ବିଧାନସଭାରେ ଚିଟଫଣ୍ଡ ତାତି, ହଙ୍ଗାମା କଲେ ବିରୋଧୀ ବିଜେପି ସଦସ୍ୟ। ପ୍ରେସମିଟ କରି ସ୍ପଷ୍ଟୀକରଣ ରଖିଲେ ପ୍ରଭାତ ବିଶ୍ୱାଳ।
କନକ ବ୍ୟୁରୋ: ବିଧାନସଭାରେ ଚିଟଫଣ୍ଡ ତାତି । ବିଧାନସଭା ପ୍ରଶ୍ନକାଳରେ ବାଚସ୍ପତିଙ୍କ ପୋଡିୟମ ତଳକୁ ଆସି ବିରୋଧୀ ବିଜେପି ଓ କଂଗ୍ରେସ ସଦସ୍ୟ ପ୍ରତିବାଦ କରିଛନ୍ତିା । କଂଗ୍ରେସ ଚାଷୀ ପ୍ରସଙ୍ଗ ଉଠାଇଥିବାବେଳେ ବିଜେପି ଚିଟପଣ୍ଡ ପ୍ରସଙ୍ଗରେ ଆଲୋଚନା କରିବାକୁ ଦାବି କରିଥିଲେ । ବିଜେପି ଆଣିଥିବା ମୁଲତବୀ ପ୍ରସ୍ତାବ ‘ଚିଟଫଣ୍ଡରେ କୋଟି କୋଟି ଟଙ୍କା ଖାଇଲା କିଏ?: କାହିଁକି ଆଖି ବନ୍ଦ କରି ଚୁପ ବସିଛନ୍ତି ସରକାର’ ଶୀର୍ଷକ ପ୍ରସଙ୍ଗକୁ ନେଇ ପ୍ରଶ୍ନକାଳ ଓ ଶୂନ୍ୟକାଳ ହଙ୍ଗାମା କରିଥିଲେ ବିଜେପି ସଦସ୍ୟ । ଫଳରେ ପ୍ରଶ୍ନକାଳ ଓ ଶୂନ୍ୟକାଳ ଚାଲିପାରିନଥିଲା । ବିଜେପି ବିଧାୟକ ମୋହନମାଝି କହିଛନ୍ତି, ଚିଟଫଣ୍ଡ ଆଲୋଚନା କରିବାକୁ ସରକାର ଡରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଚିଟଫଣ୍ଡ ପ୍ରସଙ୍ଗରେ ବିଜେପିର ମୁଲତବୀ ପ୍ରସ୍ତାବ କାହିଁକି ଗ୍ରହଣ କରାଗଲାନି ସେ ନେଇ ବାଚସ୍ପତି ଗୃହରେ ସ୍ପଷ୍ଟୀକରଣ ରଖିଥିଲେ । ବିକ୍ରମ କେଶରୀ ଆରୁଖ କହିଥିଲେ, ଚିଟଫଣ୍ଡ ପ୍ରସଙ୍ଗ ହାଇକୋର୍ଟରେ ବିଚାରାଧୀନ ରହିଛି । କମିଶନ ତଦନ୍ତ କରୁଛନ୍ତି । ୨୦୧୪ରେ ତତକାଳୀନ ବାଚସ୍ପତି ଆଡଭୋକେଟ ଜେନେରାଲଙ୍କ ପରାମର୍ଶ ନେଇ ରୁଲିଂ ଦେଇ କହିଥିଲେ,ଚିଟଫଣ୍ଡ ପ୍ରସଙ୍ଗରେ ଗୃହରେ ଆଲୋଚନା ହୋଇପାରିବନାହିଁ । ଏହି ପ୍ରସଙ୍ଗ ବର୍ତମାନର ପ୍ରସଙ୍ଗ ନୁହେଁ । ତେଣୁ ଏହା ଗୃହରେ ଆଲୋଚନା ହୋଇପାରିବ ନାହିଁ । ସେପଟେ ବିଜେଡି କହିଛି, ସରକାର ଚିଟପଣ୍ଡ ପ୍ରସଙ୍ଗକୁ ଡରୁନାହାନ୍ତି, ବିଧାନସଭାରେ ଯାହା କାର୍ଯ୍ୟକ୍ରମ ହେଉଛି ଆଇନ ଅନୁସାରେ ଆଲୋଚନା ହେଉଛି ।
ସେପଟେ ଚିଟଫଣ୍ଡ ଦୁର୍ନୀତିରେ ଛନ୍ଦି ହୋଇଥିବା ପ୍ରଭାତ ବିଶ୍ୱାଳ ମୁହଁ ଖୋଲିଛନ୍ତି । ଆଉ କହିଛନ୍ତି, ସେ ନ୍ୟାୟରେ ଅଛନ୍ତି । ସମ୍ବିଧାନ ଓ ନ୍ୟାୟପାଳିକା ଉପରେ ତାଙ୍କର ଭରସା ରହିଛି । ଇଡି ମାନହାନି କରିଛି । ସମୟ ବଡ ବଳବାନ ଓ ସମୟ ଆସିଲେ ସବୁ ଜଣାପଡିବ । ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ ବଳରେ ପ୍ରଭାତଙ୍କ ନାଁରେ କଟକ ଷ୍ଟେଟ୍ ବ୍ୟାଙ୍କରେ ଥିବା ୨୫ ଲକ୍ଷ ଟଙ୍କାକୁ ଆଟାଚ୍ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ବିଧାନସଭାରେ ଅନେକ ଗୁରୁତ୍ୱ ପ୍ରସଙ୍ଗରେ ଆଲୋଚନା ହେଉଛି । କିନ୍ତୁ ଆଇନର ଆଳ କରି ଚିଟଫଣ୍ଡ ପ୍ରସଙ୍ଗରେ ଆଲୋଚନା କରିବାକୁ ପଛଘୁଞ୍ଚା ଦେଉଛନ୍ତି ସରକାର । ସେପଟେ ଲକ୍ଷ ଲକ୍ଷ ଜମାକାରୀ ନ୍ୟାୟ ଅପେକ୍ଷାରେ ବସିଛନ୍ତି ।