ଓଡ଼ିଶାରେ ହେବ କି ଆଗୁଆ ନିର୍ବାଚନ? ଜାତୀୟ ଗଣମାଧ୍ୟମରେ ଜୋର ଧରିଲା ଚର୍ଚ୍ଚା
କନକ ବ୍ୟୁରୋ: ଓଡିଶାରେ ହେବ କି ଆଗୁଆ ବିଧାନସଭା ନିର୍ବାଚନ । ଏହି ଚର୍ଚ୍ଚା ଭିତରେ ଆଉ ଏକ ଖୋରାକ ଯୋଗାଇଛି ଜାତୀୟ ଗଣମାଧ୍ୟମରେ ପ୍ରକାଶିତ ଆଲେଖ୍ୟ । କେବଳ ଓଡିଶା ନୁହଁ ଦେଶର ପ୍ରଧାନମନ୍ତ୍ରୀ ମଧ୍ୟ ନିର୍ବାଚନ ପୂର୍ବରୁ ସଜବାଜ ହେଉଛନ୍ତି । ଦେଶର ମୁଡ କଣ ଅଛି ଏବଂ କେନ୍ଦ୍ର ସରକାରଙ୍କୁ ନେଇ ଲୋକଙ୍କ ଆଭିମୁଖ୍ୟ କଣ ଅଛି । ଏହା ଜାଣିବାକୁ ଚାହୁଁଛନ୍ତି ପ୍ରଧାନମନ୍ତ୍ରୀ । ତେଣୁ ଦେଶର ବିଭିନ୍ନ ଗଣମାଧ୍ୟମର ସାମ୍ବାଦିକ ଓ ସମ୍ପାଦକଙ୍କ ସହ ପ୍ରଧାନମନ୍ତ୍ରୀ ଏକ ଅଘୋଷିତ ବୈଠକ କରିବାକୁ ଯାଉଛନ୍ତି । ଏଥିପାଇଁ ପ୍ରସ୍ତୁତି ଚାଲିଛି ବୋଲି ସୂଚନା ରହିଛି । ଏହାରି ଭିତରେ ଏକ ଆଲେଖ୍ୟ ପ୍ରକାଶ ପାଇଛି । ଯେଉଁଥିରେ କୁହାଯାଇଛି ବର୍ଷ ଶେଷରେ ହିନ୍ଦୀ ହାର୍ଟଲ୍ୟାଣ୍ଡ ସହ ଓଡିଶାରେ ହୋଇପାରେ ବିଧାନସଭା ନିର୍ବାଚନ ।
Kanak News is now on WhatsApp
Join and get latest news updates delivered to you via WhatsApp
ଡିସେମ୍ବରରେ ଦେଶରେ ୫ଟି ରାଜ୍ୟ ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ, ତେଲେଙ୍ଗାନା ଏବଂ ମିଜୋରାମରେ ହେବାକୁ ଯାଉଛି ବିଧାନସଭା ନିର୍ବାଚନ । ଜାତୀୟ ଗଣମାଧ୍ୟମରେ ଚର୍ଚ୍ଚା ଅନୁସାରେ ଓଡିଶାରେ ଆଗୁଆ ନିର୍ବାଚନ ନେଇ ଆକଳନ କରାଯାଉଛି । ‘ଦ ନ୍ୟୁ ଇଣ୍ଡିଆନ୍ ଏକ୍ସପ୍ରେସ’ର ସମ୍ପାଦକ ସାହିଦ ଫରିଦି ତାଙ୍କ ଆଲେଖ୍ୟରେ ଲେଖିଛନ୍ତି, ମୁଖ୍ୟମନ୍ତ୍ରୀ ଚିନ୍ତା କରୁଛନ୍ତି ଏକା ସାଙ୍ଗରେ ବିଧାନସଭା ଓ ଲୋକସଭା ନିର୍ବାଚନ ହେଲେ ବିରୋଧୀଙ୍କୁ ଅଧିକ ଫାଇଦା ମିଳିପାରେ । ୨୦୧୯ ସାଧାରଣ ନିର୍ବାଚନ ବେଳେ ବିରୋଧୀ ବିଜେପିର ଲୋକସଭା ସଦସ୍ୟ ସଂଖ୍ୟା ବଢିବାକୁ ଆଧାର କରି ଏବେ ନବୀନ ତାଙ୍କ ରଣନୀତିରେ ପରିବର୍ତ୍ତନ କରିବାକୁ ଚିନ୍ତା କରୁଛନ୍ତି । ଆଉ ୫ଟି ରାଜ୍ୟ ସହିତ ଓଡିଶାରେ ଆଗୁଆ ନିର୍ବାଚନ କରାଇପାରନ୍ତି ନବୀନ ।
ରାଜ୍ୟରେ ଆଗୁଆ ନିର୍ବାଚନ ଚର୍ଚ୍ଚା ଭିତରେ ବିଜେଡି ଓ ବିଜେପିର ରାଜନୈତିକ କାର୍ଯ୍ୟକଳାପ ଏହି ଦିଗକୁୁ ଇସାରା କରୁଛି । ମନ୍ତ୍ରୀ ମଣ୍ଡଳ ପୁର୍ନଗଠନ ଏବଂ ଦଳୀୟ ସଂଗଠନକୁ ମଜବୁତ କରୁଛନ୍ତି ବିଜେଡି ସୁପ୍ରିମୋ । ଏପରିକି ନେତାଙ୍କୁ ଯେକୌଣସି ମୁହୂର୍ତରେ ନିର୍ବାଚନ ପାଇଁ ପ୍ରସ୍ତୁତ ରହିବା ପାଇଁ ଅଘୋଷିତ ନିର୍ଦ୍ଦେଶ ଦେଇ ସାରିଛନ୍ତି ହାଇକମାଣ୍ଡ । ସେପଟେ ରାଜ୍ୟ କାଯ ର୍୍ୟକାରିଣୀରେ ବିଜେପିର କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ ତୃଣମୂଳ ସ୍ତରରୁ ସଂଗଠନକୁ ସୁଦୃଢ କରିବାକୁ ଗୁରୁମନ୍ତ୍ର ଦେଇଛନ୍ତି । ଆଉ ବିଜେଡି ମୁକ୍ତ ଓଡିଶା ପାଇଁ ସଂକଳ୍ପ ନେଇଛି ବିେଜେପି ।
ମନ୍ତ୍ରୀଙ୍କ ପ୍ରଦର୍ଶନର ହେଉଛି ସମୀକ୍ଷା, ବିଧାୟକଙ୍କ ଲୋକପ୍ରିୟତାର ହେଉଛି ସର୍ଭେ, ନବୀନ ନିବାସରେ ଟିକେଟ କସରତ, କେନ୍ଦ୍ରମନ୍ତ୍ରୀଙ୍କ ବିଭିନ୍ନ ଲୋକସଭା ଆସନ ଗସ୍ତ ସଙ୍କେତ ଦେଉଛି କି ଆଗୁଆ ନିର୍ବାଚନର କଥା ।