ପଶ୍ଚିମବଙ୍ଗର ୬୦୪ ବୁଥରେ ଆଜି ସାନି ନିର୍ବାଚନ : ପଞ୍ଚାୟତ ଭୋଟ ବେଳେ ହିଂସାକାଣ୍ଡ ପରେ ପୁଣି ମତଦାନ ପାଇଁ ରାଜ୍ୟ ନିର୍ବାଚନ ଅଧିକାରୀଙ୍କ ନିଷ୍ପତ୍ତି
କନକ ବ୍ୟୁରୋ : ପଶ୍ଚିମବଙ୍ଗରେ ଶନିବାର ହୋଇଥିବା ପଂଚାୟତ ନିର୍ବାଚନରେ ବ୍ୟାପକ ହିଂସାକାଣ୍ଡ ପରେ ବଡ ନିଷ୍ପତ୍ତି ନେଇଛନ୍ତି ରାଜ୍ୟ ନିର୍ବାଚନ ଅଧିକାରୀ । ଆଜି ପୁଣି ହିଂସାକାଣ୍ଡ ଘଟିଥିବା ୬୦୪ ବୁଥରେ ସାନି ନିର୍ବାଚନ ହେବ । ନଦିଆ ପୁରଲିଆ, ମାଲଦା, ମୁର୍ଶିଦାବାଦ, ବୀରଭୂମି, ଜଲପାଇଗୁଡି, ଉତର-୨୪ ପ୍ରଗଣା ଓ ଦକ୍ଷିଣ ୨୪ ପ୍ରଗଣାରେ ଆଜି ପୁଣି ଭୋଟ ଗ୍ରହଣ କରାଯିବ । ମୁର୍ଶିଦାବାଦରେ ସର୍ବାଧିକ ୧୭୫ ବୁଥରେ ଭୋଟ ଗ୍ରହଣ ହେବ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ମାଲଦାରେ ୧୧୨ ବୁଥ, ନଦିଆରେ ୮୯ ବୁଥ, ଉତର ୨୪ ପ୍ରଗଣାର ୪୬ ବୁଥ ଓ ଦକ୍ଷିଣ ୨୪ ପ୍ରଗଣାର ୩୬ ବୁଥରେ ସାନି ନିର୍ବାଚନ ହେବ । କେନ୍ଦ୍ରୀୟ ସୁରକ୍ଷାବଳର ନୀରିକ୍ଷଣରେ ମୋଟ ୬୦୪ ବୁଥରେ ଭୋଟ ଗ୍ରହଣ କରାଯିବ । ଶନିବାର ମତଦାନ ବେଳେ ଉତେଜନା, ହିଂସା, ପୋଡା ଜଳା ଦେଖିବାକୁ ମିଳିଥିଲା । ବୁଥରେ ମାରପିଟ, ବୁଥ କ୍ୟାପଚରିଂ, ପୋଡା ଜଳା, ବାଲଟ ବକ୍ସ ଲୁଟ ହୋଇଥିଲା । ବିଶେଷ କରି ମୁର୍ଶିଦାବାଦ, କୁଚବିହାର ଓ ଉତର ୨୪ ପ୍ରଗଣାରେ ବ୍ୟାପକ ହିଂସାକାଣ୍ଡ ଦେଖିବାକୁ ମିଳିଛି । ରାଜ୍ୟ ବିଜେପି ପୁଣି ଥରେ ନିର୍ବାଚନ କରିବା ଦାବିରେ ରବିବାର ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଥିଲା ।
ଏବେ ରାଜ୍ୟ ନିର୍ବାଚନ ଅଧିକାରୀଙ୍କ ନିଷ୍ପତି ପରେ ହିଂସାକାଣ୍ଡ ଯୋଗୁଁ ନିରପେକ୍ଷ ଭୋଟ ଗ୍ରହଣ ହୋଇନଥିବା ବୁଥଗୁଡିକରେ ଆଜି ପୁଣି ମତଦାନ ହେବ । ପଂଚାୟତ ନିର୍ବାଚନ ବେଳେ ବିଭିନ୍ନ ଦଳର କର୍ମୀ ଓ ସମର୍ଥକଙ୍କ ମଧ୍ୟରେ ମାରପିଟ, ବୋମା ମାଡ, ଗୁଳି ମାଡ ଯୋଗୁଁ ୩୭ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଅନ୍ୟପଟେ ଲୁଟ ହୋଇଥିବା ବାଲାଟ ବକ୍ସ ପୋଖରୀରୁ, ଜଙ୍ଗଲ ମଧ୍ୟରୁ ଉଦ୍ଧାର କରାଯାଇଛି ।