ଉତ୍କଳ ସିନେ ଚାମ୍ବର୍ସ ଅଫ୍ କମର୍ସ ନାଁରେ ହେରଫେର ଅଭିଯୋଗ : ୩ କୋଟିରୁ ଅଧିକ ଟଙ୍କାର ଅନିୟମିତତା ନେଇ ଥାନାରେ ଏତଲା
କନକ ବ୍ୟୁରୋ : ଉତ୍କଳ ସିନେ ଚାମ୍ବର୍ସ ଅଫ୍ କମର୍ସ ବା ୟୁସିସିସି ନାମରେ ଥିବା ପାଣ୍ଠିର ବ୍ୟାପକ ହେରଫେର ଅଭିଯୋଗ । ୩ କୋଟିରୁ ଅଧିକ ଟଙ୍କା ହେରଫେର ହୋଇଥିବା ଅଭିଯୋଗ ହୋଇଛି । ପୁରୀଘାଟ ଥାନାରେ ଏ ନେଇ ଏତଲା ଦିଆଯାଇଛି । ଏତଲା ଅନୁଯାୟୀ ୟୁସିସିସିର ଏକ ଶାଖା ଭାବେ ଓଡ଼ିଶା ଫିଲ୍ମ ପ୍ରଡ୍ୟୁର୍ସ ଆସୋସିଏସନକୁ ଦର୍ଶାଇ ନୂଆ ସଦସ୍ୟଙ୍କ ନିକଟରୁ ବହୁବର୍ଷ ଧରି ଅର୍ଥ ଲୁଟ୍ ହୋଇଆସୁଛି । କିନ୍ତୁ ଏଭଳି କୌଣସି ଶାଖା ସଂସ୍ଥା ପଞ୍ଜିକୃତ ହୋଇ ନଥିବା ବେଳେ ଯୋଜନାବଦ୍ଧ ଭାବେ ଅର୍ଥ ଲୁଟ୍ କରାଯାଉଥିବା ଅଭିଯୋଗ ହୋଇଛି । ଓଲିଉଡ ଫିଲ୍ମର କିଛି ପ୍ରଯୋଜକ ଏ ନେଇ ପୁରୀଘାଟ ଥାନାରେ ଫେରାଦ ହୋଇ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡିଆ ଚଳଚ୍ଚିତ୍ର ନିର୍ମାତା, ବିତରକ ଏବଂ ଏକ୍ଜିବିର୍ଟଙ୍କ ବିଭିନ୍ନ ପ୍ରକାରର ଆବଶ୍ୟକତାକୁ ଦୃଷ୍ଟିରେ ରଖି ୟୁସିସିସି ୧୯୯୩ରେ ଗଠନ କରାଯାଇଥିଲା । ସୋସାଇଟିସ୍ ଆକ୍ଟ ଅନୁଯାୟୀ ଏହା ପଞ୍ଜୀକରଣ କରାଯାଇଛି । ସମୟକ୍ରମେ ନୂଆ ପ୍ରଡକ୍ସନ ହାଉସ୍, ବିତରକ, ଏକ୍ଜିବିର୍ଟମାନେ ଏହି ସଂସ୍ଥା ସହିତ ଯୋଡ଼ି ହୋଇଛନ୍ତି । କିନ୍ତୁ କାର୍ଯ୍ୟନିର୍ବାହୀ କମିଟି ପାଇଁ ଅଫିସ୍ ବିୟରର୍ସଙ୍କ ଉପଯୁକ୍ତ ନିର୍ବାଚନ ହୋଇନାହିଁ । ଗଲା ଦୁଇ ଦଶନ୍ଧି ତଳେ ନିର୍ବାଚନ ହୋଇଥିଲା । କିଛି ସଦସ୍ୟଙ୍କ ଏହାରି ଭିତରେ ଦେହାନ୍ତ ହୋଇଯାଇଛି । କିନ୍ତୁ ସେମାନଙ୍କ ପରେ କୌଣସି ଉପନିର୍ବାଚନ କରାଯାଇନାହିଁ । ସୋସାଇଟିର କିଛି ସଦସ୍ୟ ନିଜେ ନିର୍ବାଚନ ତାରିଖ ସ୍ଥିର କରୁଛନ୍ତି । କିନ୍ତୁ ସାଧାରଣ ପରିଷଦ ବୈଠକ ନଡ଼ାକି ଚୟନ ପଦ୍ଧତି ମାଧ୍ୟମରେ ସେମାନେ ନିଜକୁ ଅଫିସ୍ ବିୟରର୍ସ ଭାବେ ପୁନଃ ନିଯୁକ୍ତ କରୁଛନ୍ତି ।
ଅନେକ ନୂଆ ସଦସ୍ୟ ୟୁସିସିସିରେ ଯୋଗ ଦେଉଥିବା ବେଳେ ସେମାନଙ୍କୁ ଓଡ଼ିଶା ଫିଲ୍ମ ପ୍ରଡ୍ୟୁର୍ସ ଆସୋସିଏସନ୍ ନାଁରେ ଏକ ରସିଦ୍ ପ୍ରଦାନ କରାଯାଇଛି । ଉକ୍ତ ଅନୁଷ୍ଠାନ ୟୁସିସିସିର ଏକ ଶାଖା ବୋଲି ଦର୍ଶାଯାଉଛି । କିନ୍ତୁ ଏଭଳି କୌଣସି ପଞ୍ଜିକୃତ ଶାଖା ନଥିବା ବେଳେ ୟୁସିସିସିର ବାଇ ଲରେ ଏଭଳି କୌଣସି ଶାଖା ଗଠନ ପାଇଁ ଅନୁମତି ବି ଦିଆଯାଇନାହିଁ ବୋଲି ସୂଚନା ରହିଛି । ଏବେ ଏତଲା ଗ୍ରହଣ କରିବା ପରେ ପୁରୀଘାଟ ଥାନା ଅନିୟମିତତା ଦିଗକୁ ନେଇ ତଦନ୍ତ କରିବ । ତଦନ୍ତ ସମୟରେ କିଛି ଅନିୟମିତତା ହୋଇଥିବା ଜଣାପଡ଼ିଲେ ସେହି ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।