ସାଇବର ଠକଙ୍କ ଲୁଟ୍, କଷ୍ଟମର କେୟାର ନାଁରେ ହୋମିଓପାଥିକ୍ ଡାକ୍ତରଙ୍କଠାରୁ ନେଇଗଲେ ୯୫ ହଜାର ଟଙ୍କା।
କନକ ବ୍ୟୁରୋ: କଷ୍ଟମରକେୟାର ନାଁରେ ଡାକ୍ତରଙ୍କ ଠାରୁ ଲୁଟ୍ । ସାଇବର ଠକେଇ ସମ୍ପର୍କୀତ ଖବର ଯେତେ ପ୍ରସାରଣ ହେଲେ ବି ଏହି ଠକାମି ତାଲିକା ଲମ୍ବୁଛି ସିନା କମୁନି । ପ୍ରାୟ ସବୁଦିନ କେଉଁଠି ନା କେଉଁଠି, କିଏ ନାଁ କିଏ ସାଇବର ଠକଙ୍କ ହାବୁଡରେ ପଡୁଛନ୍ତି । ଏବେ ସାଇବର ଠକଙ୍କ ଜାଲରେ ପଡିଯାଇଛନ୍ତି ବୌଦ୍ଧ ଜିଲ୍ଲାର ଜଣେ ହୋମିଓପାଥିକ୍ ଡାକ୍ତର । ଡାକ୍ତରଙ୍କ ଠାରୁ ଓଟିପି ନେଇ ୯୫ ହଜାର ଟଙ୍କା ଲୁଟି ନେଇଛନ୍ତି ଠକ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ବୌଦ୍ଧ ଜିଲ୍ଲା ପୁରୁଣାକଟକ ଥାନା ଅଞ୍ଚଳର ହୋମିଓପାଥିକ ଡାକ୍ତର ହୃଷିକେଷ ଦାସ, ନିଜ କ୍ଲିନିକ୍ ପାଇଁ ଅନଲାଇନ୍ ଆପ୍ଲିକେସନ୍ ଜରିଆରେ ଏକ ଓଜନ ମେସିନ କିଣିଥିଲେ । ଫ୍ଲିପକାର୍ଟରୁ ଓଜନ ମେସିନ ମଗାଇଥିଲେ ଡାକ୍ତର । ସେହି ମେସିନଟି ଖରାପ ପଡିବାରୁ ତାକୁ ଫେରାଇ ଦେଇଥିଲେ । ସାମଗ୍ରୀ ଫେରାଇବାରୁ ୨ ଦିନ ଯାଏଁ ଟଙ୍କା ଫେରସ୍ତ ନଆସିବାରୁ ସେ ଗୁଗୁଲରୁ ଫ୍ଲିପକାର୍ଟ କଷ୍ଟମର କେୟାର ନମ୍ବର ଆଣି କଲ୍ କରିଥିଲେ । ହେଲେ ଜାଣିନଥିଲେ ଯେ, ଏହି କଲ୍ ତାଙ୍କ ପାଇଁ ଅସୁବିଧାର କାରଣ ହେବ । ସେହି କଲ୍କୁ ଟ୍ରାକ କରି ନେଇଥିଲେ ସାଇବର ଠକ । ଠକ, ଡାକ୍ତରଙ୍କ ସହ କଥା ହୋଇ ଏକ ଆପ୍ଲିକେସନ୍ ଡାଉନଲୋଡ କରିବାକୁ କହିଥିଲା । ତା’ କଥା ଆଧାରରେ ହୋମିଓପାଥିକ ଡାକ୍ତର ହୃଷିକେଷ ଦାସ, ଆପ୍ ଡାଉନଲୋଡ କରି, ଓଟିପି ଦେଇଥିଲେ । ବାସ୍, ଏହାପରେ ଡାକ୍ତରଙ୍କ ମୋବାଇଲ୍ ନମ୍ବର ସହ ଲିଙ୍କ ଥିବା ତାଙ୍କ ସ୍ତ୍ରୀଙ୍କ ଆକାଉଣ୍ଟରୁ ଖାଲି ହୋଇଯାଇଥିଲା ୯୪ ହଜାର ୯୯୪ ଟଙ୍କା । ସାଇବର ଠକ ୬ଟି ପର୍ଯ୍ୟାୟରେ ଆକାଉଣ୍ଟ ଖାଲି କରିଦେଇଛନ୍ତି । ଏନେଇ ହୋମିଓପାଥିକ ଡାକ୍ତର ହୃଷିକେଷ ଦାସଙ୍କ ସ୍ତ୍ରୀ ମଂଜୁଲତା ଦାସ ପୁରୁଣା କଟକ ଥାନାରେ ଅଭିଯୋଗ କରିଛନ୍ତି ।