କେବେ ଓ କାହାକୁ ମିଳିବ ମନ୍ତ୍ରୀପଦ? ବଢିଲା ଚର୍ଚ୍ଚା, ନବୀନଙ୍କ ଗୁଡବୁକରେ କିଏ?
କନକ ବ୍ୟୁରୋ : ନବୀନଙ୍କ ମନ୍ତ୍ରୀମଣ୍ଡଳରେ କାହାକୁ ମିଳିବ ସ୍ଥାନ? ୨୦୨୪ ପୂର୍ବରୁ କାହାକୁ ଭରସା କରି ନିଜ ଟିମରେ ସାମିଲ କରିବେ ବିଜେଡି ସୁପ୍ରିମୋ । ଗଣଶିକ୍ଷା ଓ ଶ୍ରମ ବିଭାଗର ମନ୍ତ୍ରୀ ପଦରୁ ସମୀର ଓ ଶ୍ରୀକାନ୍ତ ସାହୁ ଇସ୍ତଫା ଦେବା ପରେ ଏଭଳି ଚର୍ଚ୍ଚା ଆରମ୍ଭ ହୋଇଛି । ମୁଖ୍ୟମନ୍ତ୍ରୀ ଦିଲ୍ଲୀ ଗସ୍ତରେ ଥିବା ବେଳେ ସଙ୍ଗଠନକୁ ସୁଦୃଢ କରିବାର ଦ୍ୱାହି ଦେଇ ପଦରୁ ଇସ୍ତଫା ଦେଇଥିବା କଥା କହିଥିଲେ ଉଭୟ ନେତା । ଉଭୟ ନେତାଙ୍କ ଇସ୍ତଫା ପରେ ପ୍ରମିଳା ମଲ୍ଲିକ ଉଭୟ ବିଭାଗର ଅତିରିକ୍ତ ଦାୟିତ୍ୱ ତୁଲାଉଛନ୍ତି । କିନ୍ତୁ କେବେ ନବୀନଙ୍କ ଟିମର ନବକଳେବର ହେବ ତାହା ଏବେବି ସସପେନ୍ସରେ ରହିଛି । ଦୁଇ ଜଣ ମନ୍ତ୍ରୀ ଇସ୍ତଫା ଦେବା ପରେ ମୋଟ ୩ଟି ବିଭାଗର ମନ୍ତ୍ରୀପଦ ଫାଙ୍କା ପଡିଛି । ତେଣୁ କାହାକୁ ନବୀନ ସୁଯୋଗ ଦେବେ ତାହା ଉପରେ ସମସ୍ତଙ୍କର ନଜର ରହିଛି ।
Kanak News is now on WhatsApp
Join and get latest news updates delivered to you via WhatsApp
ରାଜନୈତିକ କରିଡରରେ ହେଉଥିବା ଚର୍ଚ୍ଚା ଅନୁଯାୟୀ, ଆସନ୍ତା ୨୨ ତାରିଖ ପରେ ନବୀନଙ୍କ ମନ୍ତ୍ରୀମଣ୍ଡଳରେ ନୂଆମୁହଁ ଦେଖିବାକୁ ମିଳିପାରେ । ଏମିତିରେ ଏବେ କିଛି ବିଧାୟକ ଓ ମନ୍ତ୍ରୀ ଏବେ ଦୁବାଇ ଗସ୍ତରେ ଯାଇଛନ୍ତି । ତେଣୁ ଦୁବାଇ ଗସ୍ତ ଶେଷ ହେବା ପରେ କିଛି ବଡ ନିଷ୍ପତ୍ତି ନେଇପାରନ୍ତି ନବୀନ । ସେହିଭଳି ଏବେ ରାଜ୍ୟପାଳ ଓଡ଼ିଶାରେ ନାହାନ୍ତି । ଆସନ୍ତା ୨୨ ତାରିଖ ପରେ ରାଜ୍ୟପାଳ ଓଡ଼ିଶା ଫେରିବେ । ତେଣୁ ୨୨ ତାରିଖ ପରେ ନୂଆ ମନ୍ତ୍ରୀ ଶପଥ ନେବାର ସମ୍ଭାବନା ଅଧିକ ରହିଥିବା ଚର୍ଚ୍ଚା ହେଉଛି । ଚଳିତ ମାସରେ ରାଜ୍ୟପାଳଙ୍କ କାର୍ଯ୍ୟକାଳ ମଧ୍ୟ ଶେଷ ହେଉଛି । ତେଣୁ ନୂଆ ରାଜ୍ୟପାଳଙ୍କ ନିଯୁକ୍ତି ପରେ ହୁଏତ ନବୀନଙ୍କ ମନ୍ତ୍ରୀମଣ୍ଡଳ ସମ୍ପ୍ରସାରଣ ହୋଇପାରେ । ଏଭଳି ସମ୍ଭାବନା ଏଥିପାଇଁ ବଢୁଛି କାରଣ, ଆସନ୍ତା ୨୨ ତାରିଖରୁ ବିଭାଗୱାରୀ ମନ୍ତ୍ରୀଙ୍କ କାର୍ଯ୍ୟର ସମୀକ୍ଷା କରିବେ ନବୀନ । ମନ୍ତ୍ରୀଙ୍କ ରିପୋର୍ଟକାର୍ଡର ସମୀକ୍ଷା ପରେ କାହାକୁ ମନ୍ତ୍ରୀମଣ୍ଡଳରୁ ବାଦ୍ ଦିଆଯିବ ଓ କାହାକୁ ମନ୍ତ୍ରୀମଣ୍ଡଳରେ ସାମିଲ କରାଯିବ ସେନେଇ ନିଷ୍ପତ୍ତି ନେଇପାରନ୍ତି ନବୀନ । ବିଭାଗୱାରୀ ମନ୍ତ୍ରୀଙ୍କ ପ୍ରଦର୍ଶନ ବାବଦରେ ଜୁନ୍ ୧ ତାରିଖ ଯାଏଁ ସମୀକ୍ଷା କରିବେ ନବୀନ । ଆଉ ଏହି ସମୟସୀମା ପରେ ନୂଆ ରାଜ୍ୟପାଳ ମଧ୍ୟ ନିଯୁକ୍ତି ପାଇ ସାରିଥିବେ । ତେଣୁ ଏହି ସମୟକୁ ବୋଧହୁଏ ନବୀନ ଅପେକ୍ଷା କରିଥିବା ଚର୍ଚ୍ଚା ହେଉଛି ।
ଅନ୍ୟପଟେ ନୂଆ ମନ୍ତ୍ରୀମଣ୍ଡଳରେ କାହାକୁ ସ୍ଥାନ ମିଳିବ ତାହା ମଧ୍ୟ ସବୁଠୁ ବଡ ପ୍ରଶ୍ନ । ମୋଟ ୩ ମନ୍ତ୍ରୀପଦ ଏବେ ଫାଙ୍କା ପଡିଥିବା ବେଳେ ସମୀକ୍ଷା ପରେ ଏହି ସଂଖ୍ୟା ବଢିପାରେ । କିନ୍ତୁ ନବୀନଙ୍କ ଆଶୀର୍ବାଦ କାହା ମୁଣ୍ଡ ଉପରେ ରହିବ ତାହାକୁ ନେଇ ଅନେକ ଚର୍ଚ୍ଚା । ୩ ମନ୍ତ୍ରୀପଦ ପାଇଁ ପାଖାପାଖି ୩୦ରୁ ଅଧିକ ଆଶାୟୀ ରହିଥିବା ନେଇ ରାଜନୈତିକ ମହଲରେ ଚର୍ଚ୍ଚା । କାରଣ ଆଗକୁ ୨୦୨୪ ନିର୍ବାଚନ ରହିଛି । ତେଣୁ ନିର୍ବାଚନ ପୂର୍ବରୁ ମନ୍ତ୍ରୀପଦ ମିଳିଲେ କେବଳ କାଟତି ବଢିବନି ବରଂ ନବୀନଙ୍କ ଗୁଡବୁକରେ ଥିବା ନେଇ ସଂକେତ ମିଳିବ । ଯେଉଁଥିପାଇଁ ବିଜେଡିର ଅନେକ ନେତା ନିଜ ସ୍ତରରେ ମନ୍ତ୍ରୀପଦ ପାଇବା ପାଇଁ ଲବି ଆରମ୍ଭ କରିଥିବା ଚର୍ଚ୍ଚା ହେଉଛି । ଖାସକରି ଉପକୂଳ, ଦକ୍ଷିଣ ଓ ପଶ୍ଚିମ ଓଡ଼ିଶାର ଅନେକ ନେତା ଏବେ ମନ୍ତ୍ରୀ ଲଡୁ ଖାଇବାକୁ ଆଶାୟୀ ରହିଥିବା ନେଇ ସାଧାରଣରେ ଚର୍ଚ୍ଚା ଜୋର ଧରିଲାଣି । କିନ୍ତୁ ଶେଷ ନିଷ୍ପତ୍ତି ନବୀନଙ୍କ ହାତରେ ରହିଛି । ଯିଏ ନିଜ ନିଷ୍ପତ୍ତିରେ ସଭିଙ୍କୁ ଚକିତ କରିଥାନ୍ତି ।