ଜୋରଦାର ହେଉଛି ଅପରେସନ୍ ଗଙ୍ଗା । ଯୁଦ୍ଧ ପ୍ରବଣ ଖାରକିଭରୁ ଫେରୁଛନ୍ତି ୬୫ ଓଡିଆ ଛାତ୍ରଛାତ୍ରୀ
କନକ ବ୍ୟୁରୋ: ବାରୁଦ ଗଦା ଉପରେ ଛିଡା ହୋଇଥିବା ୟୁକ୍ରେନରୁ ଫେରୁଛନ୍ତି ଡାକ୍ତରୀ ପାଠ ପଢ଼ିବାକୁ ଯାଇ ଫସି ଯାଇଥିବା ଓଡିଆ ଛାତ୍ରଛାତ୍ରୀ । ଏପର୍ଯ୍ୟନ୍ତ ବହୁ ଓଡିଆ ଛାତ୍ରଛାତ୍ରୀ ଦେଶକୁ ଫେରିଥିଲେ ବି ଆଉ କିଛି ଛାତ୍ରଛାତ୍ରୀ ଫସି ରହିଥିଲେ । ଦିନକୁ ଦିନ ଋଷ ସେନାର ଆକ୍ରମଣ ଉଗ୍ର ହେଉଥିବାରୁ ସେମାନେ ଏକପ୍ରକାର ଭୟ ଓ ଆତଙ୍କ ଭିତରେ ରହୁଥିଲେ । ଆଜି ସେମାନଙ୍କ ମଧ୍ୟରୁ ୬୫ଜଣ ଛାତ୍ରଛାତ୍ରୀଙ୍କୁ ରାଜ୍ୟ ସରକାର ଦୁଇଟି ବସ ଯୋଗେ ନିରାପଦ ସ୍ଥାନକୁ ଆଣିବାରେ ସଫଳ ହୋଇଛନ୍ତି ଏବଂ ସ୍ୱତନ୍ତ୍ର ବିମାନରେ ଦେଶକୁ ଫେରାଇ ଆଣିବା ପାଇଁ ବ୍ୟବସ୍ଥା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ୟୁକ୍ରେନ ଛାଡି ଭାରତ ଫେରୁଥିବା ଓଡିଆ ଛାତ୍ରଛାତ୍ରୀଙ୍କୁ ଦେଖିଲେ ବୁଝିହେଉଛି ଯେ ୱାର୍ ଜୋନରୁ ଆସିବା ପରେ ଏମାନେ କେତେ ଖୁସି । କିଛି ଦିନ ହେବ ଯୁଦ୍ଧ ଭୂମିରେ ବିତିଥିଲା ଏମାନଙ୍କ ସମୟ । ମୃତ୍ୟୁକୁ ଅତି ନିକଟରୁ ଦେଖିବା ପରେ ସେସବୁକୁ ଭୁଲି ଭାରତ ଅଭିମୁଖେ କରୁଛନ୍ତି ଯାତ୍ରା । ୟୁକ୍ରେନର ଖାର୍କିଭରୁ ସ୍ୱତନ୍ତ୍ର ବସରେ ୬୫ ଓଡିଆ ଛାତ୍ରଛାତ୍ରୀଙ୍କୁ ନେଇ ପୋଲାଣ୍ଡକୁ ବାହାରିଛି ବସ । ରାଜ୍ୟ ସରକାର ସ୍ୱତନ୍ତ୍ର ବସର ବ୍ୟବସ୍ଥା କରିଥିବା ଛାତ୍ରଛାତ୍ରୀ କହିଛନ୍ତି ।
ବିଦେଶ ମାଟିରୁ ଜନ୍ମମାଟି ଫେରିବା ପରେ ଆଶ୍ୱସ୍ତ ହୋଇଛନ୍ତି ଛାତ୍ରଛାତ୍ରୀ । କିଛି ସମୟ ଦିଲ୍ଲୀରେ ରହିବା ପରେ ଓଡିଶା ଫେରୁଛନ୍ତି । ଜୀବନ ବଞ୍ଚାଇ ସୁରକ୍ଷିତ ଫେରିଛନ୍ତି ସତ ହେଲେ ଆଖି ସାମ୍ନାରେ ଏବେ ବି ନାଚୁଛି ୟୁକ୍ରେନର ଘଟିଥିବା ଛାତିଥରା ଦୃଶ୍ୟ । ତେବେ ଅପରେସନ ଗଙ୍ଗାରେ ଭାରତୀୟ ଛାତ୍ରଛାତ୍ରୀ ସ୍ୱଦେଶ ଫେରିଥିବାବେଳେ ସେମାନଙ୍କ ମଧ୍ୟରେ ଅଛନ୍ତି ଅନେକ ଓଡିଆ ଛାତ୍ରଛାତ୍ରୀ ।