କନକ ବ୍ୟୁରୋ: ଲୋକଙ୍କ ମତ ଆଧାରରେ ନିର୍ବାଚନୀ ଇସ୍ତାହାର ପ୍ରସ୍ତୁତ କରିବ ବିଜେପି । ଏଥିପାଇଁ ୧ କୋଟି ଜନମତ ସଂଗ୍ରହ ଅଭିଯାନ ଆରମ୍ଭ କରିଛି ଦଳ । ରାଜ୍ୟର ଏକ କୋଟି ଲୋକଙ୍କ ପାଖକୁ ଯାଇ ବିଜେପି ସଂକଳ୍ପ ପତ୍ର ପାଇଁ ପରାମର୍ଶ ଲୋଡିବ । ଏହାସହ ବିଜେପିଠାରୁ ଚାହୁଁଛନ୍ତି କଣ, ଏନେଇ ନମୋ ଆପ୍ ଜରିଆରେ ଜନତା ଜଣାଇପାରିବେ ।
Kanak News is now on WhatsApp
Join and get latest news updates delivered to you via WhatsApp
୨୪ ନିର୍ବାଚନରେ ଲୋକଙ୍କ ମନ ଜିଣିବା ପାଇଁ ଏମିତି ଏକ ବଡ ଅଭିଯାନ କରିଛି, ଭାରତୀୟ ଜନତା ପାର୍ଟି । ବିଜେପି କାର୍ଯ୍ୟାଳୟରେ ରାଜ୍ୟ ବିଜେପି ସଭାପତି ମନମୋହନ ସାମଲ ଏହି ଅଭିଯାନର ଶୁଭାରମ୍ଭ କରିଛନ୍ତି । ଏହି ଅଭିଯାନ ଜରିଆରେ ସାରା ରାଜ୍ୟରୁ କୋଟିଏ ଜନମତ ସଂଗ୍ରହ କରିବାକୁ ଲକ୍ଷ୍ୟ ରଖିଛି ବିଜେପି । ଯୋଜନା ଅନୁସାରେ ପ୍ରତି ନିର୍ବାଚନ ମଣ୍ଡଳୀରେ ୨ଟି ଗାଡି ବୁଲିବ । ସେଥିରେ ସଂକଳ୍ପପତ୍ର ବାକ୍ସ ରହିବ । ଲୋକମାନେ ଗାଡି ପାଖକୁ ଆସି ମତାମତ ଦେବାକୁ ଅପିଲ କରିଛନ୍ତି ମନମୋହନ । ଏଥିସହ ନମୋ ଆପରେ ଭଏସ ମେସେଜ୍ ଜରିଆରେ ମଧ୍ୟ ସିଧାସଳଖ ପ୍ରଧାନମନ୍ତ୍ରୀଙ୍କୁ ନିଜର ମତ ବା ପରାମର୍ଶ ଦେଇପାରିବେ ।
କେଉଁ ପ୍ରସଙ୍ଗରେ ଦେବେ ମତ..
– ଚାଷୀଙ୍କ ଆୟ ୨ଗୁଣ କେମିତି କରିବା?
-ଦାଦନ ସମସ୍ୟାର ସମାଧାନ?
– ଚିଟଫଣ୍ଡ ପ୍ରସଙ୍ଗରେ ସରକାରଙ୍କ ନୀତି କଣ ରହିବ ଆବଶ୍ୟକ?
– ମହିଳା ସଶକ୍ତିକରଣ ପାଇଁ ଆଉ କଣ ପଦକ୍ଷେପ ନେବାକୁ ପଡିବ ?
– ବିଜେପି କ୍ଷମତାକୁ ଆସିଲେ ଆଉ କଣ ଜନମଙ୍ଗଳକାରୀ ଯୋଜନା କରିହେବ?
ତେବେ ଇସ୍ତାହାର ପାଇଁ ବିଜେପିର ଜନମତ ସଂଗ୍ରହ ଅଭିଯାନକୁ ନେଇ ପ୍ରଶ୍ନ ଉଠାଇଛନ୍ତି ବିଜେଡି ବିଧାୟକ । ଅନ୍ୟପଟେ ୨୦୧୯ରେ ବିଜେପି ଦେଇଥିବା ୨୩୫ ନିର୍ବାଚନୀ ପ୍ରତିଶ୍ରୁତିରୁ ୨୨୨ ପ୍ରତିଶ୍ରୁତି ପାଳନ କରିଛନ୍ତି କେନ୍ଦ୍ର ସରକାର ।
ମାଗଣା ବଂଟନ ଯୋଜନାକୁ ରେବଡୀ ସଂସ୍କୃତି କହି ସମାଲୋଚନା କରିଥାଏ ବିଜେପି । ତେଣୁ ଆଗାମି ଇସ୍ତାହାରରେ ବିଜେପି ସେହିଭଳି କିଛି ପ୍ରତିଶ୍ରୁତି ଦେଉଛି କି ନାହିଁ ତା ଦେଖିବାକୁ ବାକି ରହିଲା ।