କନକ ବ୍ୟୁରୋ: ଧାଡ଼ି ଧାଡ଼ି ହୋଇ ବିଦ୍ୟୁତ ଟାୱାର ବସିଛି, ଅଧା ତାର ଟଣା ହୋଇଛି ତ ଆଉ ଅଧା ନାହିଁ । ଆଉ କିଛି ତାର ଗଛରେ ବନ୍ଧା ହୋଇଛି । ପାୱାର ଗ୍ରୀଡ ଭିତରେ କାମ ବି ଚାଲୁଛି ହେଲେ କେବେ ସରିବ ତା’ର ଠିକଣା ନାହିଁ । ୨୦୧୬ ମସିହାରୁ ମାଲକାନଗିରି ଜିଲ୍ଲାର ଉପାନ୍ତ କାଲିମେଳା ପାୱାର ଗ୍ରୀଡ଼ କାମ ଆରମ୍ଭ ହୋଇଛି । ୪ ବର୍ଷରେ ଅଧା କାମ ହୋଇଥିବା ବେଳେ କେବେ ସରିବ ତାକୁ ନେଇ ପ୍ରଶ୍ନ ଉଠିଛି । କାଲିମେଳା ଓ ପଡିଆ ବ୍ଳକର ପ୍ରାୟ ୨ ଲକ୍ଷ ଲୋକଙ୍କ ପାଇଁ କାଲିମେଳାରେ ୨୨୦/୩୩ କେଭିର ପାୱାର ଗ୍ରୀଡ଼ ସ୍ଥାପନ କରିବାକୁ ୨୦୧୬ରେ ନିଷ୍ପତି ନେଇଥିଲେ ରାଜ୍ୟ ସରକାର । ପ୍ରାୟ ୪୬ କୋଟି ଟଙ୍କା ବ୍ୟୟରେ ଗ୍ରୀଡ଼ ନିର୍ମାଣ ଦାୟିତ୍ୱ ଓପିଟିସିଏଲ୍ ସଂସ୍ଥାକୁ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୬ରେ ଏହି ଗ୍ରୀଡ଼ ନିର୍ମାଣ କାମ ଆରମ୍ଭ କରି ୨୦୧୯ରେ ସଂପୂର୍ଣ୍ଣ କରି ବିଦ୍ୟୁତ୍ ବିଭାଗକୁ ହସ୍ତାନ୍ତର କରିବା କଥା । ୨୦୧୯ ସରି ୨୦୨୨ ଅଧା ହେଲାଣି, କିନ୍ତୁ ଗ୍ରୀଡ଼ କାର୍ଯ୍ୟ ସଂପୂର୍ଣ୍ଣ ହୋଇନାହିଁ । କି କାଲିମେଳା ଓ ପଡ଼ିଆ ବ୍ଲକବାସୀ ନିରବଛନ୍ନ ବିଦ୍ୟୁତ୍ ସେବା ପାଇପାରୁନାହାଁନ୍ତି । କେନ୍ଦ୍ର ସରକାରଙ୍କ ପରିବେଶ ମଂଜୁରୀ ମିଳିବାରେ ବିଳମ୍ବ ଯୋଗୁଁ ଗ୍ରୀଡ଼ କାର୍ଯ୍ୟ ସଂପୂର୍ଣ୍ଣ ହୋଇପାରୁନଥିବା କୁହାଯାଇଛି । ତେବେ ପ୍ରକୃତରେ ଏହା ପଛରେ ପରିବେଶ ମଂଜୁରୀ ନା ଆଉ କିଛି ସମାସ୍ୟା ରହିଛି ସେ ସଂପର୍କରେ ଜାଣିବା ପାଇଁ ଓପିଟିସିଏଲ କର୍ତୃପକ୍ଷଙ୍କୁ ଯୋଗାଯୋଗ କରିଥିଲେ ମଧ୍ୟ କୌଣସି ପ୍ରତିକ୍ରିୟା ମିଳିପାରିନାହିଁ ।