ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟକୁ ନେଇ କିଏ କରୁଛି ଗୁଜବ? ବିଜେଡି ମୁଖପାତ୍ର କହିଲେ ଜଣେ ପୂର୍ବତନ ସାଂସଦ, ଜଣେ ବର୍ତମାନର ସାଂସଦଙ୍କ ରହିଛି ହାତ
କନକ ବ୍ୟୁରୋ: ଗୁଜବକୁ ହସରେ ଉଡାଇ ସୁସ୍ଥ ଥିବା ନେଇ ସାରା ଓଡିଶାକୁ ମୁଖ୍ୟମନ୍ତ୍ରୀ ବାର୍ତା ଦେବା ପରେ ଅତୀତର ବିତର୍କିତ ପୃଷ୍ଠା ପୁଣି ଚର୍ଚ୍ଚାକୁ ଆସିଛି । ଯେତେବେଳେ ୨୦୧୯ର ଠିକ୍ ନିର୍ବାଚନ ଆଗରୁ ନବୀନ ଏକ ସାକ୍ଷାତକାରରେ ସ୍ୱାସ୍ଥ୍ୟକୁ ନେଇ ଉଠିଥିବା ଗୁଜବ ପାଇଁ ବୈଜୟନ୍ତ ପଣ୍ଡାଙ୍କ ଆଡକୁ ଅଙ୍ଗୁଳି ଉଠାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ନବୀନଙ୍କ ବକ୍ତବ୍ୟ ହୁଏତ ଦଳୀୟ କର୍ମୀଙ୍କ ମନରେ ଜୋଶ୍ ଭରି ଥାଇପାରେ ହେଲେ ଏହା ଅନେକ ଅସମାହିତ ପ୍ରଶ୍ନକୁ ସାମ୍ନାକୁ ଆଣିଛି, ଯାହାର ଉତର ଉଭୟ ସରକାର ଓ ଦଳକୁ ଦେବାକୁ ପଡିବ । କନକ ନ୍ୟୁଜର ବିତର୍କରେ ଦଳୀୟ ମୁଖପାତ୍ର ଲେନିନ୍ ମହାନ୍ତି ଜଣେ ପୂର୍ବତନ ସାଂସଦ ଏବଂ ଜଣେ ବର୍ତମାନର ସାଂସଦଙ୍କୁ ଗୁଜବକାରୀ ବୋଲି ଆକ୍ଷେପ କରିଥିଲେ । ହେଲେ କାହାର ନାଁ ନେଇନଥିଲେ ।
ଯଦିଓ ବିଜେଡି ମୁଖପାତ୍ର କାହାର ନାଁ ସିଧାସଳଖ ନେଇନଥିଲେ ତଥାପି ଦୁଇଟି ଦିଗକୁ ଇଙ୍ଗିତ କରିଥିଲେ । ଜଣେ ପୂର୍ବତନ ସାଂସଦ ଏବଂ ଗଣମାଧ୍ୟମ ସହ ସଂପର୍କ ଥିବା ନେତା ଏହା ପଛର ଚେହେରା ବୋଲି ସେ ଉଲ୍ଲେଖ କରିଥିଲେ । ହେଲେ ବାରମ୍ବାର ପଚରାଯିବା ସତ୍ୱେ ବି ସେ କାହା ନାଁ ନେଇନଥିଲେ ।
ଏବେ ଆମେ ଆପଣଙ୍କୁ ୨୦୧୯ରେ ମୁଖ୍ୟମନ୍ତ୍ରୀ ଦେଇଥିବା ଏକ ସାକ୍ଷାତକାରର କିଛି ଅଂଶ ଦେଖାଇବୁ । ଯେଉଁଥିରେ ସ୍ୱାସ୍ଥ୍ୟକୁ ନେଇ ହୋଇଥିବା ଗୁଜବ ପାଇଁ ବୈଜୟନ୍ତ ପଣ୍ଡାଙ୍କ ନାଁ ନେଇଥିଲେ ନବୀନ ପଟ୍ଟନାୟକ । ହେଲେ ଏହାକୁ ବୈଜୟନ୍ତ ଖଣ୍ଡନ କରିଥିଲେ ।
୨୦୧୯ ସାଧାରଣ ନିର୍ବାଚନ ବେଳେ ଏହି ବୟାନ ବେଶ ଚର୍ଚ୍ଚା ସୃଷ୍ଟି କରିଥିଲା । ଯେତେବେଳେ କେନ୍ଦ୍ରାପଡାରେ ରାଜ୍ୟ ଦେଖୁଥିଲା ସବୁଠାରୁ ବଡ ଲଢେଇ । ଠିକ୍ ସେତିକିବେଳେ ବୈଜୟନ୍ତଙ୍କ ନାଁ ନେଇ ମୁଖ୍ୟମନ୍ତ୍ରୀ କରିଥିଲେ ଶାଣିତ ଆକ୍ରମଣ । ଆଉ ଲିଙ୍ଗରାଜ ମନ୍ଦିର ପରିଦର୍ଶନ କରିବା ପରେ ମୁଖ୍ୟମନ୍ତ୍ରୀ ରଖିଥିବା ବୟାନ ପୁଣି ଚର୍ଚ୍ଚା ଆରମ୍ଭ କରିଛି, ଗୁଜବ ପଛରେ କାହାର ହାତ ରହିଛି? ହେଲେ ଏହି ଅପପ୍ରଚାରକୁ ନେଇ ଏବେ ବିଜେପି-ବିଜେଡି ମୁହାଁମୁହିଁ ହୋଇଛନ୍ତି । ଯଦି ବିଜେଡି ଗୁଜବକାରୀଙ୍କୁ ଚିହ୍ନିଛି ତେବେ ନାଁନେବାରେ ସମସ୍ୟା କଣ ରହିଛି? କାହିଁକି ରାଜ୍ୟବାସୀଙ୍କ ଆଗରେ ସେହି ଅପପ୍ରଚାରକାରୀଙ୍କ ମୁଖା ଖୋଲୁନାହିଁ ।