ୍କାର ଆଣିବା ପାଇଁ ଉଦ୍ୟମ କରୁଥିବା କୁହାଯାଉଛି । ଉତ୍ତମ ଭିତ୍ତଭୂମି ଯୋଗାଇ ସ୍କୁଲ ଗୁଡିକର ରୂପାନ୍ତରିକରଣ ପ୍ରକ୍ରିୟା ଦ୍ୱାରା ଶିକ୍ଷାର ବିକାଶ କରାଯାଉଥିବା ଡିଣ୍ଡିମ ପିଟାଯାଉଛି । କିନ୍ତୁ ଜୟପୁର ଭଳି ସହରର ଛାତି ଉପରେ ଥିବା ଏହି ବିଦ୍ୟାଳୟରେ ବ୍ୟବସ୍ଥାକୁ ଦେଖିଲେ, ଯେ କେହି ସରକାରଙ୍କ ଆନ୍ତରିକତା ଉପରେ ପ୍ରଶ୍ନ ଉଠାଇବା ସ୍ୱାଭାବିକ ।