କନକ ବ୍ୟୁରୋ : ମହାରାଷ୍ଟ୍ର, ବିଦଭ୍ର ଅଞ୍ଚଳର କଳାବତୀ ବନ୍ଦୁରକରଙ୍କୁ ନେଇ ପୁଣିଥରେ ସାରା ଦେଶରେ ଚର୍ଚ୍ଚା । ୨୦୦୮ ମସିହାରେ କଳାବତୀଙ୍କୁ ତାଙ୍କ ଘରକୁ ଯାଇ ଭେଟିଥିଲେ ରାହୁଲ ଗାନ୍ଧୀ । ଚାଷ ରୁଣରେ ବୁଡି କଳାବତୀଙ୍କ ସ୍ୱାମୀ ଆତ୍ମହତ୍ୟା କରିବା ପରେ କଳାବତୀଙ୍କ ସ୍ଥିତି ବହୁତ ଖରାପ ହୋଇଯାଇଥିଲା । କଳାବତୀଙ୍କ ୭ଟି ଝିଅ ଓ ୨ ପୁଅ ଅଛନ୍ତି । ସ୍ୱାମୀଙ୍କ ମୃତ୍ୟୁ ବେଳକୁ ତିନି ଝିଅଙ୍କ ବିବାହ ହୋଇ ସାରିଥିଲା । ଆଉ ଚତୁର୍ଥ ଝିଅର ବାହାଘର ହେବାର ଥିଲା । ଏହି ସମୟରେ ରୁଣରେ ବୁଡି କଳାବତୀଙ୍କ ଅବସ୍ଥା ଶୋଚନୀୟ ହୋଇ ପଡିଥିଲା । ଅନ୍ୟର ଚାଷ ବିଲରେ କାମ କରୁଥିଲେ କଳାବତୀ । ସେତେବେଳେ ତାଙ୍କୁ ଭେଟିଥିଲେ ରାହୁଲ । ଏ ହେଉଛି ସେହି ସମୟର ଦୃଶ୍ୟ । ୨୦୦୮ ମସିହାରେ ରାହୁଲ ଗାନ୍ଧୀ କଳାବତୀଙ୍କୁ ଭେଟି ତାଙ୍କ ଦୁଃଖ କଥା ଶୁଣିଥିଲେ । ତାଙ୍କ ସହ ବସି ଖାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ବୁଧବାର ଲୋକସଭାରେ ନିଜ ବକ୍ତବ୍ୟ ରଖି କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହା ଏହି କଳାବତୀ ବୁନ୍ଦେଲକରଙ୍କ ନାଁ ନେଇଥିଲେ । ରାହୁଲଙ୍କ ନାଁ ନନେଇ କହିଥିଲେ, ରାଜନୀତିରେ ଲଂଚ କରିବା ପାଇଁ ରାହୁଲ ଯାଇ କଳାବତୀଙ୍କ ଘରେ ଖାଇଥିଲେ । ଆଉ ଏହାପରେ କଂଗ୍ରେସ ଆହୁରି ୫ ବର୍ଷ ସରକାରରେ ରହିଥିଲା । ମାତ୍ର ସେହି ଭିତରେ ସେତେବେଳର କଂଗ୍ରେସ ସରକାର କଳାବତୀଙ୍କ ଦାରିଦ୍ର୍ୟ ଦୂର କରିବା ପାଇଁ କିଛି କରି ନଥିବା କହିଛନ୍ତି କେନ୍ଦ୍ରଗୃହମନ୍ତ୍ରୀ ଅମିତ ଶାହା । ବରଂ ବିଜେପି ସରକାରରେ ଆସିବା ପରେ କଳାବତୀଙ୍କୁ ସବୁ ପ୍ରକାର ସୁବିଧା ସୁଯୋଗ ଯୋଗାଇ ଦେଇଛି ।
ସଂସଦରେ କେନ୍ଦ୍ର ଗୃହମନ୍ତ୍ରୀଙ୍କ ବୟାନ ପରେ ଏବେ ଜାତୀୟ ଗଣମାଧ୍ୟମରେ କଳାବତୀଙ୍କୁ ନେଇ ଚର୍ଚ୍ଚା ଜୋରଦାର ଆରମ୍ଭ ହୋଇ ଯାଇଛି । କଳାବତୀ ମଧ୍ୟ ସାମ୍ନାକୁ ଆସି ପୁଣିଥରେ ନିଜ କଥା ବଖାଣିଛନ୍ତି । ୨୦୦୫ରେ ସ୍ୱାମୀ ରୁଣରେ ବୁଡି ଆତ୍ମହତ୍ୟା କରିବା ପରେ ତାଙ୍କୁ ସେତେବେଳେ ଭେଟିବାକୁ ଯାଇଥିଲେ ରାହୁଲ । କେବଳ ସେତିକି ନୁହେଁ ଫେରିବା ବେଳେ ତାଙ୍କ ହାତରେ ୩ ଲକ୍ଷ ଟଙ୍କାର ଚେକ୍ ଧରାଇଥିଲେ । କଳାବତୀଙ୍କୁ, ରାହୁଲ କୌଣସି ସହାୟତା କରି ନଥିବା, ସଂସଦରେ ଅଭିଯୋଗ କରିଛନ୍ତି ଅମିତ ଶାହା । ତେବେ କଳାବତୀ କହିଛନ୍ତି, ତାଙ୍କ କାହାଣୀ ।
କଳାବତୀଙ୍କ କାହାଣୀ
– ରାହୁଲ ମତେ ଭେଟିଲେ, ମୋର ଦାରିଦ୍ର୍ୟପଣ ଦୂର କରିଛନ୍ତି
– ଏବେ ମୁଁ ସନ୍ତୁଷ୍ଟ ଅଛି, ଆର୍ଥିକ ଭାବେ ସ୍ୱଚ୍ଛଳ ଅଛି
– ପ୍ରଥମେ ୩ ଲକ୍ଷ ଟଙ୍କାରେ ଚେକ୍ ଦେଇଥିଲେ ରାହୁଲ
– ଶୁଲଭ ଇଂଟରନ୍ୟାସନାଲ ନାମକ ଏନଜିଓ ପକ୍ଷରୁ ମିଳିଲା ୩୦ ଲକ୍ଷ ଟଙ୍କା
– ଯାହା ବ୍ୟାଙ୍କ ଖାତାରେ ଯମା ଅଛି
– ଏହି ଟଙ୍କାର ସୁଧ ବାବଦକୁ ମାସିକ ୨୫ ହଜାର ଟଙ୍କା ମିଳୁଛି
– ଏହି ଟଙ୍କାରେ ମୁଁ ପିଲାଛୁଆଁଙ୍କୁ ପାଠ ପଢାଇବା ସହ ପରିବାର ଚଳାଇଛି
– ପ୍ରଥମେ ଝାଟି ମାଟିର ଘର ଥିଲା ଏବେ କୋଠା ଘର ତୋଳି ପାରିଛି
– ୨୦୦୮ରେ ରାହୁଲ ଭେଟିବା ପରେ ସାରା ଦେଶରୁୁ ଆର୍ଥିକ ସହାୟତା ମିଳିଛି
– ହେଲେ ଏବେ ବି ଚାଷ କାମ କରୁଛି
– ଘରେ ବସି ରହିବାକୁ ମତେ ଭଲ ଲାଗେ ନାହିଁ
– ହେଲେ, ୨୦୧୦ରେ ଚାଷରେ କ୍ଷତି ସହି ମୋ ଜ୍ୱାଇଁ ଆତ୍ମହତ୍ୟା କରିଥିଲେ