କୋଲକାତାରେ ଓଡ଼ିଆ ଯବାନଙ୍କ ଗୁଳିବର୍ଷା: କାହିଁକି କଲେ ଗୁଳିମାଡ଼, ଏବେ ବି ଖୋଲିନି ରହସ୍ୟ
କନକ ବ୍ୟୁରୋ: କୋଲକାତାର ଜାତୀୟ ମ୍ୟୁଜିୟମରେ ଓଡିଆ ଯବାନଙ୍କ ଆଖିବୁଜା ଗୁଳିମାଡ ଘଟଣା ଚାଂଚଲ୍ୟ ଖେଳାଇ ଦେଇଛି । ଗୁଳିମାଡରେ ସିଆଇଏସଏଫ ଏଏସଆଇ ରଂଜିତ ଷଡଙ୍ଗୀଙ୍କ ମୃତ୍ୟୁ ହୋଇଥିବା ବେଳେ ଆସିଷ୍ଟାଂଟ କମାଣ୍ଡର ର୍ୟାଙ୍କର ଅଧିକାରୀ ସୁବୀର ଘୋଷ ଆହତ ହୋଇଛନ୍ତି । ଏହି କାଣ୍ଡ ଭିଆଇଥିବା ଓଡିଆ ଯବାନ ହେଉଛନ୍ତି ସିଆଇଏସଏଫ ହେଡ କନେଷ୍ଟବଳ ଅକ୍ଷୟ ମିଶ୍ର, ଘର ଓଡିଶାର ଢେଙ୍କାନାଳ ଜିଲ୍ଲା ମାଛିଆ ଘୋଡାଡିଆଁ ଗାଁରେ । ପଶ୍ଚିମବଙ୍ଗ ପୁଲିସ ଅକ୍ଷୟ ମିଶ୍ରଙ୍କୁ କାବୁ କରି କୋର୍ଟରେ ହାଜର କରିଛି ।
Kanak News is now on WhatsApp
Join and get latest news updates delivered to you via WhatsApp
କୋଲକାତା ମ୍ୟୁଜିୟମରେ ଓଡିଆ ଯବାନଙ୍କ ଉନ୍ମତକାଣ୍ଡ ଖବର ପରେ ଅକ୍ଷୟ ମିଶ୍ରଙ୍କ ପୈତୃକ ଗାଁ ଢେଙ୍କାନାଳ ଜିଲ୍ଲାର ମାଛିଆ ଘୋଡାଡିଆଁ ଗାଁରେ ପହଂଚିଥିଲା କନକ ନ୍ୟୁଜ ଟିମ୍ । ଅକ୍ଷୟ ମିଶ୍ରଙ୍କ କାରନାମାକୁ ଗାଁ ଲୋକେ ବିଶ୍ୱାସ କରିପାରୁ ନାହାନ୍ତି । ଶାନ୍ତ ସ୍ୱଭାବର ପିଲା ଏଭଳି କରିଥିବ ସେମାନେ ଚିନ୍ତା କରିପାରୁ ନାହାନ୍ତି ।
ବାପାଙ୍କ ମୃତ୍ୟୁ ପରେ ଅକ୍ଷୟଙ୍କୁ ଛୁଟ ନମିଳିବାରୁ ସେ ଉଚ୍ଚ ଅଧିକାରୀଙ୍କୁ ଗୁଳ କରିଥିବା ସୂଚନା ମିଳିଥିଲା । ହେଲେ ଗ୍ରାମବାସୀ କହୁଛନ୍ତି, ତିନି ମାସ ତଳେ ଅକ୍ଷୟଙ୍କ ପିତାଙ୍କ ଦେହାନ୍ତ ହୋଇଥିଲା ଓ ଶୁଦ୍ଧି କାମ ପାଇଁ ଅକ୍ଷୟ ଗାଁକୁ ଆସି ମାସେ ଛୁଟିରେ ରହିଥିଲେ ।
ଚର୍ଚ୍ଚା ହେଉଛି କାର୍ଯ୍ୟକ୍ଷେତ୍ରରେ ହେଡ କନେଷ୍ଟବଳ ଅକ୍ଷୟ ମିଶ୍ରଙ୍କୁ ହଇରାଣ କରାଯାଉଥିଲା । ବିଶେଷ କରି ଓଡିଆ ଯବାନ ସିଆଇଏସଏଫ ରଂଜିତ କୁମାର ଷଡଙ୍ଗୀ ଓ ଆସିଷ୍ଟାଂଟ କମାଣ୍ଡାଂଟ ସୁବୀର ଘୋଷଙ୍କ ତାଙ୍କୁ ଟାର୍ଗେଟ କରୁଥିଲେ । ଏଥିରେ ଅତିଷ୍ଠ ହୋଇ ସେ ଦୁଇ ସହକର୍ମୀଙ୍କ ଉପରେ ଗୁଳି ମାଡ କରି ମ୍ୟାଗଜିନ ଖାଲି କରିଦେଇଥିଲେ । ଗିରଫ ପରେ ପୁଲିସ ଆଗରେ ଅଭିଯୁକ୍ତ ଅକ୍ଷୟ ମିଶ୍ର ଏହା କହିଥିବା ଜଣାପଡିଛି ।