ଅସହାୟ ହୋଇପଡିଲେଣି କି ବିଜେପିର ଯୁବରାଜ ଜ୍ୟୋତିରାଦିତ୍ୟ ସିନ୍ଧିଆ? ୨ମାସ ମଧ୍ୟରେ ଦଳ ଛାଡିଲେଣି ୭ରୁ ଅଧିକ ନିକଟତର ବରିଷ୍ଠ ନେତା
କନକ ବ୍ୟୁରୋ : ବିଜେପି ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କ ନିକଟତର କୁହାଯାଉଥିବା ୭ଜଣ ନେତା ୨ମାସ ମଧ୍ୟରେ ବିଜେପି ଛାଡି ସାରିଲେଣି । ଶୁକ୍ରବାର ଦିନ ନିମଚର ବରିଷ୍ଠ ବିଜେପି ନେତା ତଥା ସିନ୍ଧିଆଙ୍କ ଅତି ଘନିଷ୍ଠ କୁହାଯାଉଥିବା ସମନ୍ଦର ପଟେଲ ବିଜେପି ଛାଡି କଂଗ୍ରେସରେ ସାମିଲ ହୋଇଛନ୍ତି । ଗତ ୨ମାସ ମଧ୍ୟରେ ମଧ୍ୟ ପ୍ରଦେଶର ଭିନ୍ନ ଭିନ୍ନ ଅଞ୍ଚଳରୁ ୭ ଜଣ ବରିଷ୍ଠ ବିଜେପି ନେତା ଦଳ ଛାଡିସାରିଛନ୍ତି । ଏହି ନେତାମାନେ ସିନ୍ଧିଆଙ୍କ ଅତି ନିକଟତର ବୋଲି କୁହାଯାଉଥିଲା ।
Kanak News is now on WhatsApp
Join and get latest news updates delivered to you via WhatsApp
ସିନ୍ଧିଆଙ୍କ ସହ ଯେଉଁ ସମର୍ଥକମାନେ ବିଜେପି ଛାଡି କଂଗ୍ରେସରେ ଯୋଗ ଦେଇଛନ୍ତି ସେମାନଙ୍କ ମଧ୍ୟରୁ ଅଧିକାଂଶ ଗ୍ୱାଲିଅର, ଚମ୍ବଲ, ସମ୍ଭାଗ ଅଞ୍ଚଳର । ଗ୍ୱାଲିୟର-ଚମ୍ବଲକୁ ସିନ୍ଧିଆ ରାଜପରିବାରର ରାଜନୈତିକ ଗଡ ବୋଲି କୁହାଯାଇଥାଏ । ସେମାନେ ଦଳ ଛାଡିବା ପରେ କମଲନାଥଙ୍କ ନେତୃତ୍ୱରେ କଂଗ୍ରେସରେ ଯୋଗ ଦେଉଛନ୍ତି ।
ନିର୍ବାଚନୀ ବର୍ଷରେ ଏଭଳି ଭାବେ ସିନ୍ଧିଆଙ୍କ ସହ ସଂପର୍କ ତୁଟାଇ ଘନିଷ୍ଠମାନେ କଂଗ୍ରେସରେ ଯୋଗ ଦେଉଥିବାରୁ ଏହାକୁ ନେଇ ଏବେ ଅନେକ ପ୍ରଶ୍ନ ଠିଆ ହୋଇଛି । କ୍ଷମତା ବର୍ଗରେ ଏହି ପ୍ରଶ୍ନ ଉଠୁଛି କି ସିନ୍ଧିଆ ତାଙ୍କ ସମର୍ଥକମାନଙ୍କୁ ବାନ୍ଧିରଖିବାରେ କାହିଁକି ସମର୍ଥ ହେଉନାହାଁନ୍ତି । ସେପଟେ ସିନ୍ଧିଆଙ୍କ ସମର୍ଥକମାନେ କହୁଛନ୍ତି ଯେ ଯେଉଁନେତାମାନେ ବିଜେପି ଛାଡି କଂଗ୍ରେସରେ ଯୋଗ ଦେଉଛନ୍ତି ସେମାନଙ୍କ ପଛରେ ଜନାଧାର ନାହିଁ ।
ସମନ୍ଦର ପଟେଲ : ନିମଚ ଜାବଦରୁ ୨୦୧୮ ମସିହାରେ ସମନ୍ଦର ପଟେଲ ନିର୍ବାଚନ ଲଢିଥିଲେ । ପଟେଲ ନିର୍ବାଚନ ହାରିଥିଲେ ବି ୩୩ ହଜାର ଭୋଟ ନେଇ କଂଗ୍ରେସର ଖେଳ ବିଗାଡିଦେଇଥିଲେ । ସିନ୍ଧିଆ କଂଗ୍ରେସ ଛାଡି ବିଜେପିରେ ଯୋଗଦେବା ବେଳେ ପଟେଲ ମଧ୍ୟ ସିନ୍ଧିଆଙ୍କ ସମର୍ଥନରେ ବିଜେପିରେ ଯୋଗ ଦେଇଥିଲେ ।
ବୈଜନାଥସିଂ ଯାଦବ : ଗୁନା-ଶିବପୁରୀରେ ସିନ୍ଧିଆଙ୍କ ଘନିଷ୍ଠ ଥିବା ବୈଜନାଥ ଯାଦବ ଜୁନମାସରେ ବିଜେପି ଛାଡି କଂଗ୍ରେସରେ ଯୋଗ ଦେଇଥିଲେ । ବୈଜନାଥ ଯାଦବଙ୍କ ପତ୍ନୀ କମଲା ଯାଦବ ଶିବପୁରୀ ଜିଲ୍ଲା ପଞ୍ଚାୟତ ଅଧ୍ୟକ୍ଷ ଥିଲେ । ଯାଦବ ଯେତେବେଳେ ବିଜେପି ଛାଡି କଂଗ୍ରେସରେ ଯୋଗଦେଲେ ୪୦୦ ଗାଡିରେ ଏକ ରାଲି କରି ଆସି ସମସ୍ତଙ୍କୁ ଚମକାଇ ଦେଇଥିଲେ ।
ଜୟପାଲ ସିଂ ଯାଦବ : ସିନ୍ଧିଆ ସମର୍ଥକ ଜୟପାଲ ସିଂ ଯାଦବ ଚନ୍ଦେରୀ ବିଧାନସଭା ଆସନରୁ ନିର୍ବାଚନ ଲଢିଥିଲେ । ଏବେ ସେ ନିଜ ସମର୍ଥକଙ୍କ ସହ କଂଗ୍ରେସରେ ଯୋଗ ଦେଇଛନ୍ତି ।
ୟଦୁରାଜ ସିଂ ଯାଦବ : ଚନ୍ଦେରୀର ଜଣେ ଲୋକପ୍ରିୟ ନେତା । ଏହାସହ ଜଣେ ଭଲ ସଂଗଠକ ଭାବେ ସେ ବେଶ୍ ଜଣାଣୁଣା । ସିନ୍ଧିଆଙ୍କ ନିର୍ବାଚନୀ ରଣନୀତିକାର ଭାବେ ତାଙ୍କର ବେସ୍ ନାମ ରହିଛି । ହେଲେ ଏବେ ସେ ଜୟପାଲଙ୍କ ସହ ବିଜେପି ଛାଡି କଂଗ୍ରେସରେ ଯୋଗ ଦେଇଛନ୍ତି ।
ରାକେଶ ଗୁପ୍ତା : ଶିବପୁରୀରେ ରାକେଶ ବିଜେପି ଜିଲ୍ଲା ଉପାଧ୍ୟକ୍ଷ ପଦରେ ଥିଲେ । ସେ ଶବପୁରୀ ଲୋକସଭା ଆସନରେ ସିନ୍ଧିଆଙ୍କର ମ୍ୟାନେଜମେଣ୍ଟ କାମ ଦେଖୁଥିଲେ ।
ଏହିଭଳି ଭାବେ ଜଣଙ୍କ ପରେ ଜଣେ ସିନ୍ଧିଆଙ୍କ ଘନିଷ୍ଠ ନେତା ବିଜେପି ଛାଡି କଂଗ୍ରେସରେ ଯୋଗ ଦେଉଛନ୍ତି । ଏହାକୁ ନେଇ କଂଗ୍ରେସ ବିଧାୟକ ବୈଜନାଥ କୁଶୱାହା ଦାବି କରିଛନ୍ତି କି ଆହୁରି ଅନେକ ସିନ୍ଧିଆ ସମର୍ଥକ କଂଗ୍ରେସ ସହ ଯୋଗାଯୋଗରେ ରହିଛନ୍ତି ।