କନକ ବ୍ୟୁରୋ: କାହିଁକି ମନ୍ତ୍ରୀଙ୍କୁ ଗୁଳି ମାରିଲା ଗୋପାଳ? ଏହି ରହସ୍ୟ ଏବେ ବି ଭେଦିବାରେ ସକ୍ଷମ ହୋଇ ପାରିନି କ୍ରାଇମବ୍ରାଞ୍ଚ ଟିମ୍ । ମନ୍ତ୍ରୀ ନବ ଦାସଙ୍କୁ ଗୁଳି ମାରିବା କଥା ଗୋପାଳ ସ୍ୱୀକାର କରିଥିଲେ ବି କାହିଁକି ମାରିଲେ ସେ କଥା ସ୍ପଷ୍ଟ କରୁନାହାଁନ୍ତି । କିନ୍ତୁ କ୍ରାଇମବ୍ରାଞ୍ଚ ଅଧିକାରୀଙ୍କ ଆଗରେ ଗୋପାଳ ହତ୍ୟାକାଣ୍ଡର ଗୁମର ଖୋଲିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
କ୍ରାଇମବ୍ରାଞ୍ଚର ତଦନ୍ତକୁ ଏକ ସପ୍ତାହ ପୂରିଗଲା ପରେ ବି ଏହି ଦୁଇଟି ପ୍ରଶ୍ନର ଉତ୍ତର ଜାଣିବାକୁ ଅପେକ୍ଷା କରିଛି ସାରାରାଜ୍ୟ । ଗୁଳି ମାରିଥିବା ନେଇ ଅଭିଯୁକ୍ତ ଗୋପାଳ ଦାସ ସ୍ୱୀକାର କରିଥିବା କହିଥିଲା କ୍ରାଇମ୍ରବ୍ରାଞ୍ଚ, କିନ୍ତୁ କାହିଁକି ଗୁଳି ମାରିଲା, ଏ ନେଇ କିଛି ସ୍ପଷ୍ଟ କରିନାହିଁ ତଦନ୍ତକାରୀ ଟିମ୍ । କିନ୍ତୁ କୁହାଯାଉଛି, ଜେରା ବେଳେ କ୍ରାଇମବ୍ରାଞ୍ଚଙ୍କୁ ଅନେକ କଥା କହିଛି ଗୋପାଳ । ସେ କୁଆଡ଼େ କହିଛି…
- ରାଜ୍ୟ ସରକାରଙ୍କୁ କିଛି ନେତା ବଦନାମ କରୁଛନ୍ତି
- ଲୋକଙ୍କ ଦୁଃଖ ବୁଝିବା ବଦଳରେ ସେମାନଙ୍କ ଦୁଃଖର କାରଣ ପାଲଟିଛନ୍ତି
- ଲୋକଙ୍କୁ ଆତଙ୍କିତ କରିବା ସହ ନେତା ଦେଉଛନ୍ତି ନିର୍ଯାତନା
ସେହି ନେତାମାନଙ୍କ ମଧ୍ୟରେ ନବ ଦାସ ଥିଲେ ବୋଲି କ୍ରାଇମବ୍ରାଞ୍ଚକୁ ଜେରା ବେଳେ ଗୋପାଳ କହିଥିବା ଚର୍ଚ୍ଚା ହେଉଛି । ତା’ ପକେଟରେ ଯେଉଁ କାଗଜ ରହିଥିଲା, ସେଥିରେ ସେ ଏସବୁ କଥା ଲେଖିଥିଲା ବୋଲି କୁହାଯାଉଛି । ଏପରିକି ଶୁଣିବାକୁ ମିଳୁଛି, ନବ ଦାସଙ୍କୁ ହତ୍ୟା କରିବା ପାଇଁ ଗତ ୪ ମାସ ହେଲା ସୁଯୋଗ ଅପେକ୍ଷାରେ ଥିଲା ଅଭିଯୁକ୍ତ । କିନ୍ତୁ ଏ ନେଇ କିଛି ବି କହୁନାହିଁ କ୍ରାଇମବ୍ରାଞ୍ଚ
ସେପଟେ ପରିବାର ଲୋକଙ୍କୁ ପଚରାଉଚରା କରିବା ସହ ସମସ୍ତଙ୍କ ବ୍ୟାଙ୍କ ଆକାଉଣ୍ଟକୁ ତନତନ କରି ଯାଞ୍ଚ କରାଯାଉଛି । ମନ୍ତ୍ରୀଙ୍କ ମୃତ୍ୟୁ ରହସ୍ୟ ଖୋଜିବାକୁ ଗୋପାଳଙ୍କୁ ପଚରାଉଚରା ଜାରି ରଖିଛି କ୍ରାଇମ୍ବ୍ରାଞ୍ଚ । ହତ୍ୟାକାଣ୍ଡର ପ୍ରକୃତ ରହସ୍ୟ ଜାଣିବା ପାଇଁ ତଦନ୍ତ ପରିସରକୁ ଆହୁରି ବ୍ୟାପକ କରାଯାଇଛି । ଏସସିବିର ୫ ଜଣ ବିଶେଷଜ୍ଞ ଝାରସୁଗୁଡ଼ାରେ ପହଁଚି ଅଭିଯୁକ୍ତ ଗୋପାଳର ମାନସିକ ଅବସ୍ଥାର ପରୀକ୍ଷା କରୁଛନ୍ତି ।
ବିଶେଷଜ୍ଞ ଦଳ ଗୋପାଳର ପୂର୍ବ ପ୍ରେସକ୍ରିପସନକୁ ମଧ୍ୟ ଯାଞ୍ଚ କରିଛନ୍ତି । ଗୋପାଳର ମାନସିକ ସ୍ଥିତି ପରୀକ୍ଷା କରିବା ସମୟରେ ଭିଡିଓ ରେକର୍ଡିଂ ମଧ୍ୟ କରାଯାଇଛି । ଏହି ଭିଡିଓ ରେକର୍ଡିଂକୁ ବିଶେଷଜ୍ଞଙ୍କ ଦ୍ୱାରା ତର୍ଜମା କରାଯିବ । ଗୋପାଳର ମାନସିକ ସ୍ଥିତି ଯାଞ୍ଚ କରାଯାଇ ମେଡିକାଲ ବୋର୍ଡର ରିପୋର୍ଟ ପରେ ହିଁ ସିନ୍ ରିକ୍ରିଏସନ୍ କରାଯିବା ସମ୍ଭାବନା ରହିଛି । ଏପଟେ ତଦନ୍ତକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ପିସିସି ସଭାପତି ଶରତ ପଟ୍ଟନାୟକ । ତେବେ ମର୍ଡର ମିଷ୍ଟ୍ରି ନ ଖୋଲିବା ପର୍ଯ୍ୟନ୍ତ ଲୋକଙ୍କ ସନ୍ଦେହ ବଢ଼ିବା ସହ ଏହା ରାଜ୍ୟ ରାଜନୀତିର କେନ୍ଦ୍ର ବିନ୍ଦୁ ପାଲଟିବ ।