ବିଚ୍ ରାସ୍ତାରେ ଇଞ୍ଜିନିୟରଙ୍କୁ ଚାପୁଡା ମାରିଲେ ବିଧାୟିକା । ଭାଇରାଲ ହେଉଛି ଭିଡିଓ
କନକ ବ୍ୟୁରୋ: ଜଣେ ବିଧାୟିକା ଦୁଇଜଣ ଯୁବ ଇଞ୍ଜିନିୟରଙ୍କୁ ବିଚ୍ ରାସ୍ତାରେ ସର୍ବସମକ୍ଷରେ ଚାପୁଡା ମାରିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏଭଳି ଘଟଣା ଦେଖିବାକୁ ମିଳିଛି ମହାରାଷ୍ଟ ଥାଣେରେ । ମୀରା ଭୟାନ୍ଦରର ବିଧାୟିକା ଗୀତା ଜୈନ୍ ମ୍ୟୁନିସିପାଲ କର୍ପୋରେସନର ଯୁବ ଇଞ୍ଜିନିୟରଙ୍କୁ ଚାପୁଡା ମାରିବା ଘଟଣା ଏବେ ଚର୍ଚ୍ଚାରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମ୍ୟୁନିସିପାଲ କର୍ପୋରେସନର କିଛି ଇଞ୍ଜିନିୟରଙ୍କ ଉପସ୍ଥିତିରେ ସରକାରୀ ଜମି ଉପରେ ଘର ରହିଥିବା ଲୋକଙ୍କ ଘରକୁ ହଠାତ ଭଙ୍ଗାଯାଇଥିଲା । ହେଲେ ଏବେ ଦେଶର ବିଭିନ୍ନ ସ୍ଥାନରେ ମୌସୁମୀ ବର୍ଷା ଆରମ୍ଭ ହୋଇଯାଇଥିବାବେଳେ ବାସହୀନ ଲୋକେ ନିଜରୀ ଛୋଟ ପିଲାମାନଙ୍କୁ ନେଇ ରାସ୍ତା କଡରେ ଆଶ୍ରୟ ନେଇଛନ୍ତି । ଏକଥା ଜାଣିବା ମାତ୍ରେ ଦୁଇ ଯୁବ ଇଞ୍ଜିନିୟରଙ୍କୁ ଡକାଇ ଗାଲିଗୁଲଜ କରିବା ସହ ସମସ୍ତଙ୍କ ସାମ୍ନାରେ ତାଙ୍କୁ ଚାପୁଡା ମାରିଥିଲେ ବିଧାୟିକା ଗୀତା ଜୈନ୍ ଏବଂ ଦୁଇ ଇଞ୍ଜିନିୟରଙ୍କୁ ଘର ଭଙ୍ଗା ପାଇଁ ସରକାରୀ ନୋଟିସ୍ ଦେଖାଇବାକୁ ନିର୍ଦ୍ଦେଶ ଦେଇଥିଲେ । ତେବେ ଏହି ଘଟଣା ପରେ ବିଧାୟିକାଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ । ତେବେ ଯୁବ ଇଞ୍ଜିନିୟରଙ୍କୁ ବିଧାୟିକା ଚାପୁଡା ମାରିବା ଓ ଗାଳିଦେବା ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଗୀତା ଜୈନ୍ ପୂର୍ବରୁ ସହରର ‘ବିଜେପି’ ମେୟର୍ ଥିଲେ ଏବଂ ୨୦୧୯ ବିଧାନସଭା ନିର୍ବାଚନରେ ସେ ସ୍ୱାଧୀନ ପ୍ରାର୍ଥିନୀ ଭାବେ ବିଜୟୀ ହୋଇ ବିଧାୟିକା ହୋଇଥିଲେ। ସମ୍ପ୍ରତି ସେ ‘ବିଜେପି-ଶିବସେନା’ ସରକାରଙ୍କୁ ସମର୍ଥନ କରୁଛନ୍ତି।